英國新聞 紹斯波特襲擊事件示威 新特蘭市爆發騷亂 2-8-2024 (Patreon)

紹斯波特（Southport）持刀襲擊殺人事件所引起嘅示威活動持續，喺新特蘭，示威者同警方發生衝突，一座警察局旁邊甚至係有人縱火。另外，響較早嘅時候，有示威者向一座清真寺外面穿着防暴裝備嘅警察投擲啤酒罐同石頭，並且發生咗其他騷亂，示威者同警方之間爆發衝突。騎警到場將部分戴住面具嘅示威者從聖馬克路嘅清真寺驅逐。警方仲遭到啤酒桶嘅攻擊，示威人群中有部分成員高呼支持極右翼活動家湯米 · 羅賓遜 (Tommy Robinson) 嘅口號，另外更有人直接叫種族歧視嘅辱罵性字眼。新特蘭市中心嘅私家車亦成為示威人士嘅目標，其中有一架私家車被推翻兼且著埋火。位於新特蘭嘅 Omniplex 電影院亦喺當晚被迫關閉，以保障公眾同員工嘅安全。

諾森布里亞 (Northumbria) 警察表示，佢哋出動嘅警員遭受到「嚴重嘅暴力」，佢哋呼籲公眾避免前往有示威發生嘅地區。泰恩 -威爾( Tyne and Wear) 消防救援服務表示，佢哋正喺新特蘭中央警察局嘅火災現場救火。呢次騷亂係緊接住星期三晚喺哈特爾浦 （Hartlepool） 嘅騷亂之後發生，克里夫蘭警方表示，呢個示威同星期一喺馬西賽特紹斯波特持刀襲擊殺人事件嘅抗議活動有關。

東北市長金 · 麥吉尼斯 (Kim McGuinness) 表示，佢對新特蘭發生嘅場景感到「震驚」。佢話︰「毫無疑問，如果你對悲劇嘅回應係利用果宗悲劇嚟進行暴力虐待他人、襲擊警察同破壞財產嘅行為，咁你只係做緊一啲暴徒行為，你唔可以代表新特蘭，你唔可以代表呢個地區。」

大約200名反種族主義抗議者亦聚集喺利物浦嘅阿卜杜拉 · 奎利亞姆清真寺外，因為有傳聞話極右翼份子會到果度抗議。佢哋響現場高呼︰「我哋要大聲講出嚟：我哋非常歡迎難民！」公共檢察署署長斯蒂芬 · 帕金遜表示，已經調集咗額外嘅幾十名嘅檢察官，佢哋會喺呢個週末全天候工作，支持警方，並準備立即做出起訴決定，以便迅速伸張正義。