英國新聞 遊艇沉沒事件 更多有關死者廚師消息傳出 21-8-2024 (Patreon)

一具喺西西里海岸附近嘅豪華遊艇沉沒後發現嘅屍體，被當局認為係廚師利卡度 · 湯馬斯 Recaldo Thomas，佢擁有加拿大同安提瓜和巴布達國籍，係星期一喺暴風雨中沉沒嘅「 Bayesian 」號遊艇上二十二名乘客之一。佢嘅朋友加雷斯 · 威廉姆斯形容佢係一位受人喜愛而且善良嘅人，擁有世界上最深沉、最迷人嘅聲音，仲有一個可以點亮成個房間嘅笑容。

潛水員喺搜索包括英國科技企業家米克 · 林奇（ Mike Lynch ）同摩根士丹利國際銀行董事長莊拿芬 · 布魯馬（ Jonathan Bloomer ）在內嘅六名失蹤乘客嗰陣，正努力進入沉沒船隻嘅艙房。

英國調查人員喺星期二抵達意大利，評估豪華遊艇喺極端天氣中所遭遇嘅情況。「 Bayesian 」號於星期一清晨喺西西里島首都巴勒莫以東嘅 Porticello 附近約700米處翻沉，船上22人中有15人人生還，當中包括一名來自英國嘅母親，佢描述咗點樣喺海面上將佢嘅女嬰高舉過水面，以防止佢溺水。

到目前為止，只係發現咗一具屍體，亦即係利卡度 · 湯馬斯嘅遺體。佢朋友威廉姆斯先生表示，佢同呢位廚師認識已經有30年，因為佢哋喺安提瓜一齊長大，湯馬斯喺遊艇淡季時會住喺嗰度。佢前幾日仲話威廉姆斯知，佢需要再工作兩個季節嚟修繕已故父母嘅屋。佢熱愛遊艇生活，但佢已經好攰。

而另一位朋友伊萊 · 富勒表示，佢喺25年前首次同呢位廚師相識，並認為佢係年輕人嘅榜樣。佢話湯馬斯嘅個性喺佢嘅工作中非常重要。世界上最富有嘅人都希望同社交能力強嘅人相處，所以佢好受歡迎。

據信，「 Bayesian 」號係被海上嘅龍捲風 —— 亦稱為水龍捲 —— 襲擊，導致船隻翻覆並沉入海底。有報導稱，船隻嘅桅杆斷裂，另外有因素包括水通過可能因為高溫而打開嘅艙口進入船內。

意大利海岸警衛隊喺星期二下午表示，佢哋嘅搜救工作仍然繼續，潛水員正研究點樣安全噉進入殘骸。早啲時候，潛水隊成員馬可 · 蒂洛塔表示，進入沉船困難重重，因為「 Bayesian 」號嘅船體喺海床上傾斜咗90度。佢話畀路透社知，通往艙房嘅狹窄樓梯上面有「大量物品」阻礙進入。「我哋唔會停低。」佢補充道。 「我哋有資源、人力同設備。我哋嘅目標係搵到所有失蹤嘅人，呢個就係我哋嘅工作。」

潛水員每次只可以喺水下停留大約12分鐘，呢個意味住佢哋到達殘骸之後，只有大約10分鐘嘅時間進行搜索。除咗多支潛水隊伍之外，海岸警衛隊表示，佢哋仲有五艘巡邏船、至少兩架直升機同一個遙控水下作業器。來自羅馬同撒丁島嘅專業潛水員亦都已經被派嚟，呢啲潛水員受過喺狹小空間內操作嘅專門訓練。

呢艘長達56米、懸掛英國國旗嘅帆船喺沉沒時載有10名船員同12名乘客。

失蹤者中包括米克 · 林奇及其18歲嘅女兒漢娜，以及莊拿芬 · 布魯馬同佢嘅妻子朱迪。美國珠寶設計師內達 · 莫維洛及其丈夫Clifford Chance 嘅律師基斯 · 莫維洛亦喺失蹤者之列。呢個消息已經由佢所屬嘅律師事務所 Clifford Chance 確認。

米克 · 林奇喺今年6月被判無罪，案件涉及佢喺二零一一年以一百一十億美元將佢嘅公司 Autonomy 出售畀美國計算機巨頭惠普嘅多項欺詐指控。

其中一名生還者嘅親屬表示，曾經代表林奇先生處理法律事務嘅律師基斯 · 莫維洛同 曾經喺訴訟中作為辯護證人莊拿芬 · 布魯馬先生都被邀請登上「 Bayesian 」號慶祝。另外，Clifford Chance 嘅高級律師艾拉 · 羅納德及其丈夫係從遊艇沉沒中獲救嘅人之一。

此外，周二確認嘅另一則消息係，林奇先生嘅共同被告史蒂芬 · 張伯倫（52歲）喺周六喺劍橋郡跑步時被車撞身亡。佢嘅家人描述佢係一位「深受愛戴嘅丈夫、父親、兒子、兄弟同朋友」。