週末專題：美國四大科技股（Facebook, Amazon, Apple, Google) 業績全攻略。當然又有Excel 玩 (Patreon)

快評：廣告帶動業績勁，收入盈利都勝預期，但股價照插

Facebook：廣告收入極強，咩杯葛根本笑話，但北美用戶數按季跌拖低股價

Amazon—收入極極勁，但又預期第四季開支大增（上季都咁講）

Apple—其他幾瓣加埋晒先勉強抵消iPhone收入不如預期，大中華亦令人失望

Google—業績非常強，廣告收入勁，升得有理

總結—有幾多公司有咁嘅增長？爆煲？唔似咯。

1. 今日呢篇晏咗，但相信大家會體諒嘅，今日呢篇就緊要，講四大科技股業績看點，同埋之後點，揀邊隻。照舊，個Excel送埋畀你玩

快評：廣告帶動業績勁，收入盈利都勝預期，但股價照插

2. 是咁的，香港時間星期五朝早，即係美國星期四收市，四大美國科技股（Facebook, Amazon, Apple, Google, FAAG）出業績。咁趁出之前，我就寫咗篇前瞻，講市場估嘅數，同埋看點在邊。因為嗰邊寫咗，呢度不再重覆（反正講到每隻嘢會再提一提），只係簡單整個表畀你。有第三季真實業績，同埋市場預期。

3. 當然不同公司嘅增長不能直接比較，特別只係一季。所以係睇同預期比。咁你見到，四間嘅收入都比預期好，而且都幾明顯。只係有收入冇意思，咁你見盈利，都係全部比預期好，亦都幾明顯。仲有，見到蘋果係明顯較弱嘅，唔止係佢增長慢（呢樣嘢本身冇問題），而係勝預期嘅幅度佢係最細的。

4. 咁正路地，業績勝預期，就應該升。但十分正路地，市場就有時唔係好正路，近期就係。出完業績後嘅星期五，除咗Google仲有得升外，其餘幾隻跌到反艇，仲要係已經收窄咗。

5. 睇左邊，今季大多數公司嘅業績都勝預期，幅度更加係近N年最高，證明之前啲分析員並冇「過份樂觀」，3月底開始嘅反彈肯定唔係完全冇理。不過，睇埋右邊，見到偏偏指數表現就相當差，10月係3月以嚟最差。原因好多，可能係因為估值已唔平，或者因為第四季展望麻麻（但唔算太差，之後講），或者因為啲刺激方案一路卡住推唔到，或者係市場避險情緒高，大選前，無謂搞咁多嘢。

6. 陣間會一間一間講，但業績整體咁強嘅原因，除咗疫情（特別係Amazon），就係廣告。Facebook 差不多全部收入係廣告，Google 都八成，Amazon就好少，5%。之前在instagram貼過（記得follow），Snapchat同Pinterest業績都強，亦係因為受廣告帶動，當時已有講似乎市場係對廣告收入估得太悲。咁當然SnapChat同Pinterest細好多，有人唔多信，以為只係搶走大公司份額。到而家出晒大公司業績，就知成個Digital marketing市場比市場預期中好。

7. 下面逐間講，最後就Summary

Facebook：廣告收入極強，咩杯葛根本笑話，但北美用戶數按季跌拖低股價

8. 留意返公司差不多所有收入都係廣告。第二季收入按年升10%（一年前係升28%），咁第三季場市預期都係差不多咁情況。公司7月時亦講過收入大約升10%，8-10月都不多。結果呢？升22%。唔知係咪公司特登調低大家期望

9. 其他例如每日活躍用家（DAU），每月活躍用家（MAU），每戶平均收入（ARPU）等等都係好過預期嘅。特別留意MAU去到27億！地球先78億人！仲要有14人嘅中國禁咗（當然照樣有人用）。即係64億人中有27人億人用，仲未計啲小朋友。固然一方面你可以話冇乜增長空間，但另一方面亦見到network effect大到一個點

10. 講過啦，公司差不多全部收入係廣告。仲記唔記得之前有單講到好大嘅「杯葛Facebook」鬧劇？成堆廣告商投訴Facebook唔限制仇恨言論喎，結果你見到係冇乜影響嘅，亦都好多公司靜靜地用返。至於用家杯葛更加唔使討論。公司仲不忘話你知，而家有1000萬活躍廣告客戶，7月先得900萬。杯乜葛？公司話預期第四季嘅廣告收入會更好。

11. 咁好似，全部嘢都好正面。咁跌乜？又真係有個原因。因為北美嘅DAU跌，「一季少咗2百萬」，巧驚驚。上季係1.98億，今季得1.96億。公司話因為之前疫情高峰特別多人上，到好返啲就少人了，亦都預期第四季都會差，可能就係因為咁而跌。

12. 至於之前好多人擔心嘅content moderation cost（即係請啲高端南亞仔睇你出廣告出post有冇問題），結果唔係升得好勁。

Amazon—收入極極勁，但又預期第四季開支大增（上季都咁講）

13. Amazon亦都係相當強嘅，係疫情受惠股，第二季收入按年升40%，第三季市場估按年升32%，結果升夠37%。亦係公司連續第76季達到雙位數增長。冇乜特別？你自己做生意就會知。連續19年幾喎，當中經歷過幾多嘢？仲要係咁大間嘅公司。

14. 公司預計，下一季收入會突破1000億美金（係咩概念？一季喎），去到1120-1210億，代表按年升28-38%。而街估1123億，公司似乎好有信心做到，仲提埋預期假期生意會相當好。

