英國新聞 紹斯波特襲擊事件餘波未了 未來數天可能會爆全英示威 2-8-2024 (Patreon)

紹斯波特（Southport）持刀襲擊事件繼續發酵，喺未來幾日內乎有更多示威活動出現。呢啲示威活動係針對今個星期一喺紹斯波特發生嘅持刀殺人事件，其中三名年幼女童遇害，另外仲有八名兒童同兩名成人受傷。喺社交媒體上面，流傳咗好多呼籲全英國各個城市示威嘅社交媒體貼文，當中甚至包括針對一座清真寺嘅活動。好多貼文上面都留言話「我哋受夠」、「救救我哋嘅下一代」或者「停止非法移民船隻」等等嘅短句。而根據 PA 新聞社報導，至少有15場示威喺網上落廣告宣傳。

另外，有七名男子因為喺哈特爾浦 (Hartlepool ) 同警方嘅衝突中因為暴力襲擊行為而被捕。仲有一名11歲男童因為喺事件中縱火燒毀一架警車而被捕。

早前嘅示威活動曾經演變成暴力事件，導致警察受傷同財物損壞。政府譴責咗呢啲暴力行為，並重申和平抗議嘅重要性。首相施紀賢將會同高級警官會面，討論持續嘅不安局勢，並表示政府支持警方維護公共秩序。

馬西賽德郡警方亦表示，佢哋已經「充分準備好」應對當地可能發生嘅進一步示威活動。助理警察局長珍妮 · 西姆斯（ Jenny Sims ）話：「我哋已經注意到關於馬西賽德未來示威活動嘅網上宣傳，希望大家放心，我哋已經充分準備好應對任何企圖造成混亂嘅人。我想明確表態：任何企圖對我哋社區造成損害嘅人都會被我哋嚴厲對待，喺接下來嘅幾日，我哋有廣泛嘅計劃同大量嘅資源，可以迅速處理任何企圖造成混亂嘅人。我哋會尋求將每一個被確定犯有刑事損害同暴力行為嘅人繩之以法，無論係對警察工作人員、警官定係我哋嘅社區。」

警司東尼 · 羅拔士（ Tony Roberts ）話，馬西賽德郡警察已經喺星期二晚上紹斯波特嘅騷亂中逮捕咗七人，未來幾個星期仲會有更多逮捕行動。佢話：「我哋繼續探索所有調查線索，包括一個專業團隊，目前正喺度審查幾百個鐘嘅影片同相片，以確定每個參與者嘅身份。」