心事台：跟住了兩年的家說再見💜 首次暴露景觀 (Patreon)

喺旺角呢度都住咗兩年，今日終於交鎖匙，退租了。

自大學開始，我就無喺屋企住，住過宿舍、住過外國、住過工廈劏房，每度都住唔長，半年至一年點都逼住要走。

我係一個好重感情嘅人，亦好重視與自己相處、思考嘅時間，一個安樂窩不單係一張床，更加係支撐住我嘅精神，每次離開一個地方，都會好不捨。但經歷過咁多次離離合合，我都同自己講要放低，每次都係輕輕講句再見就不回頭。

細個嘅時候曾經寄人籬下，偷偷住喺親戚嘅公屋6年，到近年老人家去世，要歸還公屋，大家都去say goodbye而我都係無去。何必要無謂地掀起情緒，誘使自己懷念、掛念、回憶呢。

喺旺角呢兩年，我經歷咗好多。樓下全年打仗、友誼、感情、俾國安跟蹤、上門搜屋、附近識落嘅貓義工、附近嘅餐廳、拍咗好多片、影咗好多相......旺角嘅繁華、繁華中嘅寂寞、寂寞中嘅安心、安心中嘅惶恐，呢一切都暫時告別了💜

自從成日被網絡欺凌，我成日以為自己好怕人（所以2018年買樓花嘅時候，先會選擇偏遠地區），係旺角有份令我重新打開翻自己，我非常多謝呢個地方💜

我有一個習慣，就係同每個地方嘅看更、清潔姐姐關係都好好，成日會送禮物、嘢食俾佢地，又會逗佢地笑。打緊仗嘅時候，呢度嘅保安姨姨曾經庇護我，我俾人跟蹤嘅時候佢提醒我，有一個好嘅保安姨姨真係好幸福嘅其實💜看更姨姨知我今日走，直頭眼濕濕...到我交完鎖匙、同業主做好晒手續之後，佢已經換咗更，完全無一個proper嘅再見。

但其實我都唔想同佢講再見，實在係太唔捨得，或者咁樣就係最好嘅結局。

所有嘢已經搬晒去新屋，而家就差未unpack曬😅 其實我買咗好多好靚嘅衫想喺新屋影俾大家睇，但個問題係設計公司拖延，到而家都仲未裝窗簾，我又低層，着啲露點衫等陣比全個屋苑睇晒喺度投訴😅😆 所以請大家等多一陣💜

以下俾大家睇吓我旺角單位嘅圖，開放式，只有200尺，一眼望晒，住到我好迫😂😂