巴士在公路時露出✨ 醫美更新🤍 被sell 16萬療程？😅 我的處理手法😏 (Patreon)

呢一輯相今日將會喺不同Tier更新🤍

話說上次第一次做完醫美之後，我隔幾日（11月尾）就開始啟用我嘅package，再去做其他療程，但嗰啲療程都係日常保養為主，唔係一次就有之前咁嘅明顯大效果，所以當時冇即刻分享。

當日我做咗三個療程

1. Hydrafacial

即係深層清潔，表面去角質，再用部機吸走毛孔污糟嘢，然後注入精華，之後會有一支污糟水出咗嚟。喺做呢個療程之前，我已經聽過好多年😂 我本來以為淨係會有吸啜嘅感覺，但做落……原來真係會痛痛地🤪 佢有個螺旋槳咁嘅頭，不斷打磨你嘅表皮，我覺得自己好似一架車😆 不過！做完之後，啲皮膚又真係即刻滑捋捋，而且白咗，成塊面都感覺嫩嫩的😆 但由於我皮膚本身都唔差，所以我唔覺得有驚天地泣鬼神嘅大分別，但係細緻度、質感，的確有稍微變好！我都決定將呢個treatment，納入恆常保養之中，可能1-2個月都去做一次😁

當日嘅污糟水😆 美容師話本身嘅solution係藍色好清嘅，吸完我塊面之後就變成咁啦😆 我覺得沒有好誇張，始終我從來冇做過呢種深層清潔facial，而且當日做之前，臉上嘅妝都未必卸得好乾淨，可能混合咗啲入去😆

2. Laser

話說我塊面其實係有少少班，但係非常淺層同淺色，都怪我之前咁多年唔識得搽防曬！🥲 我覺得真係要防止佢哋再變深色、越生越多，所以我就第一次試打斑💖

做嘅時候，治療師用唔同嘅頭、唔同嘅能量，去處理唔同嘅部位。我全塊面都有做，而且仲做埋兩隻手臂😆 雖然手臂其實冇人care，但我自己其實都想處理好耐㗎喇，我覺得身體肌膚狀態都好影響個人整體氣質😂

感覺方面，其實我覺得係幾痛嘅😆 尤其是用大能量嘅時候，或者做眼四圍嘅位置，我直頭係控制唔到標眼水😅 一路做，仲要聞到有浸燒豬肉味😂 係我表層嗰啲毛毛燶咗😂

呢啲療程唔會一次見效，起碼要做幾次。不過我唔知係心理作用，定係之後嗰啲冷凍舒緩有發揮效果，做完我覺得真係即刻再白咗，而且毛孔的確係收細左😆 而家已經過咗差唔多一個月，我就咁眼望啲斑，都未覺得有明顯減淡😂 我真係要做多幾次，先可以同大家更有效更詳細分享😂

3.水光肌

呢個係一個深層精華導入嘅療程❄️ 治療師話，淨係嗰支精華單買都$400😂 咁我唔理佢幾錢啦，反正都係marketing吹出嚟😆 最緊要係有效😆

呢個療程做嘅時候都真係好舒服，精華本身有一浸好清香嘅味道，做完之後成塊面香噴噴咗幾日，但係唔係好難頂好煩嘅味，所以感覺係幾refreshing✨

效果方面，做完都真係即刻幾潤嘅😂 我本身都有少少介意眼紋等等嘅問題，我眼底同埋全塊面都比較乾，深層精華導入保濕應該會有幫助🤍 都係嗰句啦，呢啲係長期保養，要做多幾次先可能會有肉眼可見嘅效果，同埋隨着年紀增長，可能唔變差已經係好好😆 所以呢個都係要遲啲再update嘅😆🫶🏼

當日我就淨係做咗呢三個療程，做完之後因為約咗阿媽去酒店食飯，所以我有即刻化妝😽 化妝果下我係呆咗嘅🙀 因為皮膚真係立刻變得好好😹 非常非常之上妝，好貼😹 搞到我唔習慣化妝品用量，用返平時咁嘅手勢，化咗一個濃好多嘅出嚟😹 我都一邊嚇親、一邊喜出望外🫶🏼😂

