人生最難食的一餐 (Patreon)
Content
人生通常會記得最好食嗰餐同埋最難食嗰餐!話說今日Facebook有提醒我兩年前去北極旅行嘅時候特登影低呢幾張相,因為簡直係我人生最難忘嘅一幕!
故事係咁㗎,當年我喺瑞典嘅北極圈小鎮玩咗幾日之後,就買咗火車票穿過挪威邊境,去到挪威一個北極圈邊皮嘅小鎮Narvik ,咁我網上訂咗酒店,喺小鎮嘅海邊!坐左幾個鐘頭火車,到達小鎮火車站嘅時候已經係黃昏大約六點,咁就睇住個地圖,慢慢拖住個行李篋行去酒店,原來都唔係好近,要行成一個鐘頭先到達!但步行期間我就知道自己賴嘢,因為完全唔記得咗當日係星期日,沿途見到所有餐廳同埋所有超級市場士多等等係全部冇開!咁當時我諗冇嘢嘅,咪酒店食囉!好啦點知去到酒店check-in完先發覺連酒店餐廳都唔開,你知道歐洲星期日就係咁嘅狀況,但係我唔記得咗所以我連基本嘅食物都冇買定,咁晚餐我唔可能唔食因為仲要食藥!咁於是乎我就問職員邊度可以買到嘢食,個職員話「那你沿大街,一直行到盡見到個油站隔離就有個油站快餐同便利店㗎!」一路行一路覺得唔對勁,原來就係頭先我由火車站行返嚟同一條路,最終原來嗰間油站快餐同便利店就係喺個火車站對面,頂你個肺又行咗成粒鐘,咁算啦,由於係挪威文,只係認得個雞肉漢堡包個字,由於現場係冇座位就叫咗雞肉漢堡包加薯條返酒店食啦!結果又行返一個鐘頭返酒店先食飯,但惡夢先啱啱開始,我真係未食過一個雞肉漢堡包,嗰塊雞扒嘅質地同味道,真係同一塊紙皮係冇分別!嗰兩塊麵包都係難食到嘔,連啲薯條都好似食緊膠叉咁!但係為咗唔浪費我真係食晒!我知道係歐洲食嘢唔好有太大預期,但係唔係諗住差到咁撚樣囉!喜歡劣食嘅朋友,你哋下次嚟挪威呢個小鎮一定要試吓紙皮雞包!🤪