Tesla全攻略：呢排升乜？入指數有乜要求？點解今次特別唔同？點解之前入唔到？有幾多被動基金要追貨？ (Patreon)

Tesla呢排升乜？升得有幾勁？幾時散水？

Tesla有幾貴？

入標普500指數有乜要求？有幾多資金追蹤？

點解今次Tesla入標普500指數係有今生無來世？

點解上次Tesla入唔到標普500指數？

Tesla會佔比重幾多？

被動基金有幾多錢要追貨？

而家追仲追唔追得過？幾時落車？

1. 除非另有注明，否則內文全部美金做單位。另外，上面堆問題，「主要係用嚟吸新讀者」。因為編排問題，下面唔係完全順序，但睇晒篇文就實有答案。

Tesla呢排升乜？升得有幾勁？幾時散水？

2. 相信無論有冇買Tesla嘅，都聽過呢間公司，亦知道公司做乜。冇聽過或唔知嘅，得罪講句唔夠常識，多啲睇文。而今次呢篇文，基本上唔會討論公司做乜，技術，甚至啲車得唔得呢類問題。完全無關。純炒作，只係炒佢入指數呢樣嘢。埃汾平時推得啲公司，多數都係可以長期持有（我講嘅長期係幾年），比較少寫少講呢類純Trading嘅策略，所以講明先。

3. 首先講下前事，埃汾一向都唔推介Tesla，原因係貴（有幾貴陣間會講）。但早排忽然轉軚，呢度11月17號篇文我忽然叫大家可以短炒下。有紀錄為證。當時嘅原因，只得一個，因為公司會12月21日入標普500指數。

4. 留意寫嗰時，已經宣佈咗。係樓上個圖，我覺得升得少。咁我半夜出文，to be fair大家睇到文再買到時，應該係480蚊咁上下。我點知？因為有讀者買咗，冇造假，肯定480蚊買到

5. 最新股價？大約590蚊。即係由寫篇文飛入去，大約執23%，講緊一個星期多啲嘅事，相當不錯啦。

Tesla有幾貴？

6. 好啦，呢篇文唔係攞威，而係，之後又點呢？首先記住，一路我都唔多鍾意呢隻嘢。咁鍾意抽水可以話走寶，固然係走寶，但我絶對冇叫你沽空（反正你都做唔到）。有冇諗過好多口水put日日話未日嘅人，佢地仲未輸仆街，只係因為佢地冇得沽空（當然有的話佢地可能亦唔敢，證明得個講字，反正沽期指門檻極低）。實不相瞞當年我多年前200蚊左右買過—但講緊係未拆細嘅200蚊，死未！執好多？冇啦，平手走。

7. 一路唔多信公司嘅原因，當然係因為貴，而且公司一路都冇乜點賺錢，即使近五季都有錢賺，主要都係嚟自carbon credit，唔係賣車。當然唔係假數，但比人感覺個盈利質量相當低。

8. 我成日貼嘅　Charlie Biello，亦係質疑Tesla估值嘅人。無數咁多例子可以質疑Tesla嘅估值：

9. 例如Tesla而家市值大過畢菲特嘅巴郡。但，Tesla收入，280億，巴郡係2790億。Tesla純利（好叻架啦，有錢賺），6億唔夠，巴郡係360億。你計Free Cash Flow（唔知係乜亦冇關係），Tesla 18億，巴郡270億。

10. 而當然，公司嘅市值，已經大過晒GM，福特，Fiat Chrysler，Honda，現代，Daimler，法拉利，寶馬，福士……加埋。但出車數量呢？鐵粉話唔好講呢啲

11. 而即使你拎返科技股嚟比，Tesla嘅估值亦都係貴得驚人。甚至都唔好講盈利，只講Price to Sales

12. 當然，有人話高增長，同Amazon Netflix 之類點同（？！）。但，事實係Tesla嘅銷售，不過係一年升咗15%。

13. 不過冇所謂，同啲狂迷講，會覺得你金融撚識條撚。高增長呀（15%嘅高增長？！），改變世界呀，一統天下呀，到時柴油車全部變垃圾，全世界都用電動車，其他車廠幾廿年都未追到。

14. 是但，反正都唔係想討論呢樣嘢。雖然最後一句，你可以諗下，到底5000億嘅市值，Price in 咗幾多未來嘅增長，提早預支咗幾多年嘅將來。但冇所謂，早兩星期開始推介，說穿咗都係一個接火捧遊戲，鬥傻

15. 亦都公平講句，正係一啲半信半疑，甚至好多人都覺得會死嘅公司，死唔去，個爆炸力先最勁。例如NetFlix，例如Tesla，甚至係過去好多年嘅Amazon．相反，Facebook一上市嗰時，大家已經知道勁，就唔會係幾百倍咁升了。

16. 記住，我只係睇佢入標普指數一樣嘢，打後爆煲都係另一回事。當然唔一定話12月21號就沽晒佢。睇埋落去。

入標普500指數有乜要求？

17. 標普500指數（下面簡稱標指），應該係世界上最重要嘅指數。好可能重要過Nasdaq，而道瓊斯指數係可以不理的。

18. 然後可以睇下，到底有標指有乜要求？咁我地可以順手睇埋，點解Tesla上次被標指拒諸門外？（今年9月嘅事，當時股價就大跌20%，史上最大單日跌幅）

19. 首先，要係美國公司，Tesla絶對冇問題。市值至少要有82億，咁Tesla一早已經過1000億市值，亦都肯定排到頭500位（實情排到頭50都好耐）。至於成交量，或者公眾持股，亦肯定冇問題。