以上呢三個療程，我都會納入常規保養之中😆💖

化完個妝出返去，sales就開始同我傾啦😂

我都知美容院係點樣運作，唔介意佢sell，始終佢哋都係做生意賺錢😂 我未試過去其他美容院，不過都聽過啲好恐怖嘅hard sell手法，例如脫毛嘅時候，你光脫脫露出下體，佢哋就喺度Sell你療程要你交錢，同打劫冇分別😅

但呢間我暫時嘅經驗係還好嘅🤓 或者可能我氣場勁/個人飽歷風霜，真係冇咁易俾人勒索，而人哋都未必敢蝦我😂 臨入去做嗰三個療程之前，銷售員已經同我講叫我考慮某一個plan，我都唔記得咗係咩，類似充值多4萬，令我整體投入金額去到10萬之類啦😂

出到嚟之後，我就明確表明暫時唔想再放多啲錢喺度。原因好簡單，首先我唔想洗咁多錢，尤其是係短期內。另外，我都仲想試吓呢間店嘅服務、各個療程如何，先睇吓會唔會投資更多😂 而且，我真係冇擺咁多現金喺香港，上次簽卡，已經係要分開簽😂 我仲開咗自己香港銀行戶口俾銷售員睇，真係得返幾千蚊😂 我話，如果我要再買plan，我係要籌款😂

之後銷售員提出另一個方案：充值多$2萬，令我整體買咗$8萬，然後佢會再額外送多$8萬療程（我認為好cls😂 cls地抵😂）即係話，我俾咗$8萬，總共係可以享用價值 $16萬嘅療程😂 對比起我本來嘅方案（$6萬，有100格+$2萬療程），講緊係抵咗成倍以上😂 我唔識計數，但係一睇就知覺得好抵😂

不過，雖然我唔係好識計數，但係我比較貪錢😂 唔會咁容易俾啲錢流出我嘅手掌😂 冇錯，呢個方案係好抵，但始終都係要我立刻再俾錢出嚟😂 我並唔想咁做😂 而且，雖然呢間店口碑都唔錯，但假如佢執笠呢？😂 咁我咪血本無歸☺️

不過，我心中係有認真考慮嘅，因為真係覺得好抵😂 銷售員話，因為我當日先係開始用我嘅package，先可以有呢個咁優惠嘅offer，如果佢今日記錄左我開始使用療程，就會冇咗呢個優惠😅 我唔排除可能係真嘅，但更大嘅可能性係，佢想用呢一個理由去push我，捉住我驚蝕底/蘇州過後冇艇搭嘅心態，希望我可以即刻買多啲package😂

我同銷售員講，我而家要同阿媽食飯，唔同你講住😂 然後我主動出擊，同佢講，我都覺得好抵，但係我需要考慮吓先，你幫幫手暫時唔好寫我今日嚟咗開始做療程，拖一日先，我聽日再覆你，可唔可以仲有呢個優惠😂 銷售員就話可以😂 跟住叫我asap覆😆 其實佢全程態度都係好好嘅，亦都沒有好強硬嘅姿態或者強迫，我覺得佢只係做佢需要做嘅工作，而且條界線都算係拿捏得恰到好處，有Push但都沒有夾硬，所以我接受😂

食飯嘅時候我同阿媽傾，做多我30年人嘅阿媽話，唔好以為呢啲offer真係限時😂 其實銷售員為咗簽得成單，係乜都會講得出😂 如果之後我想再加買package，肯定會有更多其他優惠，唔需要急於而家入錢。幾時都好，放太多錢入去呢啲嘢，都係唔太有保障🔥

聽完之後，我覺得真係好有道理😂 雖然再買真係好抵，但我暫時真係未有呢個必要，而且之後肯定仲有機會用其他優惠，因為都係佢哋吹出來😂 於是，我第二日就好有禮貌咁send咗個WhatsApp去拒絕咗😉 然後銷售員都好有禮貌咁樣回覆☺️

我將呢個經歷分享咗俾朋友，佢哋都覺得好抵😂 同時，佢哋都有話，如果係咁買package將會係無底深潭🙂 我唔認同😂 個無底深潭，唔係在於不斷有package offer 俾你/sell你，而係在於你自己守唔守得住😆 你一日頭腦清晰、點都唔肯買，個無底深潭係唔會存在🤍