ivanliresearch

跌800點？冇驚過。Stay Invested。大陸收水？都唔驚！快手一定要抽。螞蟻上市有轉機？睇阿里巴巴。GameStop嘅嘢—專家？食屎啦！ (Patreon)

Published:

2021-01-26 20:42:50

Imported:

2021-07

Content

跌800點？冇驚過。Stay Invested

恒指跑贏全球，但唔算貴，而本地股逆市升，外圍又冇跌。怕乜？

大陸收水？都唔驚！

快手一定要抽—抽得中的話

螞蟻上市有轉機？睇阿里巴巴

GameStop嘅嘢—專家？食屎啦！

1. 平生不作虧心事，半夜敲門也不驚。驚？我半夜多數都寫Patreon．星期一例休一日（已經有人問做乜冇問，而最初好似話係一星期三篇咋），又同大家見面。跌800點？冇驚過！今日2000字，但易睇。

跌800點？冇驚過。Stay Invested

2. 星期一升700幾點我冇乜特別反應，星期二跌返晒出嚟我都冇特別反應。固然畀你捉到星期一走人可能幾爽，但，之後呢？幾時跳返入去？另外，有幾多次可以畀你咁好彩捉到？上面個圖貼過幾次，不再解。留意係1980年至2018年，差不多10000個交易日，你可以afford miss到幾多個？

3. 咁，你問我驚唔驚，答案呼之欲出啦！驚都未驚過！大家經過2020年嘅3月，應該心臟大咗好多。冇錯我呢排係成日話會有個大調整，但都講過了，萬一升多四五成先跌兩成呢？又或者，萬一我錯呢？一路唔跌呢？咁你點？同埋亦係老問題：當你咁叻早咗落車避開到大跌—之後幾時買返？

4. 重覆再重覆：係固定每個月有錢買嘅，根本股價同指數都唔使睇。如果一大舊錢有幾隻心水嘅，亦係可以將來幾個月set定日期買，到時咩都唔好睇。

5. 你話：唔係喎，Ivan你都覺得周街股神，有機會大跌（特別係美股）．冇錯。「咁做乜跌都唔走？」。認真答你：「事前唔知幾時跌嘛」「到大跌咗先走入太遲」。「咁點應對？」「冇架，硬食咯」。你當打波咁，你贏場波就得啦，唔會保得住局局11-0，21-0，40-0，147-0架喎。

6. 一定要個個月贏錢？星期二大跌前，恒指年初至今—即係今個月，升咗10%。你計下個個月升10%會有乜後果？

7. 跌800點，有乜好驚？當然唔係叫你即時瞓身撈底（2.5% 咋喎！），但我唔明到底有乜影響到你。除非你做咗槓杆（咁係你問題了，我向來唔建議），或者過兩個月退休（嗰個係我）。

恒指跑贏全球，但唔算貴，而本地股逆市升，外圍又冇跌。怕乜？

8. 好，吹水心法講一輪，畀啲實質啲嘅嘢你壯下膽。首先，恒指絶對唔算貴，睇Price to book 就知，可以睇我明報專欄（免費登記）。

9. 再實際啲，呢個圖星期二黃昏，香港收市，歐洲trade緊，美股未開。首先你見到歐洲股市都全線升。我寫文時（半夜三點半）美股亦變動不大。就唔係嗰種環球risk off（雖然我估都就快會）。

10. 仲有，你睇下，即使跌咗800點後，今年港股都仲升8%—跑贏晒所有市場。所以個調整咁急。但唔似係會三成嗰種（至於10-20%調整，極之常見，根本唔使咩理由）。

11. 仲有你見到，雖然跌夠800點，但見仲有四份一恒指成份股升（13/52）。

12. 而差不多全部都係香港股票—我嘅演繹？啲資金只係泊咗去其他未喪炒嘅公司，完全唔係離場。

大陸收水？都唔驚！

13. 咁仲有個講法，話驚大陸收水。聽落都有啲合理，因為呢排嘅升勢的確好多係因為北水。之但係，幾時都係跌咗自然多故事，媒體點都會搵啲嘢fit入去。大陸嘅嘢，既然好消息你唔會信晒，壞消息亦唔使信晒。

14. 你可以睇下馬駿原本講嗁嘢，係咪真係好負面？（BTW馬駿並唔係人民銀行入面升嚟，而係在香港德意志銀行撈咗十幾年，之後先去人民銀行，好少見，你見佢講嘢都冇乜嗰種官味的）。又或者，睇下另一場合易綱講嘅嘢，易綱係行長喎，咁你話佢大定馬駿大？當然，大陸啲官講嘅嘢，仲要係公開講嘅，都只係參考下好。

快手一定要抽—抽得中的話

15. 其他公司，快講一下。但快手，當然係要抽的，都唔使點討論，雖然你係要講嘅，可以答你快手同抖音最大唔同，就係快手冇咁依賴廣告，比較多係直接打賞分成。

16. 不過，留意返分出嚟嘅「手數」少咗好多。如無意外就應該勁升，但，你分得到幾多？啲孖展倍數好驚人。

17. 你問我嘅，就寧願又玩全家出動算數。Good news 係一手皮幾嘢—咁先好。你一家四口中一手嘅，照計執五六千甚至一皮嘢掛？唔好以為一手入場費低係好事，正好掉轉。

18. 孖展嘅，就自己搵間最低息嘅做吧，今次冇人唔收你利息咁著數啦可？聽日再望下。但我一向唔係咁鍾意玩新股呢個遊戲。冇乜錢嘅搏執幾千還好，本身有啲錢就雞肋—就更加唔好沽晒自己啲股票去抽新股，隨時左一巴右一巴。

19. 都鬧咗多年，個新股機制幾唔公平。旺嘅你就實分得少，但一個唔該招股期間有咩大鑊嘢全球股災嘅，你必然分到一褲都係。

20. 近年，你見我真係力推瞓身抽嘅，只得一隻。「就係螞蟻」。

螞蟻上市有轉機？睇阿里巴巴

21. 講開螞蟻，又睇下易綱講嘅嘢，都有提過下隻螞蟻上市。我嘅演繹（有點粗俗）：「紫禁城的大門永遠開放，只要你肯閹了自己」。但你咪理，有得上好過冇得上，冇錯估值係大打折扣。但，呢一刻我會睇隻阿里巴巴。

GameStop嘅嘢—專家？食屎啦！

22. 我冇乜嘢要補充了。係喎，之前叫你唔好買的。當時隻嘢65蚊。阻人發達，本人會深切反省。

23. 不過都循例講下，啲短盤似乎係未投降的。仲有大把淡倉。睇下邊個子彈多了。但沽空嘅基金規模，一般唔會太大，亦唔會放好多錢落去。想死咩。都話過一個定律：一隻股票可以升1億%，但只能跌100%

24. 真係要搏，我寧願睇隻AMC，或者AMCX（兩間唔同公司嚟的！小心！）。前者AMC，正係戲院嗰間，講到明話拎咗錢，唔會破產（但，呢啲都有得保證？「到時誠信都破埋產」）（而，應該出盡好消息啦？）。後者AMCX，係AMC Network，有線電視，仲有拍戲。寫Game Stop篇文都講過，亦係沽空率甚高嘅公司。