英國新聞 內政部制訂新非法移民嘅計劃 以打擊非法移民 21-8-2024 (Patreon)

內政部概述咗應對非法移民嘅計劃，包括部署一百名新情報官員，以打擊人口走私集團。政府相關部門首長哋亦承諾會大幅增加遣返未獲准留英嘅庇護者同其他非法滯留英國人士嘅航班數量。而作為計劃嘅一部分，政府表示將會重新開放位於衡州郡（County of Hampshire）同牛津郡（Oxfordshire）嘅移民拘留中心，新增二百九十個床位。內政大臣顧綺慧（ Yvette Cooper ）表示，佢希望引入一個更易控制嘅系統，以取代長期困擾住系統嘅混亂局面。

保守黨就表示，工黨並冇認真對待打擊人口走私或者阻止小船偷渡嘅問題。影子內政大臣祁湛明（ James Cleverly ）歡迎為國家犯罪局提供更多資源同增加拘留容量，但表示政府嘅計劃唔夠雄心。再加上佢哋取消威嚇措施、實際上對幾千名非法移民提供大赦、以及未能任命邊境指揮部嘅負責人，呢啲舉措只係治標唔治本。

難民慈善機構 Care 4 Calais 嘅負責人史蒂夫 · 史密夫（ Steve Smith ）表示：「阻止偷渡同救命嘅唯一方法係為人提供安全嘅途徑，令佢哋可以喺英國申請庇護 —— 呢個先係新政府應該關注嘅重點。」難民委員會首席執行官恩弗 · 所羅門（ Enver Solomon ）表示，政府應該支持未獲准庇護者喺社區中自願返回，而唔係擴大拘留計劃。佢喺接受 BBC Radio 4《今日》節目採訪時表示，拘留中心對待人哋嘅方式「非常離譜」。佢話︰「如果你尊重佢哋，同埋管理同支持佢哋返嚟，更多人會選擇返國。」

近年，越嚟越多人對透過非法途徑進入英國嘅移民同尋求庇護者表示擔憂，特別係嗰啲乘坐小船橫渡英吉利海峽嘅人。今年到目前為止，已經有超過一萬九千人乘坐小船穿越海峽，比去年增加咗百份之十，但係比起二零二二年同期超過二萬一千人嘅高峰期有所下降。

之前嘅保守黨政府曾經試圖通過盧旺達計劃減少呢個數字，呢項計劃將會將移民遣送到東非國家盧旺達。不過，今年7月上任嘅工黨政府立即廢除咗呢項計劃，稱其為「噱頭」。工黨政府表示，佢哋希望集中精力打擊安排呢啲越境活動嘅犯罪團夥，並加快遣返嗰啲冇合法居留權嘅人嘅進程。政府現已宣布，將部署100名新嘅專業情報官員同調查員去國家犯罪局（ NCA ），以「打擊並摧毀犯罪走私團夥，防止危險嘅小船越境」。呢啲官員將會喺英國同歐洲各地工作，其中一啲將會進行臥底行動，另一啲則專注於打擊充氣船同設備嘅供應鏈。目前， NCA 正進行約70項針對人口走私同販賣團夥嘅調查。

政府亦表示，將會重新部署員工處理遣返未獲准庇護者嘅工作，並增加對非法僱用工人嘅僱主嘅制裁同懲罰。政府宣布嘅其他措施包括增加拘留中心嘅容量，通過重新開放位於衡州郡同牛津郡嘅Campsfield 同 Haslar 拘留中心。

位於樸茨茅夫附近嘅 Haslar 中心喺二零一五年關閉，當時嘅一份報告將佢描述為昂貴而且對被拘留者有害嘅措施。通過呢啲措施，政府希望喺接下來嘅六個月內達到自二零一八年以來「最高嘅遣返率」。

被遣返出英國嘅人數由二零一三年超過四萬六千嘅高峰降至二零二二年嘅約一萬四千人。由於新冠疫情，呢一個數字喺二零二零年急劇下降到八千三百人，但係近年略有回升。

內政部部長塞瑪·馬特拉表示，喺過去六個星期內，已經有九架「遣返」航班起飛，其中一架航班載有超過200人。今年7月初，內政大臣顧綺慧宣布，佢將會招聘一名負責領導英國邊境安全指揮部嘅人，整合情報機構、警方、移民執法部門同邊境部隊嘅工作。政府表示，呢一個任命將會喺幾個星期內完成，但新指揮部嘅領導人仲未被任命。

作為減少非法移民嘅其他措施之一，首相施紀賢爵士承諾提供八千四百萬英鎊，用於非洲同中東嘅項目，以從「源頭」阻止非法移民。政府表示，呢筆資金將會用於教育、就業機會同人道主義援助，幫助解決導致人哋離開家園嘅根本原因。