暴乳救貓福利圖🐱💛😛 忙到乳房也下垂了🥲 (Patreon)

標題是亂改的🤣 感謝大家今個月仲留喺度💛 我真係忙到快要死了，基本上係一人分演三四個角色，做三四個人做嘅事🥲

同大家輕輕講吓每一日嘅schedule:

8點幾起身梳洗，9點幾出門口，之前可能要打點一啲物資、聯絡一齊探訪嘅朋友，10點左右去到探訪，然後排隊等候探15分鐘，通常12點零都出得返黎，就算等得耐嘅日子，1點前通常點都得。

之後就會去同一齊探訪佢嘅朋友食個飯，傾吓計，通常1點零都完成到上午嘅行程。然後下晝就叫做相對自由嘅時間。如果有記者，或者任何拍攝專訪之類，基本上就冇咗全日。如果冇，我就可以做吓自己嘅嘢，例如救下貓、影少少相（但大家都見到，真係冇乜時間出到咩作品），做吓家務。一係就有佢啲嘢要打點，例如物資或者朋友、律師、佢父母、記者嘅聯絡。如果有佢嘅信收，我就可以影低，然後按照信嘅內容去同佢處理，例如有寫關於佢不同朋友嘅，我就會send返去俾佢嘅朋友，例如適合公開嘅，就可以post上去我地嘅社交媒體，如果係一啲有趣嘅瑣事/想法之類，我就會post去佢個patreon俾佢嘅支持者睇。

如果再預啲時間比自己喘息下，例如訓一個鐘晏覺，其實已經差不多去到夜晚。如果夜晚約咗朋友食飯，基本上都冇乜時間剩，但如果好似呢幾日咁，我自己匿埋（我自己一個人嘅話可能就夜晚飯都唔會食，就咁飲個湯或者食個蘋果，一來可以清下腸胃，二來都慳返啲時間），咁就叫做有多啲時間可以做吓嘢。好似今日咁，而家都有時間打呢篇文😛

然後去到夜晚，如果冇啲乜嘢突發嘅事，基本上我每一日都堅持寫兩三個鐘頭信俾佢，交代一下全日發生咗嘅事，或者一啲我嘅想法。我數過，平均每一日都寫到4000字。如果好似之前要拍嘢，拍到夜晚，基本上全日都係透支到要死咁款。

呢個時候我真係好佩服自己嘅身體，我真係好健康（touch wood），情緒控制又好（touch wood），呢啲都真係福氣🥲 可以喺咁嘅情況下基本上都冇病🥲 所以好多人成日無聊地攻擊我嘅身材，又話肥又乜乜物物，咁其實我都幾肯定自己係好鬼健康😂 個外觀係點見仁見智，但實際身體檢查數據、實際生活狀態係顯示我係健康乖寶寶😎 好感恩阿媽生左呢個身體俾我，又喺我細個嘅時候照顧得我好好，打好個底，令我而家可以硬硬淨淨咁面對每一日嘅挑戰。

好似今日咁，我就帶咗呢一隻係黃色暴雨之下救起嘅貓bb去睇醫生，然後返屋企照顧：杜蟲、滅蝨、餵食、抹眼耳口鼻、刺激大小二便...有人喺出面話我做乜帶佢搭巴士，咁其實係因為我而家住得都遠，日日朝頭早我都call車出去探訪（大概$160），通常下晝我都會搭巴士返屋企，慳返啲錢。今日同呢隻BB睇醫生都洗咗$460，咁我就唔捨得再call 車返去，所以就慢慢搖巴士🚌😂 是但啦，咁細隻貓，總之冇發現咪得囉！如果巴士公司竟然因為呢件事無啦啦告我（其實都幾難），我相信會係佢哋嘅公關災難囉！🙄🌝

寫到呢度先，稍後喺其他tier再update啲圖and 文💜