[Side Dish] 定價的藝術．誰殺了侵侵？外資依然留戀中國．Tesla第五代自動駕駛仍需努力。邊間麥當勞雪糕機壞咗？睇App．微信女陷阱之二。多謝高生先 (Patreon)

快評兩句—定價的藝術

每日一圖—誰殺了侵侵？外資依然留戀中國

Good Read—Tesla第五代自動駕駛仍需努力。邊間麥當勞雪糕機壞咗？睇App

FB Post Summary—微信女陷阱之二。多謝高生先

快評兩句—定價的藝術

卒之搞咗分層收費，呢件Side Dish 會分開賣（8蚊）。但暫時係冇人只買呢舊嘅，反而唔少人訂Main Course+Side Dish（12蚊），唔知係好事定唔好事。可能呢件Side Dish定8蚊太貴，本人想吸啲budget有限讀者嘅算盤打不響，但又可能反而迫咗啲人索性訂12蚊，「反正都爭少少，唔好唔拖唔水」。原理好似「人人都叫wine list 第二平嘅酒」，但餐廳又會利用返呢樣，最平嗰支只係做掩護，真相可能永遠唔會知，

定價呢啲係最高藝術，大家知道總收入=價X量。而對於做content嘅（作者，藝人），marginal cost極低，十個讀者我用咁多時間寫，一百個都差不多。所以你要將個收入最大化。但常識話你知價同量多數係反比，定得貴實會少人訂，個平衡點在邊？係冇答案的。

其中一個方法，係參考出面其他人定價。固然個個都話自己與別不同，但在消費者心目中，往往唔係咁諗，唔好咁中二病。大家都係Price taker．就呢點嚟講，我個Patreon其實定得貴—因為好多名人都只係收5蚊，咁好容易就有人問「邊個邊個都係收5蚊你憑乜收咁貴」—我都答唔到

理論上，馬後炮，梗係可以同你講niche market，蘇永康（唔知做乜諗到呢個例），我唔使好多人，但個忠誠度極高。但呢個只係事後講，當年點解我定12蚊？係因為…..根本冇睇其他人定幾錢。只係我在HomeBlogger年代都係咁上下，而都有300個讀者，咁我最初諗，我做返呢個數咪得。

無論如何，以上係分享個人經驗，當經濟或商業理論咁分享下。

雖然冇乜人單買呢舊Side Dish，但都係會拆開，應該對讀者都好，唔使一次睇咁多。留意返呢舊Side Dish會係星期三，五，日出（硬係覺得講日，三，五好怪）。平時個Main Course就照返二，四，六。即係依然一個星期六篇，星期一我休息下。

BTW，星期一我在明報會有篇文，pretty much sum up晒關於大選嘅睇法。睇下星期二有冇機會再講，可能冇。就睇明報呢篇

去片。「大師冇點你」繼續從缺，以後星期日應該都冇，因為……冇市。但星期三五會有。

每日一圖—誰殺了侵侵？外資依然留戀中國

誰殺了侵侵？—我本人嘅立場唔係重點，亦唔想影響大家，反正我又唔係選民。但我依書直說，你見各種客觀指標都估拜登贏（當然可以錯）。但侵侵敗因係乜？似乎真係肺炎打殘咗佢機會。你見我引其他啲指標，都係3月尾開始拜登先佔優。歷史冇如果，但如果冇呢場疫症，我估侵侵可能連任（而家都未肯定唔得，過兩日就知），至少在民調唔會咁落後。

外資依然留戀中國—同樣地，好多人以為我成日唱好中國。但我只係依書直說。事實係好多人根本唔了解，亦低估咗。（BTW，侵侵在任所謂最強硬嘅兩年，A股升勢跑贏全球）。例如你以為外資撤尼，但中國嘅FDI（外國直接投資）企得極硬，照計呢啲數好難呃。當然點解德國墨西哥咁勁就另外研究，我估墨西哥係搶咗部份中國嘅投資，德國就……受惠脫歐？

Good Read—Tesla第五代自動駕駛仍需努力。邊間麥當勞雪糕機壞咗？睇App

Tesla第五代自動駕駛仍需努力—埃汾冇渣過車（但有車牌！），亦係電腦盲機械盲，所以唔知有冇理解錯。但篇文話Tesla想走到去第五代自動駕駛（有講定義），仲有好長嘅路要走。點解？因為啲飛蟲呀，雀屎呀等等，會痴落部車，檔住啲sensor，但暫時未有啲好似水撥嘅嘢去整走

邊間麥當勞雪糕機壞咗？睇App-呢個小朋友整咗個app同埋website，利用麥當勞嘅API，睇到全美國邊間麥當勞嘅雪糕機壞咗，等你唔使撲空。原理就係佢走去用app落單，睇下啲雪糕單過唔過到。咁佢落晒所有麥當勞咪知，但當然唔使真係畀錢。唔知在香港會唔會畀人話不誠實使用電腦。又，原來差不多10%嘅機係壞的，都幾多。

FB Post Summary—微信女陷阱之二。多謝高生先

微信女陷阱之二—另一隻爆煲微信女股。有人質疑我做乜唔早講，爆咗先講。我係特登的。首先，好得閒？二來，我開晒真名，阻人搵食好危險。三來亦不覺得啲苦主有乜要同情。其實我講過晒啲特色你知，根本你就唔會中伏，仲邊使我每次warn？授人以漁嘛。我幾時都係教大家心法，唔係畀冧把。

多謝高生先—冇乜公共性，純粹多謝呢度嘅鐵粉高生。第一個Patreon，亦係第一個join 40蚊月費嘅超級會員。邊個加入做超級會員，我都會幫佢寫篇文。個Post仲有講啲我在01年代嘅事。冇朋友介紹我去01寫文，生命可能不一樣。