如何賺到1000+萬？被動收入？家族生意？投資？奢侈品？ (Patreon)

圖片就放之前被移除嘅IG放過嘅相吧😆

話說呢一兩個月，我喺IG有透露下自己嘅財政狀況，之後好多人都好奇，點樣可以搵到咁多錢？

我覺得，以我嘅年紀嚟講，我身家係唔少嘅，但唔係天文數字。我部份同我差唔多年紀嘅朋友，可能因為圈子關係，唔少都係做專業人士、政府、銀行、生意，其實收入都係同我不相伯仲。但近日同唔少朋友傾呢個話題，我發現即使假設有人同我收入不相伯仲，但係五年後，可能佢嘅資產都係會少過我好多，就係因為理財、消費觀念唔同。

我嘅理財觀念分為三個部份：

1. 賺錢

2. 建立安全網

3. 增值

1. 賺錢

賺得越多錢，你就有越多錢😂 呢句並唔係廢話，大家唔好unsubscribe 住😂🙏🏻 同唔少人傾偈嘅時候，我發現好多人將心思放咗喺「儲錢」而唔係「賺錢」。大部份打工仔，一方面唔滿意自己收入，但另一方面，我發現佢哋好少會將精力放喺增值自己提升競爭力、建立side business、不斷尋找人工更高嘅工作或崗位，等等可以增加收入嘅方法。而係專注於假設自己人工永遠停滯或隨年月輕微加幅嘅情況下，點樣去分配呢筆有限嘅錢，心態爭好遠。

當然你會話，講就易，一路返工，放工好攰仲點樣增值自己？創業如果失敗點算，冇靈感有冇時間可以點？諗跳槽，有好多人事問題，又要轉環境，壓力好大？係㗎，覺得難嘅，你就唯有停滯不前😅 唔想付出，唔想犧牲，就唯有停留原地，唔好有咁大想頭啦。

2. 建立安全網

如果你做小生意開始有起色，月入10、15、20、30萬，你會攞啲錢做乜嘢？

尋日我上咗一個節目做嘉賓，同場另一位嘉賓話佢雖然搵唔少，月入7/8萬，但完全儲唔到錢。原因係佢唔開心就會去名店shopping，又鍾意攞啲錢去高消費消遣，有時候一日都可以洗到五位數。

當其他主持討論我「有錢」嘅時候，其實有冇諗過我只係將啲錢慢慢咁樣鋪好、應使則使？如果我好似其他人或者嗰位嘉賓咁樣，一有少少錢就burn走，我而家都唔會累積到呢個數。

曾經我係住過工廈劏房，嗰時可能好多人都覺得我唔掂。但其實當時我月入係超過六位數🤔 月入六位數租幾千蚊嘅劏房，聽落可能好多人覺得難以置信。但我睇收入，並唔係睇當刻，而係睇整個建構。當年我仲未大學畢業，我冇資產、沒有足夠現金流、沒有多餘嘅錢俾我去作有意義嘅投資。就算keep住月入都係咁多，我認為都係窮，所以冇資格喺住屋上花咁多錢，只要達到一啲基本功能（私人空間、工作地點）就可以了。因為有冇錢唔係睇月入，而係睇你有冇成功建立安全網，建立中的話，去到邊個階段。

所謂嘅安全網，我會分幾個階段。最底層係花費比較大嘅基本生活資產，最重要嘅係住屋，然後就係有價值嘅醫療保險。再上一層，係基本生活開支例如食物、交通（衣係奢侈品、住喺之前嗰層）。

我認為，喺未買到樓、未完全肯定可以供完樓之前，基本生活開支，只能夠有咁低得咁低，維持生活就夠 😂 什麼奢侈品、Fine Dining、豪華旅行，呢個時候都係冇資格去做嘅。所以就算我月入超過六位數，但之前我未有足夠錢供完層樓，我都係從來未買過一個貴d嘅包包。但我發現，好多人係即使月入20萬，佢可能就會一個月買吓錶，一個月買吓袋，買下名牌，跟住又心思思養架靚車，未建立好安全網之前就過得比較奢侈，於是根本冇乜錢剩，基本上將啲錢掉晒去一啲保障唔到生活嘅物品上，最後又唔係換來啲乜嘢。

當然，買樓只係我覺得嘅最大基本生活保障，其他人可能唔認同要買樓，認為有其他更重要嘅基本保障。呢個只係一個框架，內容可以按照個人需要調整。

3. 增值

其實呢個都係建立安全網嘅一部份，不過太重要所以要分開嚟講😂 我認為，基本程度嘅富裕，係喺第一層滿足後，你可以靠錢滾錢，至少維持到你嘅基本生活開支。喺做到呢樣嘢之前，都唔應該滿足，都唔應該大使，應該要以此為目標。達到之後，就要不斷諗增加更多嘅被動收入。

之前好多人傳我買樓full pay，其實並沒有😤 不過其實經過幾年之後，我係夠錢去full pay，但我唔會咁做，因為以我嘅財政水平嚟講咁做係好愚蠢🤓 樓按嘅利息唔高，攞住筆現金求其做一個低風險投資例如定期，利息都會高過佢。如果有多餘錢，一定係用來滾錢，唔係用嚟洗，唔係用嚟放入層樓滿足自己心理。

假設定期利息5% 而你有500萬現金。如果你還晒落層樓就等於冇咗，但你只需要做一個咁低風險嘅投資，每個月都可以收返2萬，扣埋供樓利息仲有賺。所以其實我唔係好明點解啲人成日吹奏full pay？根本對唔係好有錢嘅普羅大眾，係唔明智嘅做法。

除咗低風險嘅定期。我都會買下股票、每個月買金等等。不過買股票真係唔包保賺，其實我都蝕唔少嘅，怪就怪自己功課做唔足啦！不過都要教吓學費嘅😂 買金反而我幾喜歡，至少可以保值，我五六年前已經開始幾個月就買一買，同樣嘅首飾，而家價值都已經有提高。

—————————

其實我家族都出咗一兩戶成功生意人，即係嗰種屋企有幾幢豪宅、幾架跑車、間公司有100個員工以上、食餐飯7/8萬都唔心痛嗰種。我而家同佢哋嘅程度真係爭好遠。老實講，我係想努力成為佢哋嘅，我覺得既然我屋企有人得，點解我唔得呢🐷

所以我嚟緊都有機會會同朋友夾吓搞啲生意仔，唔好淨係自己匿埋喺度出post影相寫嘢，要跳出comfort zone，先可以迎來更多嘅可能性🤍