男朋友為何不介意我找SP？ (Patreon)

上一篇文我都講過，佢不單止唔介意我搵SP、影性感相嗰啲，佢仲鼓勵我多啲做呢啲嘢，因為覺得我應該要多啲見識、發掘下自己嘅sexuality。之但係我只係對影相有興趣，一直都冇搵SP嗰啲嘅，因為我信唔過人亦都冇乜興趣去試太多呢啲嘢。我唔會因為佢想我去做而去做囉😂 即係等於而家有人免費請你食生蠔刺身，但係你唔鍾意食生蠔嘅，咁有鬼用😀😂

如果大家仔細睇呢封信，或者留意吓我哋呢段關係嘅歷史，應該就會發現其實我一直係非常忠誠嗰個，而佢就間唔中都會溝下女/俾女溝/flirt。不過最有趣嘅位係，我忠誠，唔係因為我要為佢而犧牲，純粹就只係因為我個性格就係咁，唔鍾意識人、懶、自閉、幾乎從來都唔會主動去投懷送抱、對所有雄性生物都好避忌、獨立、極度有安全距離、唔鍾意flirt人（覺得太羞恥），除非有人，可以喺我唔出街嘅情況下，都對我好熱烈咁樣追求，我先會有少少反應（當年VL就係咁樣，因為我哋住同一個宿舍）😂

同埋我好有自知之明，我唔會覺得人哋有義務要鍾意我，成日都會覺得自己憑乜要人鍾意，同埋覺得「鍾意」係好兒戲嘅事情，重要嘅係相處。我對自己有自信係一回事，但只係限於自己鍾意自己，我就唔會覺得別人係要鍾意我，甚至覺得全世界冇人鍾意我都冇所謂，只要重要嘅一兩個人鍾意我就得。所以每次見到男性，我基本上都係假設佢哋好唔鍾意我嘅😂😂 但係影相就唔同，我係呈現到我想呈現嘅我，而唔單單係人哋眼中觀察到嘅我，亦都唔係真係現實世界中嘅我。

雖然，大部份後來真實認識嘅人，都會覺得我真人係好過網上嘅形象好多 （其實只係因為佢哋太多定型、網上太多抹黑），例如覺得我溫柔有禮貌好樂觀嗰啲啦，網上佢哋唔知點解覺得我好惡😂 可能因為我以前接受過辯論訓練掛，同埋真係想倡議，令到好多時打字嘅語調比較firm😂

不過呢啲我都冇乜所謂嘅，反正其實每個人都會認識到不同嘅我，都會在乎你本身係一個點嘅人。譬如一個人冇乜禮貌，又同我冇乜共同話題，我都未必會用我比較好嘅一面對待佢，呢啲嘢有時係雙向😂

講返正題。咁如果佢對我不忠，我梗係會不滿啦，嗌分手都唔知嗌過幾多次，次次都一定係有非常之合理嘅理由，唔係亂嚟。不過次次佢都求我回心轉意，然後基於我重感情，而且真係同佢嘅思想接通到，下下又會忍唔住俾機會佢。

成件事就係，喺呢方面我哋嘅性格（其實都未上升到去價值觀層次）好唔同。佢享受被別人鍾意，然後會忍唔住去追求呢種感覺。我就冇乜所謂，有時仲怕人太鍾意我日後會失望，又或者怕啲人會纏住我騷擾我，好麻煩😂😂 所以成日都暗地裡有啲唔係咁想人鍾意我，一有人好似鍾意我就會覺得有啲大壓力😂😂

不過佢坐咗監之後，我嘅枷鎖都放低咗好多。心態上已經完全唔抗拒搵吓SP，不過行動上仍然停滯不前啦（你都覺得無從入手）😂 如果我搵到幾個啱心水嘅，佢都會好開心😂😂😂 正如大家睇到佢所寫，佢分得好開，而且仲對自己好有信心。喺另一封信度，佢都有寫話只係想我開心同埋搵吓人陪。

我咁難得嘅「忠貞」，完全唔係因為佢，而係因為我自己prefer唔好接觸太多異性，亦冇乜呢方面嘅需求😅

遲吓繼續寫💙