社會實驗: 將我自己放到外國網站 (Patreon)

自從我喺網絡上開始存在，「肥」呢類攻擊就一直纏繞住我。即使好幾年前我根本完全唔肥（宜家有少少，但當年無50kg 都被大規模攻擊肥😅）

香港嘅網民不單要攻擊你肥，仲要長篇大論、用盡各種手法、戰死方休咁去斟酌我「肥」呢樣嘢😅 就算我影住一個池塘，都可以留言話我肥😂 有時真係好佩服佢地嘅執著😅 連我自己都無咁care自己嘅身材😅😅

曾經，喺我冇睇得咁開嘅時候，我好想離開香港，去美國生活。嗰陣時去美國留學，完全冇人攻擊我嘅外表（其實喺香港，現實世界中都從來冇人攻擊我外表😆），而且有好多唔同種類嘅人一齊生活，好多元化，完全唔會覺得身型「唔同」就等於係異類（再強調，我唔覺得我身形喺香港幾咁特別😆 ）。就算我之後去唔同地方長stay （講緊係至少一個月嗰種），我都覺得外國嘅人總係比較友善，唔知點解香港人好鍾意特登對人冷漠刻薄。

前兩日，我心血來潮cosplay天竺鼠車車，放咗上ig，明明我只係做自己嘢，唔鍾意睇可以唔睇，偏偏又有啲人要針住黎攻擊😆 仲好似上咗連登定點😅

明明我覺得自己只係普通嘅人，其實身形都唔係特別肥（雖然我比人留言過話: 「肥婆真係唔係一般嘅肥」）但偏偏網民成日都強行過度關注我😅

尋日我突然又諗，不如試吓將自己擺去外國人為主嘅網站，睇吓佢哋點睇😆 於是，我開咗個9gag ，將自己套cosplay 放咗上去，重點字眼係「Fat Asian girl」😆

然後留言幾乎清一色係質疑「Fat」標題，話「邊度肥」😂😂

「肥？有人可能仲意玩樹枝」「佢唔係肥，係豐滿，識唔識嘢？」「青頭仔先會話佢肥」「肥？wow」「你串錯咗豐滿」

其實過咗咁多年，我已經唔覺得「肥」係啲乜嘢攻擊，我甚至覺得只係一個身形嘅描述，就算啲人長篇大論、繪型繪色攻擊我嘅外表，我都只係當笑話睇。不過我真係好耐冇試過喺公開嘅網絡平台，感受清一色嘅善意，被當成一個人咁樣尊重。所謂被當成人，即係如果你唔會喺街無啦啦咁樣攻擊一個人，你都唔會喺網絡上咁樣攻擊佢。

呢種感覺好久違，唔係新鮮，好似返返去year 2之前，未被高登仔發現強行關注之前...好耐冇感受過，原來上網可以咁安心，唔需要每日都擔驚受怕又有啲乜嘢攻擊、抹黑...要時時刻刻準備好個心情去面對各種惡意。好耐冇感受過呢種放鬆。

好多人問我會唔會移民，其實我覺得依家香港咁困難，我反而會想留低。我最想移民嘅時候反而係所謂嘅太平盛世....可能就同我所有同人嘅關係一樣，只能共患難，唔可以共富貴🥱🥱