體育新聞 英國隊奧運首日已奪兩面獎牌 屬44年來首次 27-7-2024 (Patreon)

英國隊喺奧運會開幕日首次贏得兩枚獎牌，呢個係44年來嘅第一次。

跳水運動員亞絲明 ·哈珀 (Yasmin Harper) 同斯卡莉特 · 繆 · 詹森(Scarlett Mew Jensen) 喺今朝嘅女子雙人3米跳板決賽中贏得銅牌，隨後自行車運動員安娜 · 軒達臣 (Anna Henderson) 喺女子單車公路賽計時賽中獲得銀牌。

喺非獎牌賽事中，英國嘅亞當 · 佩蒂 (Adam Peaty) 同詹姆斯 · 威爾比 (James Wilby) 進入咗男子100米蛙泳半決賽，而基安娜 · 麥金尼斯則進入咗女子100米蝶泳半決賽。

亞當 · 伯吉斯 (Adam Burgess) 喺男子單人皮艇賽中以第二名嘅成績晉級星期一嘅半決賽；英國男子曲棍球隊喺 A 組賽中以4-0輕鬆戰勝西班牙，而且英國隊亦晉級咗男子體操團體決賽。

雖然英國嘅勞拉 · 科列特 (Laura Collett ) 喺馬術三項賽中嘅盛裝舞步比賽中以領先成績創造咗新嘅奧運紀錄，但莊殊 · 塔林 (Josh Tarling) 喺男子單車個人計時賽中因為輪胎爆胎而最終只係獲得第四名，令人遺憾。

講返單車運動員安娜 · 軒達臣喺女子個人計時賽中贏得銀牌嘅情況。佢落後澳洲金牌得主格蕾絲 · 布朗近1分32秒，以唔夠半秒嘅優勢擊敗咗美國嘅克洛伊 · 戴格特，後者獲得銅牌。安娜表示：「我簡直唔敢相信。我隱隱覺得今日有可能登上領獎台，擠走其他一啲選手，但我唔相信自己竟然排喺好似格蕾絲咁勁嘅選手後面，獲得咗第二名當我知道自己係第二名嗰陣，我激動到喊咗出嚟。我而家笑到停唔到。」

而亞絲明同斯卡莉特 · 喺女子雙人3米跳板比賽中贏得銅牌後都有感言。亞絲明話：「瘋狂，真係瘋狂。我諗我而家仲未完全相信呢個係真嘅。我為斯卡莉特感到非常自豪，為我自己感到非常自豪，為我哋嘅團隊感到非常自豪。我哋付出咗巨大嘅努力，結果再好唔過。我哋知道即使我哋表現得好好，我哋仍然處於劣勢。我哋知道澳洲需要失誤(我哋先有機會拎獎牌)，所以當呢一切真係發生嗰陣，我哋非常非常震驚，因為對佢哋嚟講嗰個係一個非常簡單嘅動作。佢哋非常有天賦，非常有經驗，本身亦係奧運獎牌得主。所以最後一跳時嘅失誤非常令人震驚。但我哋知道我哋需要喺最後時刻發揮出色。」

斯卡莉特同樣興奮地描述咗佢哋見到澳洲失誤時嘅感受：「我哋知道競爭會非常激烈。見到佢哋喺最後一輪未能表現出色嘅時候 —— 我諗我當時就知道噉樣唔夠好。我認為喺跳水比賽中，你大致可以判斷出分數會喺邊度。所以對我哋嚟講，我諗我哋知道，但同時你仍然會等計分板彈出嚟，睇下我哋係咪真係做到咗。」