ivanliresearch

壞消息照炒，但市況好似唔係好癲？ASML，Tesla，BlackRock，中銀香港，友邦，金山，微盟，網易．成熟國家債台高築，但壓力反而越嚟越細。新興市場佔美國投資者幾多？交通遊戲（推介！）。全職炒股？新手CEO掂過老嘢．丹麥零息供樓。林建名。Tesla 8舊水啟示 (Patreon)

Published:

2021-01-08 19:14:37

Imported:

2021-07

Content

快評幾句—壞消息照炒，但市況好似唔係好癲？

大師冇點你—ASML，Tesla，BlackRock，中銀香港，友邦，金山，微盟，網易

每日一圖—成熟國家債台高築，但壓力反而越嚟越細。新興市場佔美國投資者幾多？

Good Read —交通遊戲（推介！）。全職炒股？新手CEO掂過老嘢

FB Post summary—丹麥零息供樓。林建名。Tesla 8舊水啟示

1. 一個簡單澄清，見讀者私訊我，話剛剛訂就聽我講想轉場，有啲擔心。其實佢好似係畀咗月費，「可能怕我著草」。咁當然never say never，亦永遠有進步空間，但暫時我對Patreon呢個平台，以及而家咁摸式，相當滿意—但，個世界唔係咁簡單嘛。你對段關係（情人，屋企人，工作）好滿意，對方呢？或者其他事呢？之所以講「轉場」，係始終覺得虛幻，too good to be true．而家咁收入當然夠我同埃汾太生活有餘。但，可能個平台摺埋呢，或者被禁呢，或者大家唔信任佢呢？所以我會居安思危，亦提定大家可能在第個平台再相見，但不代表我呢刻有任何計劃。正如我近年自我介紹，我係悲觀嘅樂觀者（底子都係樂觀，但我會諗最差情況）。

快評幾句—壞消息照炒，但市況好似唔係好癲？

2. 雖然美國非農就業數據唔掂（今次出係勞工部數據），12月職位流失14萬個。而街估係增長5萬個，11月係增加34萬個。但股市照升不誤（開市時係）。除咗因為有點賴皮嘅「數據差即係冇得加息」，另一原因亦係股市基本：同一個消息點炒兩次？星期三出咗「小非農」ADP，已經極唔掂，咁今次官方非農數字核突，唔會有乜意外吧？記住呢個原則。不過另一方面，你見到美國10年債息照升不誤，自己小心啦下。

3. 另一方面，星期五恒指升300點，本身冇乜特別，但其實相當怪雞：睇返上面佪圖，我特登叫同事整畀我。因為我心諗，中移動941同聯通762勁跌，恒指都仲有得升300點？而你見到，吉利一隻貢獻82點，而好多隻（15隻？）成份股都係跌嘅。

4. 有乜啟示？你見美股近期都係咁，唔係乜都升。可能係好事，證明唔完全係錢多乜都買。亦可能代表未咁快爆煲。

大師冇點你—ASML，Tesla，BlackRock，中銀香港，友邦，金山，微盟，網易

5. 「好多喎，可唔可以唔貼圖？」呢幾隻都係日日升到歷史新高，Tesla玩到Elon Musk變首富添。但我始終覺得今年會大插，但之前480買嘅，咪慢慢等。有人話點知幾時見頂。答案係：我都唔知，但真係高位跌10%嗰唔係嘢咯。

6. 呢兩隻都有寫，債息嘛。但我特別想講友邦1299。大家都知，冇大陸人嚟買保險，係災難。問題係，爆疫情都成年啦，你而家仲講呢啲是冇用的。所以幾時都係炒將來。當然，去到邊個位先係唔再驚生意差反而炒債息，冇人答到你—但我幾肯定唔會爆咗成年都仲講疫情。

7. 呢個主題真係講咗N次了，二線科企嘛。金山微盟網易都創新高。買咗嘅，可以吸取返Tesla嘅教訓。

8. 但，不妨亦自省下。係咪發現，問咁多冧把都冇用？畀到冧把你，有時都自己早早走咗。所以唔好只係留意冧把，仲要調節你自己心態。特別係，我始終唔信今年由頭升到尾，到忽然啲嘢插一兩成，更考你功力。

每日一圖—成熟國家債台高築，但壓力反而越嚟越細。新興市場佔美國投資者幾多？

9. 成熟國家債台高築，但壓力反而越嚟越細—兩個圖放埋一齊先正。上面個圖，成熟國家債務增長快過新興市場好多。但下圖，成熟國家利息開支反而一路跌，而新興國家一路升。點解？因為美國歐洲英國日本都行近乎零利息。

10. 新興市場佔美國投資者幾多？—近期成日講制裁，到底美國投資者有幾多資金買新興市場？答案係好少，2%左右，近年仲一路下跌。當然多得近年美國科技股強。但又，因為美國經濟規模太大，2%都相當大嘅數目，而2%當中應該好多都係買中國。

Good Read —交通遊戲（推介！）。全職炒股？新手CEO掂過老嘢

11. 交通遊戲（推介！）—呢個勁無聊！但好治癒！推介！Desktop更好玩。模擬公路，仲可以自己控制整個路障，加速度限制，司機cut線有幾狼等等，睇下點塞死。

12. 全職炒股？—呢排又有朋友同我講想試全職炒股（股災先兆？），話自己唔貪心，幾百萬本，一個月十皮八皮就得。嗯。周顯今日篇文值得一睇。我唔明點解咁多人高估自己嘅能力。股市歷史回報係幾多，公開資料。當然有人可以長期跑贏，咁首先可能係好彩。而如果係有實力嘅，嗰個係咪你？會唔會畀心機打好你份工會好啲？仲有一個重點，同樣係想一年賺10%（舉例），有錢人一定易過你。因為你有壓力，你輸咗下個月交唔到租。有壓力自然易犯錯。

13. 新手CEO掂過老嘢—好，畀返啲正經嘢你。哈佛商業評論。有話經驗緊要，識人好過識字。但至少在CEO身上，唔係。長期研究發現，新手嘅CEO，表現好過之前做過其他公司CEO嘅老手。表現當然係計股價。原因？好多。文中有講，冇動力啦，接受新事物能力低啦，一般只係留意節流（而唔係開源）。但我另有一個解釋：係同啲請佢地嘅公司本身有關。廢柴公司咪迷信名牌咯，未必係個CEO廢，但係廢嘅公司就請名人CEO。