Black Rock業績勁，但股價跌。Zoom批新股後照升，買嘢啦？節目預告：美資銀行股 (Patreon)

Black Rock業績勁，但股價跌

Zoom批新股後照升，買嘢啦？

節目預告：美資銀行股

1. 今日幾隻故事都係講美股，但港股都熱鬧的，快手講埋，你見都仲係啲二線科技股，甚麼微盟，心動，移卡，明源雲。王維基隻1137  6連升添。但騰訊阿里巴巴都強，因為美國應該唔會禁自己人買云云。

2. 之前都寫過，阿里巴巴肯定底已見，我知係咁畀人搞，但記住「narrative人人識講，但一切有個價」，去到某個位就吸引架啦，你當螞蟻變廢紙（況且唔會）都仲有個價嘛。但見咗底，又不等於之後跑贏。我都係估二線會跑贏，雖然上面提嗰推好多估值都幾誇張。可能都係諗 京東 網易 甚至 百度 拼多多好啲？

3. 又，簡略再講下。手頭上打算做嘅project（唔係指寫嘅文），應該3月正式失業就可以行：推聲音導航（audio版），出書（似會呢度眾籌），進軍台灣方格子（唔多關呢度讀者事，唔使訂兩邊，一樣的）。

4. 仲有，睇Facebook Page會知，我會在「迴響」粵語文學期刊寫文。怕且唔係寫投資貼士或SPAC 20問，有可能係職場嘢？金融業秘聞？或者其他？Stay tuned．我再強調返，呢本係文學期刊，我係一個文青。

5. 呀仲仲有，呢度嘅讀者，訂「迴響」，係有折的。詳情之後講。而天地良心，我就真係支持朋友（又係呢度讀者），亦都為讀者，絶對唔係為錢。

6. 另另另外，有人叫我寫下呢個Patreon嘅成功心得之類（自問都算係幾成功吧）。但出本書好似冇意思，只會畀人眼紅。不過可能第時寫文？未知。

Black Rock業績勁，但股價跌

7. Black Rock業績係勝預期喎，不過股價大跌。「手術成功，但病人死亡」。但你問我，而家我係放心買入去的。之前日日嫌貴嘅，難得有調整，咁應該買啦。定係又驚？咁永世都買唔到架喎。當然冇人保證過兩日唔會跌多10%啦，「大半年前已經叫你買又唔買」。

8. 認真講下個業績，係真係勝預期的。但股價就大跌。「又話業績勝預期股價一般都升？」．一般丫嘛，股票嘅嘢邊有包生仔？研究話，女性普遍投資成績好過男性（真的）。原因唔少，除咗係男人衝動，啲荷爾蒙太旺盛外，我認為仲有因為男人啲諗法比較「理性」「直線」，用硬科學嘅邏輯。但股票並唔完全係咁，往往有佢自己脾氣，要「感受」。

9. 個業績，都冇乜特別，收入同盈利都勝預期。預咗啦，資金不停湧入，Black Rock AUM已經去差不多90000億美金—咁畀個概念你，即係1% fee都900億美金收入一年，多過香港政府一年收入。

10. 點解仲跌？唔知喎。好消息出貨掛，之前炒過籠掛。但，試下學會問少啲「點解」。唔係叫你唔好問，但唔好不停問。正如你會慢慢學會唔好問人地點解同你分手，唔好問公司做乜炒你（真的，我被炒後好多人問我點解，我話冇乜點解喎，我都冇問，不打算問，問嚟多餘）

Zoom批新股後照升，買嘢啦？

11. 好快介紹返，之前爆疫情，Zoom高位一度去到差不多600蚊，但隨住開始有疫苗，加上業績開始放慢（要裝嘅都好多裝晒），股價由高位都跌咗超過三份一（拿，再講一次，「narrative人人識講，但一切有個價」，你點知去到邊個位唔再係炒WFH係炒返復蘇？），不過而家仲有成1000億美金市值。

12. 而公司早幾日批新股集資，集15億，細數，攤薄好少。但：公司IPO時先拎3億幾咋！而家拎多幾倍，因為股價已經係當年嘅10倍。當年？不過講緊兩年唔夠之前。而批新股後，股價反應幾正面，連升兩日。

13. 問題係，點解要拎錢？固然「唔拎對唔住股東」，但總有個理由。莫財就係最好嘅理由，但公司應該唔缺錢。都話IPO先兩年唔夠，仲要之後時勢做英雄生意咁好，有錢入袋。仲拎多15億？

14. 公司都老實（唔老實會畀人告），寫到明，for “acquisitions or strategic investments”。似會買嘢。買乜？我就唔知了。大家熟科技行業嘅可以諗下。難在間公司不一定係上市，亦唔會太大（你當Zoom只會買市值100億以內嘅公司），不過之前公司有講過，希望做corporate email嘅。睇下呢個方向如何？又，DropBox而家95億市值咋，可能都射程範圍？但睇唔到有乜仙甩治。雖然我都唔知Sales Force同Slack有乜仙甩治。

快手跟進 Bridgetown

15. 有啲嘢喎又。唔似成單嘢會告吹？不過，我都係覺得當初唔應該推介—雖然買嘅全部都有錢賺。SPAC呢味嘢，都係搵笨多。佢在明你在暗，睇住你嚟食。知係乜就好，唔使玩埋一份。舊文有寫過SPAC係乜，有機會寫篇新文講點解搵笨（積埋好多嘢未寫，真係要全職寫文了）

節目預告：美資銀行股

16. 可能慢咗啲（要快嘅記住睇Instagram！@ivanliresearch），但，應該會寫下，美資銀行股。都升咗唔少，亦切合我一路講今年應該玩返啲舊經濟股嘅猜想。

17. 留意高盛同JP Morgan都新高（記住睇Instagram！@ivanliresearch），而幾間銀行聽日（星期五）會出業績，應該核突，但股票炒預期，鬼唔知舊年第四季經濟差咩。

18. 之前寫匯豐寫友邦都提過，呢排長債債息上，仲要個債息曲線越嚟越斜（即係，長息減短息嘅差距越嚟越大），對銀行當然好。銀行就係食息差嘅遊戲。第二，應該嚟緊會做唔少回購。第三，因為股市勁，又多公司發債集資，investment banking 同 trading revenue 都會勁。有機會詳寫一篇。