社會問題 (Patreon)

其實過去嗰個禮拜我真係忙到七彩！所有政治運動背後都有太多太多太多事需要幫忙！而且絕大部份係唔可以係公開網頁講述，其中有唔少人來自唔同階層嘅人突然間搵我幫手，原來近期有唔少後生仔，因為同屋企反大面、鬧大交（因為政治立場）有啲就離家出走，有啲就比父母趕出屋企，問我有冇辦法？而原來政府有好多青少年服務中心嘅宿舍超過16歲就唔收！首先當然我要提醒幫緊呢班後生仔女嘅中間人千祈唔好帶佢哋去酒店開房瞓啦！首先俾人影到已經好大鑊，若果係個局仲死！咁我就問佢哋點解唔搵社工幫手或者駐校社工幫手呢？原來依家十幾歲嘅後生仔真係一啲都唔相信社工，真心會認為社工會出賣佢哋！我哋嘅政府就係搞到呢班後生仔完全冇信任，當然我就話嘗試搵一啲NGO或者搞開社運嘅社工可唔可以呢？點知中間人都係同我講班細路（其中我哋處理緊一個13歲嘅靚妹）其實係完全唔相信任何社工！咁點算呢？咁我又四出頻撲搵下辦法，都搵到啲社運人士肯收留住班靚仔，但結果班靚仔選擇：有啲搵咗相熟老師屋企瞓住先、有啲寧願瞓連儂牆！依家引伸左好大量社會問題，而我每一日就收到來接五湖四方唔同類型嘅問題，希望我幫手解決！講真啦，我真係冇三頭六臂，其實星期五晚我通宵處理問題都冇瞓過，講真我又唔係政治人物，但大家都知我底唔住頸又會幫手！唉！