20. 唯一最大問題，就係highlight之中最後一句。最近一季要賺錢，而過去四季夾埋都要係有錢賺。呢個亦係Tesla之前咁多年入唔到標指嘅原因，因為一路都蝕錢。

21. 但，明明近幾季已經賺錢架啦喎（靠carbon credit都係賺丫），9月嗰次，Tesla已經連續四季盈利。咁，點解仲入唔到？

22. 答案係，唔知。呢啲指數嘅嘢，好多時有discretion，酌情權。可能因為覺得個盈利質素唔夠好，可能係因為覺得股價太波動，甚至有人話金融佬針對公司喎，咩都好，係幾黑箱作業，冇解釋嘅。

23. 然後，到今次，又忽然話12月21日會入標指了。留意，標指嘅委員會，酌情權真係好大下，甚至係在季度檢討之外嘅日子，都可以加減股票。

點解今次Tesla入標普500指數係有今生無來世？

24. 好啦，點解今次入指數咁特別？「咁入指數本身就係特別」「一世人一次」（其實唔係，可以踢出再入，香港都幾間公司試過），但今次真係有今生無來世。

25. 點解？因為，從冇一間公司，係去到咁Q大間先入指數嘅！呢個可能亦係標指班友之前一路唔知點處理嘅原因，可能要多啲時間商量。

26. 你問普通人，一般會諗，標普500嘛，咪美國市值最大嘅500間公司，咁我豆泥公司由最初好細，到市值變到頭500，咪會入指數咯。

27. 正路係咁，但事實就唔係咁。Tesla老早（懶查）已經係美國頭500大公司，甚至50都入咗好耐。但因為蝕錢，一路都冇入到指數。到而家呢刻入嗰時，佢已經大過巴郡，變咗美國第6大市值嘅公司！（留意上面個圖最頂嗰間係錯的，計錯數）

28. 咁，有乜影響？就係，你一次納一間咁大嘅公司入去，啲指數基金咪追到氣咳咯！以前我追間第500大嘅公司，而家我追間第6大嘅公司！由零開始喎

29. 但點解之前冇試過咁？因為，以前啲公司，如果可以做到咁大市值嘅，好少會蝕錢。或者話，以前啲公司，如果蝕錢，唔會去到咁大市值嘛。所以就出現今次嘅情況。

有幾多資金追蹤標普指數？Tesla會佔比重幾多？被動基金有幾多錢要追貨？

30. 第一題最易答，官網唔呃你。追蹤標指嘅資金，大約係4.6 Trillion，46000億美金。即係幾多？咁可以比較下，追蹤恒指嘅資金，講緊200億美金左右。你睇下爭幾多倍？

31. 正路地，Tesla在指數大約會佔1%嘅比重。留意雖然Tesla市值大過巴郡甚至JP Morgan，但在指數佔比重可能會細過，因為仲要計埋公眾持股，而Elon Musk渣住好多Tesla。係喎，第 6大都只係佔1%，唔好忘記500隻成份股喎。

32. 被動基金有幾多錢要追貨？之前啲被動基金完全冇，要買1%比重，咁即係，46000億嘅1%，大約460億美金左右要追咯？應該咁計？

33. 但另外，高盛嘅研究，就話大約80億美金，同上面講嘅數好遠。但留意，高盛只係講佢地跟進嘅一堆基金，我估個數字係低估的。照計埃汾根標普官網畀嘅數，唔會有得錯。

34. 然後，登登登登，寫到呢度卒之畀我搵到份官方文件（十分重要！），唔使估估下。人地都話大約510億，同我估嘅460億爭唔遠，「證明我仲準過高盛」。

35. 另外提返，呢個1.01%比重，同埋510億，係根據11月13日嘅市值計，而家就唔止了，應該多返4-5成。可能係去到1.5%同760億左右？

36. 不過提埋你，記住，睇多次份官方文件（識英文幾咁重要）。其實係官方出嘅consultation paper，因為公司都知道追貨追到氣咳嘅問題，所以我估驚死，就極速臨急臨忙諮詢下（主要係啲被動基金），到底係照原定，12月21日一鑊過。定係分兩次，12月14日（！！！）加啲，21日再加啲？

37. 呢份嘢，只係畀咗幾日哦基金填，11月20日已填完。咁個結果呢？原來係11月30日出！即係星期一！自己睇路。但我就咁估，指數基金應該會想分開兩劑加？咁即係可能12月14日已經炒上去，唔使等到21日。又或者係，會唔會市場聽到要分兩次，就率先11月30日已經散水？自己睇路。記住上官網睇。

而家追仲追唔追得過？幾時落車？

38. 最後可以留意下，如果我冇睇錯，近期Tesla嘅成交，大約去到260億一日。咁所以，你話760億（上面我估嘅樂觀上限）追入去，其實都不過係平日嘅3日成交。算唔算好誇張？唔算，你見恒指都有咁上下。關鍵係，Tesla係一隻相當大成交嘅股票。

39. 所以我懷疑，根本到時被動基金買盤，冇你想像中咁大影響。大家而家只係接火捧咁齊齊炒上去。唔好太過興奮唔記得落車。

40. 應該講過好多次，埃汾最唔鍾意畀冧把。更加憎嘅係你問我幾時買，幾時沽。「不過今次例外」。我當你係好似嗰位讀者咁，睇完上次篇文，480蚊買。咁我嘅玩法呢，會一路「放風箏」咁。唔跌返去到500蚊，我係佢都唔會沽嘅。反正啲錢原本都唔係你，你都係坐轉順風車。雖然一路都話貴，但Tesla能人所不能，鐵粉又多，咪玩到爆煲為止，在唔蝕錢嘅大前題下，未必要咁早沽。