夜跑小露出😜 渴求... (Patreon)

呢排因為香港發生嘅事、我身邊嘅人因此要面對嘅處境，令到我情緒都唔係咁好，有一種好鬱悶嘅感覺屈住屈住係個身體入面，好似就嚟要爆發，但係又冇辦法爆出黎...作為一個唔喜歡運動嘅人，真係冇諗過自己竟然會有呢一日

喺尋日情緒真係好差嘅時候，深夜時分，我就出咗去跑步。呢個係我人生第一次，覺得自己有需要去運動：唔係為咗減肥而迫自己運動，唔係為咗想健康啲而叫自己去運動，而真係因為覺得，唔出去跑下，個人會爆炸，真係覺得好需要透過運動嚟發洩，有種唔跑唔得嘅感覺🥲

落到去，毛毛雨，我出盡全力咁跑，跑到最快，覺得好辛苦，心口有啲拿，但係呢種感覺同時好暢快🥲 到頂唔順嘅時候我就變成快走，等條氣順啲嘅時候又跑...如是者，咁樣jog左成個鐘，身體上就唔係話好攰嘅，始終我身體都唔係話差，而且都仲後生，而精神上就有少少改善，但始終已經接近凌晨兩點，都唔可以太夜返屋企，所以就收檔。不過其實我覺得未夠喉，個情緒未係完全抒發到，只不過係有改善嘅。

於是今日我又再去跑過，又係跑左一個鐘。不過其實多數時間都係快行，然後幾時感覺有種鬱悶嘅情緒湧上心頭，就出盡全力咁樣跑。

呢兩日真係人生第一次覺得自己咁需要運動，咁需要透過令體力稍為透支黎宣洩情緒。睇怕再係咁我真係會瘦，不得了🥲