英國新聞 女子帶狗散步時遇襲身亡 沙福郡警方以謀殺案調查 29-7-2024 (Patreon)

57歲嘅安妮達 · 露絲（ Anita Rose ）喺星期三朝早大約六點二十五分喺布蘭咸（ Brantham ）附近嘅長老巷（ Rectory Lane ）嘅一條小徑上被一名路人發現昏迷不醒、頭部受傷，隨後佢被送往劍橋嘅阿登布魯克醫院（ Addenbrooke ' s Hospital ）接受治療，但係延至星期日朝早不幸死亡。

露絲女士喺清晨5點左右離開屋企，帶住佢嘅史賓格犬布魯斯（ Bruce ）去散步。佢嘅家人喺一份聲明中對佢表示悼念，話：「我哋嘅媽媽喺社區中非常出名並且受到好多社區朋友愛戴。佢從我哋身邊好殘忍咁被奪走咗生命，令我哋失去咗同佢相處嘅寶貴時光。佢唔單止係六個小朋友嘅媽媽，亦都係13個小朋友嘅嫲嫲、好太太、好奶奶同好多人嘅特別朋友。我相信一定有人知道就案件有線索可以提供，我哋懇請佢哋企出嚟話比我哋知。「我哋想感謝大家嘅愛同支持。我哋而家唯一嘅請求係大家珍惜同家人同所愛之人相處嘅時光。」

沙福郡警方表示，來自葉士域治地區嘅一名45歲男子喺星期六因為涉嫌企圖謀殺被捕。露絲女士死亡後， 佢因為涉嫌謀殺再次被捕。同樣來自葉士域治地區嘅一名37歲女子亦喺星期六因為涉嫌處理同呢件事相關嘅贓物被捕。兩名疑犯隨後喺有條件嘅情況下獲得警方保釋，並需要喺十月二十五號返警局報到。

警方表示，警員已經搵到並回收咗一部唔見咗嘅蘋果 iPhone ，但露絲女士喺遇襲前所著嘅粉紅色拉鍊外套仍未搵得返。偵緝總警司米克 · 布朗（ Mike Brown ）表示：「呢單係一個非常嚴重嘅事件，安妮達因為傷勢嚴重不幸去世。警方特別訓練嘅警員正繼續支持佢嘅家人，呢個亦係調查嘅一部分。我哋而仲繼續調查緊，以搵出\呢件案嘅全部情況係點，同時亦都調查緊死者嘅死因。」