Tesla 8舊水，Elon Musk世界首富。民主黨控制兩院，會點？債息升，當然有利傳統金融股 (Patreon)

Tesla 8舊水，Elon Musk世界首富。

民主黨控制兩院，會點？

債息升，當然有利傳統金融股

1. 近排市況多嘢睇多講，工作效率又低返。但無論如何，希望週末完成晒 2020回顧+教訓（暫時出到第三篇），真唔得就下星期—我返到Office應該好有心機寫—自己嘅文。另外，好可能週末會寫篇索羅斯狙擊英鎊做專題。陳年舊事，但過癮的。

Tesla 8舊水，Elon Musk世界首富。

2. 實在都幾多嘢講，但，首先恭喜下新晉嘅首富：Elon Musk．Tesla創咗新高—800蚊，而兩個月唔夠前我地力推，都只係480蚊。咁你都唔滿意，我唔知講乜好。

3. 又，呢壇嘢，我諗三個教訓

4. 第一：應該留意到，Tesla唔係最大市值嘅企業，可能第時會係（I doubt it），但呢刻仲爭好遠。但點解Elon Musk最有錢？因為佢渣得多。當然，傳統企管係覺得呢種乜都係佢嘅方法唔好，蘋果方式，專業管理人打工仔，先係好。

5. 第二：我口話唔鍾意畀冧把，但都成日畀。一來大家需要，二來亦真係過癮，三來亦會學到嘢。咁日日叫你月供盈富同S&P ETF，冇嘢好寫架啦喎，亦冇嘢好學。最理想嘅情況（我知有啲離地）：最好你係每個月有啲閒錢，然後堆閒錢入面大部份（未必九成，可能六成？）用嚟月供指數，中美都供。但剩返嘅，就拎嚟自己過癮—我講投資過癮買個股，唔係消費。不過，你要做到呢種東西，都真係要有一定收入—但正係咁，所以富者越富。講真你一個月儲得兩千蚊，我仲叫你個個月供盈富，你覺得好悶的，寧願搏佢老味一隻嘢得就得唔得就算。「所以講到尾，提高自己收入最重要」（廢，但真，有機會再講。你可以諗下你個倉升幾倍嘅機會高，定你人工升幾倍機會高—更唔好忘記，你個倉得十萬八萬嘅，畀你升三倍，又點？）

6. 第三：畀冧把都好，都係睇一個個人緣份，或運氣，或功力。真的，有啲讀者十幾廿年前已經睇我寫嘢，月供啲股票—頂丫，佢地投資成績仲好過我（其實不難）。但明明佢地都係聽我講月供嗰啲，點解佢地勁過我，亦點解有人賺有人蝕？可能係恒心，或者中間坐唔坐得穩。Tesla呢個例子真係好好，真係唔明點解大家想嗰時就想升幾倍，但到買咗後，又會想急急升兩三成賺咗佢。記住！唔好敢輸唔敢贏，下下升幾成就放，邊有buffer 下隻輸仆街？

民主黨控制兩院，會點？

另外，有讀者點唱，講民主黨上場會點。首先，如果講「民主黨上台」，之前啲文都寫過相當多篇。你可以爬下（請善用佢嘅search功能，或者你將我啲email儲起佢）。真係好多，好多，好多，好多，好多篇。

7. 但快手講下，如果你嘅問題係，民主黨總統對股市會點。咁之前已經貼過下。理論上，民主黨比共和黨總統，更有利股市。

8. 如果你嘅問題係，拜登上台有乜板塊利好，呢個亦貼過。咪光伏（太陽能），大麻之類，中國墨西哥之類。你見香港啲光伏股都升晒

9. 有人話民主黨對科技大好，我有保留。冇錯科企好多都係支持民主黨，但民主黨入面有唔少「進步派」想整治科企。掉轉頭，你見侵侵好似成日鬧科企，同亞馬遜光頭佬擺明勢成水火—但亞馬遜咪又照狂升，升到光頭佬做首富。你可以話美國有制度又得，但掉轉，針對科企，應該係邊個上台都會做嘅嘢。同政黨無關

