Mr Gu🤭 我的孤寒前男友 - 第一話😀 (Patreon)

金鐘OL系列照片稍後將於其他Tier繼續更新🤭💕

*我一路都好忌諱講任何同我有認真關係嘅人壞話，就算最後part ways 都好都要畀返respect🙏🏻 但由於已經事隔多年，相信都無人會知我講who，而且有啲事蹟真係太奇葩，真係會有啲想分享😂*

咁首先我要交代下彼此背景。認識前男友Mr Gu嘅時候，我哋都係學生。佢係讀全港數一數二嘅男校，家境比我好，住1000零呎左右嘅中產屋苑，根據佢父母職業推算，當年佢哋家庭月入應該50萬左右嗰啲數啦。而我呢，亦都係讀全港數一數二嘅女校，其實沒有數到二，可以話係全港最好嘅女校甚至學校😂🙏🏻 但係我家境就比較humble，阿媽當年只係一個普普通通嘅會計文員，同佢哋家庭月入應該相差10幾倍😅

當年我哋出街洗費，永遠都係AA，當然我都唔覺得有問題。但係去到有啲位，我就真係覺得做多咗，有啲唔舒服。

出街食飯叫兩個餐，或者叫餸食飯，理所當然各自俾一半，或者俾自己嗰份。但係其實永遠，佢食量都係大過我，就算一人一個餐，我個餐佢都會食咗30%，但我永遠都係俾50%錢。咁呢樣嘢本身都唔大問題。

問題係，有時出街，只係夾份食魚蛋、小食之類，當我食得比較多嘅時候，例如$20蚊買10粒魚蛋，我食咗7粒，佢真係會逐粒計住，最後要我俾$14，而唔係平均俾50%😅 但係，如果調轉係佢食多咗幾粒，佢就會只係俾一半錢，唔會比埋多咗嗰幾粒嘅錢😅

如果一齊食飯係我買單先，佢之後夾返俾我，通常我都冇乜所謂，例如$53，我會唔介意佢淨係比一張$50紙我（嗰陣時未有PayMe），亦唔會同佢計。但係假如係我冇散子，就算只係 $1，佢都必定唔會忘記，而且會想盡辦法要我比足，例如我沒有 $1散子，只有$500蚊，佢會大費周章要我去便利店唱俾佢😅

題外話，我大學嘅時候仲同緊佢一齊，然後有其他男同學追求。追求我嘅男同學喺中大玻璃屋，當我order完一個$12茶餐嘅時候，佢二話不說用八達通幫我嘟咗，仲同我講話小意思😅✨ 嗰下我真係覺得佢係全世界最型嘅男人，發出咗聖光😂 我呢個幾年嘅前男友，成功俾$12打敗咗😂

再講吓每個月嘅慶祝活動。小時候嘅我好重視儀式感，每個月、每個紀念日，我都必定會送一啲小禮物比對方。自製嘅手工摩天輪音樂盒、寫字曲奇餅、心意卡、織頸巾、鎖匙扣、公仔…你諗到嘅我都有整，全部都係我花錢花時間去做嘅。而佢似乎都好喜歡我整俾佢嘅嘢，佢會po上ig曬命的。但係！重點嚟啦！我同佢一齊嘅嗰段時間，大大話話都整咗可能30份禮物，全部都係心意之作，仲要使錢。但係每次我送禮物俾佢，佢都沒有回禮😅 幾年來，我只係收到5份禮物以內，包括我生日都係冇禮物收嘅。而且收到嘅時候，係啲乜嘢禮物呢？

地鐵站門口咪有啲擺攤。佢有送過幾樣嘢俾我，第一樣係嗰啲立體嘅賀卡，大概$20一張，上面佢就只係簽名，字都唔寫多幾隻😅 一對襪，完全沒有任何紀念性或者意義可言（呢個係另一個故事）😅 螢光畫板，價值大概$30，上面寫咗四個月快樂😅 我唔係想用價錢去衡量佢嘅禮物，但係呢啲禮物真係cheap之餘完全沒有心思可言，亦冇考慮過我係鍾意啲乜嘢😅 大家諗吓，有20幾次我送禮物俾佢，我係沒有任何同等回禮。去到有個位我問佢：「其實你係唔係唔鍾意每個月慶祝紀念日送禮物，會唔會令你有壓力？如果係嘅我哋可以取消呢個活動🥹」 佢答我（大綱）：「唔係呀我鍾意呢個活動，但係我鍾意收多啲。」😅😅😅

至於點解我同佢一齊咁耐？愛我嘅行為表現普通，財政沒有幫助，學業沒有幫助，點解仲要繼續？😂 唔好深究。有種女生就係比傳統思想荼毒得太犀利，覺得一旦一齊咗就要努力去磨合、遷就、維繫，唔好輕易放棄關係。好多事情明明對方有問題，但係都不斷幫佢搵藉口，甚至打算向對方提出呢啲問題嘅時候，仲要擔心會傷害到對方嘅感受。

大家想唔想聽多啲Mr Gu嘅事蹟？我仲有大把分享😂 大家唔想聽都冇辦法，因為我想講所以都係會照寫出嚟😂✨

👉🏻 【按此】第二話現已更新