The markets can remain irrational longer than you can remain solvent。微軟，AMC，阿里巴巴。咩股票沽空率最高？基金經理好少現金。蝕錢公司勁升。歐洲球會執位。日本動漫市場。市場變打機。顛覆荷里活again。你要做嘅3個理財對話。有錢真係快樂啲。會計師？食屎啦。Intel績後大跌。思摩爾打入全球五大煙草商。傳說中的溢價批股。飲百事送齋燒鵝 (Patreon)

快評幾句— The markets can remain irrational longer than you can remain solvent

大師冇點你—微軟，AMC，阿里巴巴

每日一圖— 咩股票沽空率最高？基金經理好少現金。蝕錢公司勁升。歐洲球會執位。日本動漫市場。

Good Read —市場變打機。顛覆荷里活again。你要做嘅3個理財對話。有錢真係快樂啲。會計師？食屎啦。

FB Post Summary —Intel績後大跌。思摩爾打入全球五大煙草商。傳說中的溢價批股。飲百事送齋燒鵝

1. 今日呢篇東西（一度叫做「甜品」，我到而家都唔知應該叫乜），有每日一圖有Good Read嘅，正常係星期三，五，日出的（點解唔係一三五？因為我想有一日休息，到我正式離職有可能轉一三五）。咁但由於星期六寫科企業績前瞻，星期日寫Game Stop（都算快手），所以呢個「甜品」跳咗一期。亦即係，今日你會見到每日一圖有五個圖，Good Read有五篇嘢，玩死我。其他嘢就寫少啲了，反正你都睇唔晒。

快評幾句— The markets can remain irrational longer than you can remain solvent

2. 沽空嘅嘢，幾時都係咁危險。大家反正唔會做，但應該有唔少係諗住參與，想搵下一隻GameStop。之前都講過啲名單，下面都會再有，但再講一次，你要明白呢啲真係唔係投資，係賭博。固然唔少人會贏到錢，但幾肯定之後呢堆嘢會大跌，你可以參考返壹傳媒（282）嘅走勢。

3. 咁，既然都有足夠時間畀你走（過去幾日買GameStop嘅執幾倍唔難，大把位走），冇話唔可以參與嘅，你見我都有叫你買AMC或AMCX之類。但，最緊要知道自己做緊乜。即係炮友就炮友，唔好當係真愛。反正亦然。好多問題就係啲人自己呃自己。

大師冇點你—微軟，AMC，阿里巴巴

4. 再講一次，記得Follow IG，有你著數（@ivanliresearch）

5. 微軟—正如之前講，公司令人放心，業績前已創新高，業績結果勁到不得了。盤後大升的，不過之後美股大跌，微軟都拖埋落嚟咁解。

6. 阿里巴巴—亦係舊文講，螞蟻應該上得返市嘛。呢刻在大科企之中，反而呢隻我覺得比較穩陣。

7. AMC —都係舊文講，冇架，順風車。但至少呢間公司正正常常，亦應該唔會死，股價亦真係唔算好過份。

每日一圖— 咩股票沽空率最高？基金經理好少現金。蝕錢公司勁升。歐洲球會執位。日本動漫市場。

8. 咩股票沽空率最高？—都唔少人問，明顯係想坐順風車。咁風險貴客自理，但呢個就係表，舊文都貼過類似嘅嘢。今次呢個似乎更加updated。但呢啲數據唔易拎，往往要畀錢，同埋亦有一定滯後。好似係半個月出一次。

9. 基金經理好少現金—以前都貼過類似嘅圖，當然係凶兆了。個個唔渣現金，即係相當亢奮，估值貴，大調整先兆。相反個個沽晒股票渣現金，就係買入之時。但道理係咁講，去到邊個位先轉角，永遠最難捉。

10. 蝕錢公司勁升—指標意義同上面差不多，都係睇個市有幾癲。但留意冇乜歷史數據，以前啲蝕錢嘅公司係唔會勁升的。唯一一次就係2000年科網爆煲之時。

11. 歐洲球會執位—都未得閒寫，但呢個係最新嘅Doolittle Money League．有興趣自己去睇。解下個圖，最左係排名，之後係升跌，排名變動。啡色框係收入按年升跌，留意多數都跌。點解？你居然要問？最右邊係球會收入，百萬歐元。留意球會冇你想像中咁高收入，應該一間維他奶收入多過晒佢地。BONUS：俄羅斯聖彼得堡辛尼特係唯一一間收入勁升嘅，畀你估下點解。