10. 但照計呢啲東西，唔係炒晒，都已經炒過。咪話股票炒前景咯，根本未等到投票，大家聞到拜登機會大，就炒定先架啦。

11. 但，而家多咗一樣嘢：民主黨拎埋參議院（上議院，Senate）—呢個令人有啲意外，因為咬得幾緊。反而眾議院（下議院，House of Representatives）一早就係知係佢地。

12. 呢個，就代表由原本以為懸峙國會，變成一黨話事。Implication 係乜？正路地，政策會易啲過，冇咁多人拖後腿。但對企業對股市，未必係好事。政府做唔到大動作，對股市可能先好。

13. 如果冇睇錯，其實民主黨＋懸峙國會對股市最好。一黨話事反而冇咁好 —但，你話廢都要講句，唔好將呢啲政治嘢放到太重，你見乜黨上台，美股長遠都係升。

14. 不過講實際啲，比較明顯見到嘅係：民主黨會派錢，事實啲「進步派」甚至想免晒啲學生貸款（也即是派錢）。咁玩法，美元應該會弱，對市況，應該算好？當然派咗錢亦有助消費，所以可能都係利好舊經濟股多過科企。

15. 但，咁派錢，當然市場會驚驚，昨日寫過近排啲債息升得幾快。而家當然仲係好低，但，一路升上去會點？當然，仲有聯儲局，到時可能又被迫買債（亦即係再印錢），壓低個債息—咁美金又會再弱 — 好似幾好，直到去到某個位會出事。

16. 想講最後一個教訓：政治嘢，唔好咁認真。例如中資電訊股單嘢，最初除牌，有人好認真咁分析分析。到紐交所話改變主意，佢又再分析話有乜意思，政策轉向啦。之後又再話除，都唔知點解釋

17. 仲有，你睇，明明又有人話拜登上場股市就仆街（公平地講，上次都大把人話侵侵上場股市就仆街，實情呢啲人就自己最先仆街）。結果標普指數又新高，納指又新高嗰下先奇嘛！仲要之前又衝擊國會又死人，而家又話罷免侵侵。但股市照升不誤。所以真係唔使咁認真，政治緊要，但唔好撈埋落股票度。

債息升，當然有利傳統金融股

18. 最後一個，快講少少。債息上升，應該係不利股市嘅。但世事唔係咁簡單啦下。講真舊年年中已經債息升上嚟，數係咁計，係越嚟越唔值搏，但你點知去到咩位先跌？你仲要預，呢啲分析，聽落make sense，但可能錯架嘛。正如你睇樓市，聽咩「負擔比率」，好似幾合理，咁你真係07年之後都唔會買樓的，當中錯失幾多？而你真係覺得會跌返去沙士價？印錢嘅年代，投資有風險，但唔投資可能風險更大。

19. 講返，呢個債息依然係再升，有可能同樓上講嗰堆民主黨話事肆無忌憚派錢有關（更準確地講，係因為一黨控制上下議會，我相信共和黨拎晒兩院都會係咁做）。

20. 咁昨日有寫啦，利好乜公司？當然係匯豐。仲有一眾傳統嘅金融股。雖然長遠少少都係冇乜作為，但呢排真係翻生。美國同歐洲啲銀行都係。咁香港上市嘅，除咗匯豐，仲有渣打2888，中銀香港2388同恒生11。仲有啲保險股，友邦1299宏利945保誠2378之類—留意，唔係大陸嗰堆保險同銀行，另一種玩法，雖然都間接受惠嘅，股價都算OK。

21. 呀，作為101班，快講點解有利銀行（同保險）。因為銀行都係食息差嘅玩意，低息環境對佢不利，一般銀行鍾意高息。1厘拎錢3厘放錢，很好。但如果兩邊都減息1.5厘呢？放錢得返1.5厘，但拎錢唔會係負數，因為你會寧願放在曲奇餅罐，或者拎去賭波買股票買Bitcoin。所以銀行鍾意高息。