盈富基金照買中移動，之前走資幾勁，但冇跌，唔會跌．HKTV Mall 新高．聯儲局歷年指引。企業盈利大反彈。蝕錢科企市值突破1萬億．阿里巴巴買得過。Lemonade扮晒良心企業。歌星扮晒平民．王浩信概念股。新股編號LMFAO．Dr Martens上市。盈富基金照買中移動 (Patreon)

快評幾句— 盈富基金照買中移動，之前走資幾勁，但冇跌，唔會跌

大師冇點你— HKTV Mall 新高

每日一圖—聯儲局歷年指引。企業盈利大反彈。蝕錢科企市值突破1萬億

Good Read —阿里巴巴買得過。Lemonade扮晒良心企業。歌星扮晒平民

FB Post Summary —王浩信概念股。新股編號LMFAO．Dr Martens上市。盈富基金照買中移動

小版務：每月推介一個Patreon—我徒弟，新田飛地

1. 又同大家預告下，應該有用，就係諗緊出audio版，聲音導航。唔係機械人讀，唔係我讀，而係有位忠心男讀者（把聲都幾好聽）。但佢亦唔係由頭照字讀，係會自己消化然後 sum up一次，再加少少佢睇法。我估audio版對大家好，可以坐車，跑步甚至返工聽。不過當然係額外收費了，唔會太過平，畢竟應該方便咗你好多，而我地係要每篇做多一輪嘢嘅。亦可以話你知係我同佢對分（比例就唔講啦），佢要睇晒篇文消化晒又要讀又要錄，都係功夫。如果大家覺得有用嘅話我知。冇用嘅，咪一切依舊，冇人訂埋摺埋呢個tier．可以畀一兩篇大家聽。

2. 仲有大把專題想寫。所以我估真係全職寫作啦，靠大家。除咗2020回顧+教訓要埋尾，仲有2021展望。我仲想寫銀行股（主要美資），近期都幾強，JP Morgan同 高盛都破頂（instagram有寫呀下，記住follow @ivanliresearch）

快評幾句— 盈富基金照買中移動，之前走資幾勁，但冇跌，唔會跌

3. Facebook 寫咗盈富基金照買中移動，日日新款，又話可以買返喎，所以真係唔使咁認真，官方話自己唔係美國公司喎。咁都得？開幾日會先發現自己唔係？咁之前又要停？仲有其他輪商做乜又停？我話講到尾都係錢作怪，唔好忘記好多大企業已經停埋捐錢畀共和黨（有啲係兩邊都停捐），當中亦有唔少華爾街大行。加埋之前紐交所又係彈出彈入，你應該估到背後好多角力好多利益。禁令點執行，任佢講。

4. 另外，可能我遲下會寫，但不妨睇下明報呢篇。講盈富基金走資，是真的。但留意唔係個股價跌，股價就一路都升，亦係我篇文入面有提嘅嘢。股價係跟恒指，點都係跟恒指。但走唔走資就睇一級市場 增發同贈回。

大師冇點你— HKTV Mall 新高

5. 又係嗰句，好股怕乜坐？咁固然有時事後先知係唔係好股。但如果升兩三成就急急腳斬嘅，證明你個信心都唔係好夠，或者買得太大吧？呢隻都公認好股，但中途都經常高位回調10%，咁又震走又享受唔到升浪了。仲有，舊年批過新股，又有人係咁鬧，嗰次都跌唔少，又係嚇到震走晒。

6. 順手畀你睇下，舊年7月我寫公司會入「港版納指」，應該全香港最早公開寫（有人早過我你話我知）。當時我寫股價一年半載可以升一個開。結果真係做到，甚至唔使半年。另外，寫120億市值，亦都做到咗。爭在未知純利（3月先出）。最後入唔到指數，但都有講，門檻越嚟越高嘛，冇計，120億都未夠入（而家最細都150億）

每日一圖— 聯儲局歷年指引。企業盈利大反彈。蝕錢科企市值突破1萬億

7. 聯儲局歷年指引—非常好嘅圖。紅色係聯邦基金利率，黃色係失業率，藍色係PCE（通脹）。留意埋聯儲局講嘅嘢。每次都畀足準備你。

8. 企業盈利大反彈—疫情後環球企業嘅生意同利潤當然大受打擊，但留意都反彈得好快，而且幾勁。咁再加埋放水，股市反彈係咪真係「脫離實體經濟」？

9. 蝕錢科企市值突破1萬億—如題，當然係歷年最高。但你諗下科網爆煲時都7000億，咁計及通脹，同埋息口，同埋成個世界唔同咗（而家真係可以燒錢搶份額然後獲利，當然唔係間間都得）。又好似唔係好誇張？關鍵當然係Tesla Amazon而家都係賺錢嘅。

Good Read —阿里巴巴買得過。Lemonade扮晒良心企業。歌星扮晒平民

10. 阿里巴巴買得過—鬼佬寫嘅角度，寫得不錯，由零開始同你介紹阿里巴巴，由歷史講起。完全係初哥可以睇得明。

11. Lemonade扮晒良心企業—Friendly Bear嘅沽空報告（張相好正）。Lemonade係乜？上市的（LMND），近年相當hit嘅所謂insurtech（Fintech嘅subset），高科技賣保險。公司聲稱社會良心ESG，但呢份報告認為公司講大話扮良心昆啲ESG投資者，誇大數字，亦冇捐咁多錢，同埋不停蝕錢。遲下禁售期過就會跌九成。花生。

12. 歌星扮晒平民—歌星呢期形象扮晒白領工人做體力工作食麥當勞。原因？Marketing啫，疫情之下貧富再拉開。再扮土豪就會出事。

FB Post Summary —王浩信概念股。新股編號LMFAO．Dr Martens上市。盈富基金照買中移動

13. 王浩信概念股—Elon Musk叫人用Signal．個個就走去炒隻SIGL，但根本只係同名，唔係嗰間公司。類似情況之前都試過，例如COKE唔係可口可樂（KO），ZOOM唔係你平時用嘅Zoom （ZM）

14. 新股編號LMFAO—真係市之將亡，必有妖孽。之前啲SPAC炒到飛起，而家最新入飛呢隻，簡稱叫LMFAO。完全有2000年科網爆煲嗰時嘅味道

15. Dr Martens上市—原來仲未上市的？實情好多歷史悠久嘅品牌都冇獨立上市，有啲係在上市集團入面（例如LVMH），有啲就轉手幾次又上市又退市。

16. 盈富基金照買中移動—改完又改，官方講法十分有趣，我就認為只係錢。所以真係唔使咁認真，一時又話係美資一時又話唔係，任你講。

小版務：每月推介一個Patreon—我徒弟，新田飛地

17. Er……話說我一個月推介一個Patreon，當然我自己都訂先會推。今個月冒死推介盡得我真傳嘅徒弟，「新田飛地」（唔係「飛田新地」，佢好介意人叫錯佢個名）。佢唔識股票，「但佢可以幫你解決好多股票以外嘅問題」。佢寫乜架呢？不如去睇佢Facebook Page。十分冒犯，not for the faint hearted，但我鍾意佢夠粗鄙夠政治不正確。只係收3蚊美金個月，佢都唔係諗住當咩事業，只係佢有個心願想去到100個Patreon，話做到我十份一已經好滿足。咁大家滿足下佢啦。不過，我勸女士都係唔好去。雖然佢話我知佢係有女讀者做Patreon ，真係百貨應百客。Anyway，有乜事搵佢，唔好問我。又唔係我個仔我細佬。