英國新聞 對病人參照自己意見停用胰島素視若無睹 拍打治療師誤殺罪名成立 27-7-2024 (Patreon)

現年61歲、居住喺加利福尼亞州 Cloudbreak 嘅蕭宏祺，因為喺二零一六年令到71歲嘅丹妮爾 · 卡爾 - 戈姆（ Danielle Carr-Gomm ）糖尿病併發症去世而被定罪。溫徹斯特 (Winchester) 刑事法庭審理案件時披露，蕭宏祺因為響渭州郡 (Wiltshire) 宣傳拍打療法係治療糖尿病嘅「偏方」，令到丹妮爾聽取佢嘅意見，喺一次由蕭宏祺帶領嘅靜修中停止咗使用胰島素，最後因為併發症死亡，經過19小時30分鐘嘅審議後，陪審團喺星期五以11比1嘅多數裁定蕭宏祺誤殺罪罪名成立。

來自東修適士郡路易斯嘅丹妮爾女士患有甲型糖尿病，呢個意味住佢每日都要注射胰島素嚟控制血糖水平。然而，佢因為驚打針，所以經常尋求其他方法嚟應對自己嘅病。佢喺2016年7月首次參加咗蕭宏祺喺保加利亞舉辦嘅拍打拉筋工作坊。拍打拉筋係一種拍打同拉伸嘅療法，通過拍打自己或者其他人以排出體內毒素。法庭上證供顯示，丹妮爾女士認為呢種療法有效，並且越嚟越熱衷呢種治療法。2016年10月，佢決定參加蕭宏祺喺渭州郡辛德嘅克里夫豪斯舉辦嘅另一個工作坊。

檢察官表示，丹妮爾 喺工作坊嘅第一日宣布佢已經停止使用胰島素，蕭宏祺對此表示「祝賀」。同其他參加者一樣，佢開始禁食，但好快病情嚴重，喺第三日感到「疲倦」、「虛弱」，並「痛苦地嚎叫」。到咗第四日，丹妮爾就因為糖尿病酮症酸中毒而去世。

對蕭宏祺嘅法庭案件主要係佢係咪對丹妮爾負有照顧義務以及佢係咪可以合理預見佢嘅死亡。喺為自己辯護時，蕭宏祺表示佢唔係渭州郡工作坊嘅組織者，而係受邀並收取費用嚟主持該工作坊。呢位前銀行家仲多次喺法庭上強調，佢唔係醫生，冇醫學培訓，亦唔提供醫療服務。佢描述拍打拉筋係一種佢教畀人嘅自我療愈方法，並多次表示佢絕對唔會話畀人知突然停止服藥。

但控方認為，丹妮爾女士對蕭宏祺嘅高度尊重意味住蕭宏祺處於對丹妮爾女士嘅護理具有領導同控制嘅地位，並且對佢負有未能履行照顧丹妮爾女士嘅責任。另一個定罪嘅關鍵係蕭宏祺以前對喺佢嘅工作坊中停止使用胰島素嘅糖尿病患者嘅經驗。

丹妮爾女士曾經喺二零一六年保加利亞嘅會議上停止服用佢嘅藥物。嗰次佢開始嘔吐，但蕭宏祺成功說服佢重新開始使用胰島素，並令佢恢復健康。此外，法庭仲聽取到證供，顯示二零一五年，一名六歲男仔喺悉尼蕭宏祺工作坊中因為佢嘅父母停止畀佢使用胰島素而死亡，蕭宏祺因此喺澳洲入獄，並被禁止提供任何醫療服務。

法官指出，喺嗰次案件中，蕭宏祺曾經說服男仔嘅父母唔好畀佢服用藥物，但蕭宏祺對此提出異議。溫徹斯特嘅檢察官辯稱，呢個意味住佢應該意識到唔服用胰島素嘅危險後果。渭州郡警方話畀 BBC 新聞知，呢件案因為蕭宏祺喺澳洲嘅監禁以及證人分佈喺世界各地而異常複雜。偵緝總督察菲爾表示：「佢對自己所實踐嘅嘢深信不疑⋯⋯但佢從之前嘅經驗同特別係對丹妮爾女士嘅了解中知道唔使用胰島素嘅危險性。從佢哋之前喺保加利亞嘅工作坊會面中，佢知道其影響同效果，但當佢喺渭州郡病發時，佢仍然選擇唔採取任何行動。」

丹妮爾女士嘅仔馬修話畀BBC 新聞知，撇開糖尿病問題，佢嘅母親係一位「非常健康嘅女性」，仲有「好多年嘅生命」。佢話：我母親參加工作坊嘅原因係佢想活下去，如果佢知道有風險，相信佢唔會參加呢個工作坊。

蕭宏祺已經被還押候審，將於10月1日宣判。

喺裁決後，皇家檢察署特別犯罪部負責人羅斯瑪麗 · 艾因斯利話：「蕭宏祺知道丹妮爾 · 卡爾 - 戈姆停止使用胰島素嘅決定可能係致命嘅，佢以前見過呢種情況。 蕭宏祺係負責人，但佢未能對丹妮爾女士不斷惡化嘅情況作出反應，導致咗悲劇嘅發生。佢未能採取合理步驟幫助丹妮爾女士，呢個大大促成咗佢嘅死亡，構成咗嚴重疏忽。」

渭州郡警方偵緝總督察菲爾話：「蕭嘅無罪辯護只係顯示咗佢對丹妮爾嘅死毫無悔意，並且令本已極其困難同令人沮喪嘅過程對丹妮爾嘅家人嚟講更加漫長同痛苦。「丹妮爾係一位享受生活而且熱愛旅行嘅母親同祖母，佢嘅死亡對佢嘅家人同朋友嚟講係巨大嘅震驚，我哋嘅心同佢哋同在。」