咁快叫救命？後生仔未夠爐火純青喎。債息見過1.6%，VIX彈過35%，契媽打靶？新意網1686 中航租賃2588 都強。阿里巴巴9988，睇你點睇 (Patreon)

咁快叫救命？後生仔未夠爐火純青喎

債息見過1.6%，VIX彈過35%，契媽打靶？

新意網1686 中航租賃2588 都強

阿里巴巴9988，睇你點睇

咁快叫救命？後生仔未夠爐火純青喎

1. 聽到唔少人都叫救命，我啲持倉當然都有啲上落（都係ETF啫），但仲係唔明白做乜會咁大件事。我工都冇埋，但都冇驚過。係咪大家低估咗股市嘅波動？以前咪寫過恒指都一年30-40%高低波幅。老早講過2021唔會好似舊年3月後咁順景，升足大半年喎，一路係咁仲有窮人？

2. 個個上連登睇冧把，就唔使幫趁勞蘇基金啦。所以在公在私，我都寧願見個市回下，雞犬皆升個個股神先難搵人訂Patreon，先難搵人幫襯勞蘇基金。（BTW，有人問幾時開，答案好簡單：夠人先開。但保守估計都下半年，50萬港紙入場，2%管理費20%表現費（暫定），有興趣再PM，之前PM過嘅唔使）

3. 正面啲講，呢啲都係對新手好好嘅教訓，難聽講句就交下學費。「埃汾08年交咗成百萬學費都未出聲呀」（BTW，有人問當時點東山再起，好簡單：繼續返工）。

4. 最後同大家分享下今日見到信報寫嘅一段嘢，平時未必啱心水，今日呢段覺得幾好：

5. 講過啦，咁嘅市況都叫救命，你嘅組合係出咗啲問題的。一係你買得太大（或者借錢），一係成手都只係「契媽」股，叫你買啲領展你去鬧人嗰啲。一係你只係想日日贏覺得唔會跌。唔係嘅，應該唔會太痛。係嘅，就下次重整下啦。

6. 都唔好怪我長氣，可能有部份讀者（千幾人眾口難調）覺得我回帶又回帶。但真係不停接到PM，而見到好多人都係有幾重常見毛病（借錢，太集中，買得唔夠多，升少少就止賺），有機會開篇專題講。

7. 但，咁快叫救命嘅，咁你明白點解舊年一個月大市跌30%，你要撈底根本係不可能嘅任務啦！而家5%都未到你都叫救命。亦見到舊年埃汾可以完全一股不沽訓得安落，都真係要有啲功力先做到架！

債息見過1.6%，VIX彈過35%，契媽打靶？

8. 又再鬧多次，你見啲媒體呀KOL呀梗係拎陳茂波開火，覺得佢拖低股市。本人當然唔會支持政府（否則搞乜移民台灣？雖然我都唔多支持台灣政府）。但你見呢排根本係全球震蘯，你覺得香港加印花稅可以震散美股韓股？

9. 近排股市波動，主要係兩樣嘢。第一係債息。第二唔多唔少可能同「契媽」隻嘢走資有關，咁佢要應付啲贖回壓力嘛。債息之前講過，陣間再講少少。「契媽」啦喎，經過過去大半年，你應該知道，有咩人焗沽，唔係大壞事，反而對某啲人嚟講係買嘅好機會—唔係叫你訓身接，而係如果因為呢啲因素跌，係冇乜事嘅。盈富焗沽中移動如是，美國投資者要沽中資股又係，仲有舊年8/9月咩 Nasdaq whale都係。

10. 而你見到，債息一度上到1.6%，當然震散啲股票。一直都講earnings yield gap，1/美股PE – 債息（識先乘除後加減架可？），點會冇影響？

11. 不過話好驚？又未係好驚。唔係講我，講大市。未係好驚，係咪好事？就睇你點睇了。但見到VIX彈35%，好似好恐怖？我拉長個圖畀你睇，29嘅VIX，好低。甚至都唔好同舊年2/3月比。今年之前都見過啦。

12. 講返，呢幾日港美股啲走勢真係幾奇怪。你話差？恒指都未穿3萬，道指更加係之前一晚（星期三）先新高。固然你渣嘅嘢可能輸錢，但點睇都唔係咩股災下話？如果大市唔災，只得閣下啲貨災，又再證明你個組合有啲問題吧？

13. 雖然美股一度跌勢都幾全面，但主要都係傾向新經濟股。港股更加唔使講，咩長實1長和1113 長江基建1038都近期新高，你唔係因為隻幾億美金嘅SPAC下話？！

14. 領展823有返力你都可以話避險，但新鴻基16都52週新高喎！股乜災？

15. 至於堆內房股更係狂升，都在不同場合提過下。固然我唔會估到出乜鬼土地供應大改革，亦唔知細節會點玩。我覺得就只係太殘。之前聽我點，買咗中海外688嘅，應該全部上返晒水面啦。好事。

新意網1686 中航租賃2588 都強

16. 好，講咗咁多high level 嘢，睇啲冧把。之前寫過的，但都好一排冇講，所以唔放「大師冇點你」咁茅。但你見新意網1686呢排好強，出完業績後繼續升。「明明話純利倒退6%」。但首先，「業績只有勝預期同遜於預期」。另外，睇報紙都唔好只睇標題丫，入面講明計 持續經營業務的溢利 就升21%的，舊年有賣物業嘅收益嘛。

17. 至於中航租賃2588，不用多講啦，舊經濟，重啟旅遊嘛

阿里巴巴9988，睇你點睇

18. 最後講隻阿里巴巴，鬼媒都有講對沖基金大手減持。我就更加特登搵台灣媒體，「貪佢地夠腦殘逢中必反」（而台灣啲記者真係垃圾到一個點的）。重點係：呢啲全部滯後晒嘅數據，話畀你知舊年沽咗，咁你而家先去跟沽？（BTW，SalesForce 3倍？因為阿里巴巴市值都唔止佢3倍啦！一度成萬億美金呀小朋友）

19. 拿，識睇，梗係睇以上呢段啦。不解釋，我覺得阿里巴巴今年會幾好的。照舊，唔係叫你聽日訓身家買呀下。