【心事台】朋友走佬、男友持續要求我找SP😂 (Patreon)

（圖為家中新安裝嘅梳妝台，好開心呀，以後終於可以照鏡！啲護膚品化妝品亦都有位收納了！💓😜）

話說呢兩日發生咗一件事，喺我嘅圈子都算係幾轟動嘅消息，就係我嘅一位朋友冇上庭，棄保離開咗香港。而因為佢某一啲嘅做法、過往嘅行為、案件嘅性質等等，佢呢幾日都受好多攻擊，然後呢啲攻擊甚至牽連到我，黑人問號😅

就住呢件事，我當然心底入面有唔同嘅想法，亦都有我嘅見解，並且老實不客氣咁樣，喺各種事件曝光之後，直接同我嗰兩位朋友講我嘅看法。但我從來冇公開作出過任何反應，因為我知道，無論我係點嘅立場，都可以畀到位人入，呢件事已經好多人關注，多言對件事無幫助，只係令到一啲人可以食花生咁解。

喺呢度嘅大家我都當係真正嘅支持者，所以可以同大家交代嘅係，我事前並冇參與佢哋任何嘅決定，亦都唔清楚佢哋嘅去向（其實到呢一刻我都唔知，亦都唔想知），有啲消息我係睇連登先至知😂 呢一點，就算有警察懷疑我要走去查，都絕對可以證實我係冇份協助任何野😜 我係一個唔習慣問朋友狀況嘅人，我會認為，如果佢哋想講，就自然會講俾我聽，就算係好親密嘅朋友，都唔會刻意去八卦，加上我本身都忙到喊，更加冇時間去參與其他人嘅事。我甚至係連佢哋單案件有另一個被告都唔知道😅 我身邊唔少嘅朋友都有案件喺身，而且大部份嗰條罪都係屬於嚴重，甚至背負唔止一條罪，我其實冇心力去太過關心每一個朋友嘅案件詳情，尤其是當案情相對唔嚴重。不過，我係預咗13號會去陪佢上庭的，後來都冇呢個機會。

可以交代嘅係，喺事情已經米已成炊、無法逆轉之後，我就被告知有一隻狗好可能需要其他人照顧，因此出於人道立場，就算我已經日日好辛苦咁樣奔波處理各種事務，仍然主動去接走隻狗返屋企，一邊同佢搵領養人。所以冇錯，我係比其他人早少少知道呢件事，但都不過係喺事情已經發生咗之後。

嗰隻老狗唔識得定點大小二便，我屋企又多貓，本身已經好多嘢要照顧、兼顧，仲要日日去探監。其實呢幾日都好辛苦，一朝早起身周地屎尿，忙完一整日返到屋企又有，仲要放狗，其實都真係幾大壓力下。大壓力到，我去探監嘅時候，忍唔住第三次喊咗出嚟。

第一次，係第一日探佢嘅時候，因為成件事太突然太過難以接受。馬拉松式上庭，幾日冇溝通過之後，突然比我見到佢着住囚衣、企喺玻璃後面，真係忍唔住喊。

第二次，係佢講咗啲嘢激嬲我，搞到我好傷心。（喺佢角度佢係話我小器喎🙂 我就唔覺啦🙂）

第三次，就係前幾日🙂 喺各種壓力同埋所有事情發生咗之後（唔係淨係講嗰兩位人士，而係仲有好多其他事情發生，包括又多幾個人被捕、又多幾個朋友移民或者流亡、新聞又有更加多負面嘅消息...），我其實已經有一段日子，個人呆呆滯滯，想喊又喊唔出咁。然後終於，接咗隻狗之後可能因為再加添左一啲責任同埋工作，終於過咗個臨界點，頂唔順喺探訪嘅時候同佢傾面對緊嘅壓力，就忍唔住流咗啲眼淚。其實都覺得有少少唔好意思，人哋坐緊政治冤獄，仲要人哋睇我喊、要人擔心，不過佢都話，其實佢寧願我可以用最真實嘅自己去繼續同佢交流，佢都會想繼續同我分擔，可以好似出面咁互相倚賴。佢仲有同我講，其實我唔使理咁多，最緊要照顧好自己先，但同時佢又明白我係嗰種，見到街邊有隻雀唔係好精神，都要攞返屋企照顧嘅人，佢覺得我呢種善良都係佢愛我嘅地方，所以佢都尊重我做嘅嘢😚😌

所以佢又喺度講啲搞笑嘢氹我。就開始話，我快啲搵SP同我做愛😂 今次佢嘅講法係，如果我真係搵人做，佢會感到好開心好滿足，因為就算我喺出面同人翻雲覆雨，但係仍然會個心喺佢度、堅持去探佢，咁佢就會覺得好威，咁樣先係真正嘅擁有我😅😅😅 究竟佢係幾想我搵SP，我覺得佢個腦都真係異於常人😂 只不過係國安人員監聽電話嘅時候，都真係會覺得幾變態好難頂😂😂

呢兩日，我莫名其妙地都面對攻擊，明明件事同我冇任何關連嘅，我都冇乜所謂，因為我真係行得正企得正，警察半夜敲門也不驚😄 我唔出聲只係因為唔想將啲事情複雜化、製造更多是非，唔代表我有做錯事或者係有任何立場要展示😌

至於有啲人攞住隻狗就用嚟攻擊我，我只能夠講，我照顧呢隻狗，我對得住天地良心😎 無論人類嘅世界幾咁紛擾、幾多PK嘅爾虞我詐，都係唔關隻狗事，我照顧隻狗都係冇做錯到😚

講咁多，希望你哋唔好流出呢篇文，不過就算流出左都唔係啲乜嘢，反正其實都只係講返一啲既定嘅事實，不過都係希望大家了解完就算啦🤎