12. 日本動漫市場—其實我唔係好知係乜，計收入？請嘅人？公司數目？但正路應係收入。最大份當然係賣海外，始終日本人口老化。仲有係咩春歹醒，賣公仔好好賺。估唔到Pachinko都咁多。Pachinko是甚麼？日本的彈珠機。悶得很，係日本人先頂得順。

Good Read —市場變打機。顛覆荷里活again。你要做嘅3個理財對話。有錢真係快樂啲。會計師？食屎啦。

13. 由淺入深呀下

14. 市場變打機—冇錯係講GameStop，Charlie Bilello寫嘅文。佢寫好多文都好好，圖清晰，編排好，文字淺白。

15. 顛覆荷里活again—Ted Farnsworth搞間新嘢Zash，話要整個Virtual Hollywood，再一次顛覆荷里活咁話。但Ted Farnsworth乜水？再一次，咁佢上一之做咗乜？上一次，佢間公司叫做Movie Pass，以前我寫過好多次。一個月費任睇戲，但啲飛佢要自己正價同戲院買，結果燒錢燒到執笠。

16. 你要做嘅3個理財對話—鬼媒如CNBC啲理財文我好多時都唔貼，有啲根本大家制度唔同，亦有啲阿媽係女人，或者發咗達講乜都啱，再唔係就植入廣告。但呢篇不錯。3個對話？第一個我估香港都難做，叫你問朋友或同事或行家搵幾錢人工，人地睬你有味，況且我從來唔信「同工同酬」，人地柴廢拎最低工資你又學佢？第二題好啲，叫你同朋友分享理財目標，唔一定要講明搵幾錢，總之有個目標。第三題？叫你單刀直入問下你老豆老母啲遺產打算點。「唔畀你嘅就團年都唔使了」

17. 有錢真係快樂啲—無數咁多研究做過，我都寫過至少十次，研究結果都係話有錢開心啲，但去到某個水平就再多錢都只能開心少少（大約八九萬美金年薪）—但，呢個最新研究，就話你知，原來去到呢個水平都仲係多啲錢再買到開心的，冇想像中咁少。學術文，就梗係悶啲。想簡單？預告定星期六嘅經濟一周，我新專欄，會寫呢樣嘢。

18. 會計師？食屎啦—高質，但深又有啲長，完全冇金融底子應該睇唔明，最好有啲會計底（會計101得啦）。講嘅係intangible asset，以前唔多重要，甚至啲人唔睇。但而家啲公司（科企嘛），好大舊係intangible asset。咁點估值？亦有人話會計帳目根本冇用，完全反映唔到公司嘅情況。江湖從此多事。原本仲有句引子，實在係正，我都唔識譯做中文，照抄如下：Next to the "Who can put a value on a human life" pitch for biotechs and pharma my favorite rationale is "The accounting doesn't present a fair picture of the value" in these 'software is eating the world' stocks. In drawdowns you find out just how much or how little GAAP matters.

FB Post Summary —Intel績後大跌。思摩爾打入全球五大煙草商。傳說中的溢價批股。飲百事送齋燒鵝

19. Post出咗好多，但一係就係「讀者請食飯」，一係就賣呢度廣告。又或者只係出句「專家？食屎啦！」再加張Game Stop 圖就呃到唔少engagement—證明呃engagement 唔難，免費讀者都係垃圾食物就啱，亦未必要好多時間理嗰邊。

20. Intel績後大跌—Intel之前換CEO股價勁升，然後出業績（當然唔關新CEO事），明明好勁，但股價樣大跌。可能因為公司業績早早外泄？第間冇所謂，但Intel都咁流？

21. 思摩爾打入全球五大煙草商—呢篇我幾鍾意。思摩爾5000億港紙市值，而傳統嘅五大煙草商，有兩隻都冇思摩爾咁大。亦唔好以為賣煙仔好好搵，以前嘅事了。總有完結嘅一日。

22. 傳說中的溢價批股—批新股見得多，絶大多數情況都係折讓。但做乜會有公司溢價批新股？你見多數都係垃圾細價股。其中一個原因，係Anchoring effect．等你以為有人在XX呢啲位都肯接，之後實有排升。而多數之後都唔係。

23. 飲百事送齋燒鵝—Beyond Meat宣佈同百事合作，股價勁升。Beyond Meat細咁多，當然著數。但百事呢？已經冇餐廳業務，唔知有乜仙甩治呢？