Mr Gu 我的孤寒前男友 - 第四話:一對襪🧦 (Patreon)
Content
第一話都提及過,當年我每個月同記念日都會製作禮物俾佢,但佢送禮物俾我嘅比例係 8:1😂 老實講,出身普通嘅我唔好話唔鍾意名牌,直頭係唔認識名牌😂 唔認識,就唔會有啲乜嘢想要名牌嘅慾望,而相反地,出身中產嘅佢反而會追下潮牌。
其實我想要嘅禮物好簡單,亦都同佢溝通過好多次,同我送俾佢嗰啲一樣,我係想要一啲有心思嘅小禮物:心意卡、小食、小勞作、鎖匙扣、小文具、情侶手帶…呢一類😂
有一個紀念日,佢終於都送咗一份禮物俾我,之前講緊可能有4個月係我單方面送,佢淨係負責收😂 而份禮物,係一對襪…旺中$20有三對嗰種。
當年我收到嘅時候,有少少唔知畀乜嘢反應,但我為咗唔好hurt佢,都講咗多謝同埋表示開心。成日上網睇到啲人鬧女朋友野蠻,話佢哋乜都唔滿意、容易激嬲。我就係相反,乜都逆來順受,亦覺得大家千祈唔好學,好應該要有脾氣有要求先啱。
老實講,我真係諗唔到如何稱讚呢一份禮物,呢一對襪,款式唔係特別靚、沒有任何對於我哋特別嘅意義、沒有特別切合我嘅需要、質地仲有少少差…不過我講咗多謝,錫咗佢一啖咁樣,然後繼續go on our day 啦。
佢送完呢一對襪俾我之後,又有3/4個日子,係我單方面送禮物俾佢。於是我終於忍唔住,好聲好氣好溫柔咁同佢講:其實我都會想你對我有啲心思,次次都係我單方面送禮物俾你,我會覺得好攰、不被愛🥹 我都係想透過呢個小儀式感受到你關心同埋喜歡我🥹 如果你唔想進行呢個儀式我哋可以停止,但下下都係我單方面付出我真係會sad🥹
大家估吓接下來嘅發展會係點?
冇錯,就係佢嬲咗我啦😂 佢比我更加唔開心、更加失落,最後我花咗好耐時間先氹番佢😂
點解嬲呢?原來,佢幾個月前送對襪俾我嘅時候,我已經激嬲咗佢,以及傷害咗佢感情😂 原因係,我當時並沒有好開心、沒有表現得好雀躍,我嘅反應令佢失望😂 因為呢個失望(我嘅錯),所以佢呢幾個月先至唔再送禮物俾我(其實之前都冇乜送😂),因為佢唔想再俾我傷害😂🙏🏻
當時嘅我真係聽到:🙂🙂🙂 噢,原來又是我錯了😂 係我冇好好顧及佢感受😅🙏🏻 我個個月單方面送心思禮物,終於有一對不明來歷嘅襪作回報,應該要由心而發開心到彈起先係😂😂
不過總而言之,最後我輔導咗佢好耐,然後再到下個月,我都係冇禮物嘅😂 (佢都係有嘅😂)
大家想知道分手後佢點樣嗎?可能下次透露,或者遲啲先再透露,總之下回待續……
附圖:中二時的我表示wtf😂!?