我的孤寒前男友 - 最終章：分手後一分鐘，便有後悔聲音？我的不足～ (Patreon)

👉🏻【按此】重溫第一話

👉🏻【按此】重溫第二話

👉🏻【按此】重溫第三話

👉🏻【按此】重溫第四話

講分手故事之前，我想列一個我激嬲過佢嘅事件清單（除咗前幾集講嗰啲之外）：

1. 我本來DSE目標係入HKU社會科學，後尾成績考出來好過預期，先去咗中大讀Law。討論對大學住Hall生活嘅期待嘅時候，我提及唔想入何東（全女Hall），因為我已經讀咗12年女校，唔想再淨係同女仔相處。佢嬲咗我起碼六個鐘，講緊係佢補習之前我同佢傾，補完習之後我接佢放學，佢仲嬲緊，嬲到凌晨都未嬲完。

2. 我有一次喺街被非禮，我冇同佢講，因為我知道佢會嬲我😂🙏🏻 但過咗一排我阿媽同佢食飯，好輕鬆咁提及我之前喺街俾個男人摸大髀，我即刻已經覺得不妙，成個氣氛變晒，之後佢嬲咗我好耐。原因係我俾人非禮嗰日着短褲😅

3. 同佢一齊之前，佢有另一個同學追過下我，嗰位我本身真係當係好朋友，完全冇非分之想，所以我派咗好人卡，明顯拒絕咗佢嘅，之後我都冇點同佢聯絡，冇特別傾偈更加冇任何接觸。本身我哋同一個圈子，有好多共同朋友，大家都比較客氣同埋有禮貌。過咗幾個月之後好人生日，我講咗一句Happy Birthday，俾前男友知道之後（我冇特登隱瞞因為根本冇必要）佢嬲到不可開交😂 我一個學生妹深夜走去佢屋企樓下等佢氹佢，買嘢食俾佢食，折騰咗幾個鐘，最後佢先開心返，然後最後我深夜自己返屋企，佢完全冇擔心😂😂😂 其實同咗佢一齊之後，我已經完全沒有同任何男性朋友聯絡，全部cut ties，講緊係連講一兩句說話都唔會，因為費事trigger到佢之後又要搞到我要氹返佢😅

分手過程：

其實分手嘅時候好簡單，個心態係：我忍夠了😂 不過，我絕對有做得唔好嘅地方🙃 我比較膽怯懦弱（所以先會一直遷就佢），唔鍾意睇到人哋唔開心，寧願委屈自己，所以當時我同佢講分手，只係打咗一個好長嘅text，然後就block曬佢所有嘢😅 其實都幾殘忍😂

不過我個人真係心軟，當年我真係做唔到面對面同佢講（其實面對面講，都係要分手，唔會話好好多，但可能尊重啲？）😅 而且，佢係斷崖式被分手，即係前一晚仲係好地地，我仲係佢世紀無敵好嘅女朋友、無限期遷就佢嘅人、佢嘅結婚對象，第二日就突然分手😅 因為我做唔到「對人唔好」😅 就算我係想同人分手，都唔會話首先態度變淡、對佢好差，令佢覺得有啲先兆，都係保持我一貫做人同對待戀人嘅高水準😂

分手後：

我好記得當年text完佢，呢段幾年嘅感情，我只係輕輕地惋惜咗30分鐘，流咗兩滴眼淚，但啲眼淚仲少過我有時睇到好可愛嘅狗仔video忍唔住喊😂 呢30分鐘過後，我沒有一刻係不為分手而開心，從沒後悔，只有慶祝😂🎉 因為講真，要喊嘅、要失望嘅，我已經喺一齊嘅時候經歷咗無數無數次，去到講分手嗰一刻，已經係死心，唔再係心傷。

分手後先對我好：

令我覺得好諷刺嘅係，分咗手之後，佢開始做一啲我本身好期待佢拍拖時會對我做嘅嘢。我病咗，佢煲粥放咗喺我宿舍房門，之前從來冇試過用任何形式照顧生病嘅我😀 不過兜粥我一直冇掂過，半年之後先至開然後倒咗佢😅😂 佢無啦啦摺咗一個手工藝品，放喺我屋企門口，係用紙摺出嚟嘅Hello Kitty。我本身都講過好多次，我好渴望收到一啲有擺心機去整嘅禮物，分手後終於第一次收到😅 不過其實Hello Kitty都九唔搭八，我又唔係特別鍾意😅 佢仲開始寫啲心意卡，話會守護住我😅

但佢都有啲搞笑，有次我同新男朋友坐咗喺宿舍嘅common area 溫書，無啦啦聽到有人播serrini嘅歌😅 當年serrini未出道，仲係小眾歌手，唔係好多人識，但係我都已經好鍾意，呢樣嘢前男友都知嘅😅 我仲好驚喜咁講：「咦？邊個喺度播呢首歌？竟然有人識？我好鍾意㗎！」跟住就開始聽到有人啜泣😅 原來佢匿咗喺防火門後邊😅 ok，其實佢成日嚟我宿舍、屋企附近偷窺我，點解佢唔直接出嚟同我對話呢？😅 題外話：佢唔係讀中大嘅，完全為咗我潛入去校園😅

分咗手之後，佢冇一次係夠膽直接出嚟面對我，甚至我好快就unblock咗佢嘅，之後佢有send一啲關心嘅message過嚟，但係就連一句：「會唔會復合？」呢類嘅問題都冇講過。完全沒有😅

既然想挽回嘅係佢，點解佢一句都唔問？無action prompt，想我哋神奇復合？😅 雖然佢問咗都唔會，但點解既然佢想復合，又唔提出或者唔約下我出嚟傾？甚至寧願同我存在同一個空間，但係匿埋喺一邊，唔出嚟面對？😅

最後，佢喺度做啲好似上述嗰種所謂好sweet嘅舉動，持續咗三個月，就冇再做了。都係好事😅 其實佢每做一件窩心舉動，我對佢只會又再扣分，因為佢一次又一次咁展示出，佢完全理解及明白我一直以來想要嘅關心係乜嘢，佢一直唔做，一次又一次令我傷心失望，唔係佢唔明白、天然呆，而係佢真係唔care我enough去氹我開心，覺得冇需要氹我，我都會歷久不衰咁陪佢、單方面付出。

最後的孤寒：

呢件事都真係幾搞笑。話說佢喺我啲朋友眼中，一直係幾nice幾好相處冇乜嘢嘅形象。咁我都覺得佢的確係冇乜嘢嘅😂👌🏼 （但個問題就係在於，佢好多時連對我都冇乜嘢😂 冇關心又計較）我話佢好孤寒唔關心我，我啲朋友都不以為然，分手分分鐘都覺得我係有啲衰，因為我一直非常有道德，從來唔會講佢壞話😂

分手後，佢嘗試約過我一個好姊妹食飯（但冇嘗試過約我😂），睇吓有冇彎轉😂 食完飯之後，又出現埋單計到足嘅情況😂 餐飯前男友先俾錢，每人要夾$101，我好姊妹得$100紙幣，冇散子，前男友知道之後，要大費周章咁同佢一齊行好耐，搵好多便利店，目的就係要我好姊妹唱散個紙幣，然後俾返足嗰$1 佢😂😂😂

嗰日之後，我個好姊妹就明白咗我😂 原來我真係冇誇張，原來我真係忍咗好耐，誇張嘅真係對方😂👌🏼🙏🏻

- 完 -

附圖：當年的我和表弟，表弟今年升中了😆💕