15. 其他收入方面，Amazon Web Service（AWS）收入係116億，按年升29%，同預期差不多。其他收入方面，主要係廣告，按年升51%去到54億。訂閱收入（主要係Amazon Prime），升33%去到66億—留意呢兩者加埋經多過AWS，增長亦快。

16. 開支方面，物流成本按年升57%至151億，固然升得快過收入，但講到尾公司利潤升咗近兩倍。另外，要搵個原因解釋點解跌嘅，就係公司講明，第四季應付肺炎會有額外10-45億開支—而上季先話今季用20億。但，公司之前亦都屢有報大數，管理你期望嘅前科。

Apple—其他幾瓣加埋晒先勉強抵消iPhone收入不如預期，大中華亦令人失望

17. 明顯係比較差嘅，市場預咗收入同盈利都倒退，結果出嚟收入有增長，盈利倒退亦冇預期咁差，但同其他三間拍埋埋就爭一截了。

18. 收入跌係一早預咗，元兇係iPhone12搞到第四季先出貨，自然影響收入。留意iPhone收入（依然係最大收入來源）按年跌21%，亦低過預期—在今次四間科企嘅種種指標中，好少見有差過預期。當然只係時間問題，iPhone12嘅數第四季就會見到，但分析員亦一早知，似乎冇新機嘅影響比想像中大（特別在大中華，陣間講）。另外，公司亦都唔肯畀第四季嘅指引（之前兩季都冇畀），總收入指引冇，iPhone12銷售指引亦都冇畀，難怪股價受壓。

19. 留意返，Ipad同埋Mac嘅收入遠超預期，但依然唔夠補返iPhone收入差過預期嘅影響。另外留意，服務收入亦都高過預期，史上最好，而家佔總收入25%。全部加埋晒，先夠補返iPhone跌咗嘅。

20. 另一個畀人覺得差嘅部份，係大中華（包埋香港台灣）。收入係 80億，之前一年有111億，按年跌28%。銀碼去到6年新低。添曲話係因為遲出新機嘅影響，而在大中華影響特別大，因為呢個地區新機嘅收入比其他重。大中華人好有錢換機（最後一句我講嘅）

Google—業績非常強，廣告收入勁，升得有理

21. 好物沉歸底，最後一間就係唯一一間有得升嘅。公司第二季收入按年跌2%，因為肺炎打擊咗廣告收人（都佔總收入80%），係公司上市後第一次見到收入倒退

22. 今季分析員原本都唔敢太樂觀，都係估收入按年升6%。因為好多廣告係旅遊相關，亦係今次疫情重災區。但之前已經有人過，Youtube接政治廣告接到手軟，直頭做唔切要拒絶客。結果？收入升夠14%

23. 當中帶動嘅，當然係廣告收入，升10%去到371億。YouTube廣告尤其強勁，收入升32%，第一次超過50億，遠高過預期。同外，Google Cloud 嘅收入亦高過預期，升44%去到344億。美中不足可能係TAC（流量獲得成本）高過預期，升7%去到817億—留意呢度一大部份係去咗蘋果度，換取Safari用Google做預設search engine，而家呢樣嘢又畀人告了

24. 公司仲講話，下季會將Cloud業務獨立拆出嚟匯報收入，營運利潤之類。之前都寫過（https://bityl.co/4Fso），Google業績嘅透明度一向極低，今年開始改善。年頭已經有分開報返Cloud業務嘅收入出嚟，下一季開始會有埋開支呀營運利潤呀之類。

25. 留意公司之前畀司法部起訴，話壟斷市場。股價完全冇影響。今次業績後亦只得佢升，但原因可能只係因為佢係最落後嗰隻。

總結—有幾多公司有咁嘅增長？爆煲？唔似咯。

26. Financial Times 呢個圖相當好，畀你睇到四間公司嘅收入增長趨勢。自己同自己比，蘋果明顯係較差嘅，因為廣告唔關佢事，而iPhone12 又遲咗出世。

27. 如果你睇埋呢個表，就見到科企差不多間間都收入按年雙位數增長—但成個標普500成份股係收入按年跌5%嘅，可想而知科企同其他公司真係兩個世界。如果計純利呢，就按年升30%，而成個標普500指數係跌17%嘅。

28. 即使在近期調整後，都見到科企公司都係企得相對硬。由高位落嚟嘅跌幅係一成幾（Google就5%），仲係比起唔少其他傳統舊經濟股好嘅

29. 至於講泡沫？你估升得多咗就泡沫咩。上面個圖話畀你知，我地離2000/01科網爆煲仲有幾遠？白色係當年嘅估值，EV to Sales，藍色係而家。明顯係低一大截。（EV，Enterprise value，市值加埋債務）。

30. 所以問我呢，而家仲係幾放心買的。唔買科技股可以買乜？照計選完總統就明應有一輪升浪。當然，亦唔係叫你滿手都係科技股，最緊要平衡。我比較睇好Facebook同Amazon，蘋果主力靠硬件始終令我有啲擔心支唔支持到咁高估值。至於Google同Facebook，同樣受惠於廣告，我揀Facebook好啲 ，見到啲廣告真係勒力好強。