西九龍交通部行動基地趣事．上 (Patreon)

話說早前我都講過，因為遇到個極度專業失德嘅的士司機，我首先向運輸咨詢委員會進行正式投訴，之後我並要求警方要落案起訴嗰個司機！咁尋日下晝就約見西九龍交通部正式落口供，諗唔到琴日發生咗幾件有趣事！

首先我由尖沙咀搭的士過嚟呢個西九龍交通部行動組基地，一上車又遇到個粉絲，當然大家都好好傾，仲要肯定係黃司機，去到目的地，個司機點都唔肯收錢！搞到我好鬼唔好意思！

咁入到西九龍交通部，搵預約咗嘅M sir準備投訴落口供，一坐低抄低身分證， M上就問我：「做咩職業㗎？」我話做傳媒㗎！之後佢就好興奮咁望住我話：「我早知係你㗎啦！」我起初以為佢係因為認得我係投訴達人，點知原來係另一個好有趣嘅故事！Msir 話20多年前，佢仲係個散仔，當時喺尖沙咀警署報案室工作，佢話當年睇住我入嚟，唔知因為咩事大鬧責難佢同事，佢哋上司之後就出嚟同我解釋同傾偈，M sir話：「你同我上司喺警局裏面傾左兩個鐘，我當時真係好驚，呢個咩人嚟㗎 ？都唔敢出聲！不過就因為你同上司嘅對話，先至了解到成個政府嘅運作，當時真係覺得學到野㗎 ！」呢件事我記得，當年一個尖沙咀巡警，又唔識野又做錯野，仲無啦啦喺條街度凶我！我喺條街捉住個巡警媽叉，佢個師兄即刻捉走呢個人（依家應該係捉走咗我）咁我當晚做完嘢返嚟我話唔得，呢個巡警我一定要投訴到底，我就深夜11點幾直接踩入尖沙咀警署拍枱叫個巡警嘅上司出嚟，坐定定同佢傾左兩個鐘，你咁教啲細做嘢嘅咩？定係啲細嘅從來都唔聽你呀！

諗唔到20幾年後，幫我處理呢單投訴個案嘅M sir 竟然當年就係目擊我大鬧尖沙咀警署嘅警員！