2020「2001太空漫遊」 (Patreon)

前日6月5日晚，一個人着住閃靈件丅恤，匆匆趕到海運戲院，買飛睇「2001太空漫遊」！其實呢套經典嘅電影，我諗我由電視機、DVD、雷射大碟、VCD等等睇咗唔知幾多次！但係都係要入電影院睇返個大銀幕！就當情意結啦！要知道佢上電影院嘅時候我都未出世！而且好多人應該同我理念一樣，當晚八成滿！我買飛嘅時候要坐到最後一排最右邊角落位，我都要睇！但好景不常，對住我前邊嗰位哥哥仔，坐到非常之唔定，喐身喐勢，前前後後，擋住我部份鏡頭！咁當時我就不斷喺度諗：「你阻住我！坐好啲！你阻住我！坐好啲！」睇呢套戲又唔想影響心情鬧人，但我發現好似上次大快活事件嘅心靈感應又出現咗啦， 20分鐘之後，哥哥仔竟然起身離開咗，我開頭以為佢去廁所，但係佢冇再返過嚟啦！開心到我呢！希望唔好係我腦電波影響到佢離開嘅決定啦！😂

Ps好多人同我一樣套戲完咗睇晒所有字幕，再聽晒全段冇字幕嘅交響樂，最最最最後尾出埋個電影公司標誌！先至離開，非常滿足！