白熊出現 (Patreon)

都係放埋喺呢度　！認識我嘅人都知道，因為家庭背景現實生活中我左中右方面，都有朋友；三方面嘅人有時都會搵我幫手，不過有時遇到一啲事都係會令我產生震撼感覺！話說呢兩日不斷喺Facebook講緊某程度上我係聯繫緊在職公務員點樣「對抗」緊而家香港政府暴政，不斷收到公務員自己工作證及memo表達訴求譴責政府及警務處相關失當及漠視民意等等，琴日都鋪過，當有在職警員都肯企喺市民嗰邊譴責政府我已經相當感動，但當琴晚有左派組織人士向我表達相同訴求時，我確實係有少少震驚，而且我所講嘅係核心範圍左派組織！我就大感意外，首先當佢哋問我願唔願意幫佢哋表達po相嘅時候，我當然願意啦！我係幫理不幫親！當我收到佢哋嘅相片，我都有少少考慮，就同佢哋講，不如你打字啦，一陣你老細核對返啲字跡秋後算帳又唔係咁好！過咗一陣，佢哋回覆我:「其實我哋仲係好淆底㗎！都驚冇咗份工㗎！不過當我見到咁多鐵飯碗公務員都肯走上前表達，咁我哋都豁出去啦！」呢一個心理狀況我話俾你聽喺左派組織係一啲一啲一啲都唔容易！在此我向呢幾位係大公文匯集團工作嘅員工表達無限欣賞，亦都繼續鼓勵其他左派組織人士都肯企出嚟，以香港人嘅身份發聲，希望我會收到中聯辦員工嘅正義之聲！加多句，連左派組織嘅人都肯企前一步，嗰啲自稱冇政治聯繫、自稱係香港人嘅冷感派，可唔可以唔好再扮瞓覺呢？！

We connect amazing this time!