眼皮都哭腫了🙃 (Patreon)

【放負post😖】我雖然表現到好似好堅強，但內心其實有時真係好累好脆弱，甚至好想喺呢個世界上消失。

唔知大家有無經歷過，三番四次被你珍重嘅人出賣。你選擇原諒，佢話會改，但過一陣又會再犯差不多嘅嘢。

一個人對你唔太好，但因為你珍惜佢，而佢又周不時會帶到俾你歡樂，而且因為有好多年嘅感情，所以你唔捨得離開佢，結果佢就食住你心軟呢樣嘢，一直都係懶懶散散咁樣纏住你，但間唔中又會俾啲甜頭你（同錢銀物質禮物完全無關，可能講緊嘅只係大家一齊過一個好開心嘅下午），之後間唔中又會出賣你、背叛你。就好似吸毒咁，為咗毒品你付出時間金錢感情，吸嘅時候係好開心，但偶爾清醒嘅時候你會發現呢樣嘢真係對你有害，毒品真係會害到你，但離開又唔係咁容易。

我甚至開始懷疑，呢個世界根本係冇社會描繪嘅嗰種長期伴侶。至少我好似冇見過一對完全冇問題嘅中年夫婦。所以到底點解我哋有呢個觀念，係要覺得伴侶要忠誠、要保護你之類？如果根本大部份嘅伴侶都係做唔到呢？

如果索性同我哋講，人類就係咁醜惡，就係充滿背叛，你最愛嘅人，同埋聲稱最愛你嘅人，甚至你自己，都可以背叛任何人，你唔好諗住有啲乜嘢幸福愛情，接受現實。

如果我哋由細到大都冇對所謂關係嘅（唔知係咪）不切實際嘅憧憬，我哋會唔會好過啲？