不能公開說的想法 - 性女vs聖女 (Patreon)

（圖是我在用卡通filter 拍的照，無碼版稍後放到其他tier）

*此文只是私人嘅學術討論 請勿公開*

前幾日，一大班香港社運人士、傳媒被以國安法政治拘捕，面臨未知嘅刑期、殘酷嘅所謂審判，所有關心民主自由嘅人無不震怒。

其中，周庭被捕更加係讓港日韓（特別係日本）各界人士紛紛出黎聲援，聲勢浩大。

首先我認為周庭做咗咁多日韓嘅公關、文宣、倡議工作，語言能力強，令日本人關注香港政局，絕對係deserve八方嘅支援。同埋亦慶幸、感激香港有佢，幫我地做海外嘅宣傳工作。呢篇文絕無一絲針對佢嘅意思，不宜公開令人揣測或者誤會，呢篇文只係純粹對社會文化提出一個反思而已。

無論係港人或日本人，唔少人喜愛周庭，除咗因為佢喺爭取民主嘅工作不遺餘力，亦都係因為佢「清純+可愛」嘅形象。日本人甚至幫佢起左個花名叫「聖女貞德」，媒體用佢嘅可愛、柔弱、純潔，襯托共產黨政治清算嘅邪惡與不公。而呢個形象亦令更多人為佢感到不平，激起義憤。

然而，咁嘅心態真係健康嗎？（沒有指定答案，只係反思）「清純可愛」，令更多人為佢抱不平。咁假如有一日有人流出佢嘅所謂「黑材料」（可能只係俾人影到佢同男朋友上酒店之類，呢啲正常人會做嘅事），即使只係好平常嘅小事，都可能足以造成大破壞。抑或，佢要為咗形象，放棄或隱瞞一啲正常嘅社交呢？

重點係，佢無論是否「清純」「貞潔」「可愛」，佢嘅工作都應該予以肯定、佢對民主自由嘅追求都值得欣賞、中共對佢嘅打壓都係可恥。如果係咁嘅話，點解要不斷強調呢一啲特質，甚至令呢啲特質成為左佢嘅主體呢？咁樣對佢、對社會嘅風氣係唔係好呢？

然後我又會諗，話唔定我、其他女仔有一日都會比國安捉。會唔會因為我地嘅形象唔「貞潔」，就唔值得有人幫呢？或者會令人覺得「幫唔落手」，因為我哋唔可愛、唔貞潔？男仔面對同樣嘅處境，又會冇咁值得幫嗎？到佢老咗、結婚生仔呢，會唔會又變得冇咁值得去幫？

以前一開始寫性別小文、post相，係好希望可以令到社會唔再用「性」「外表」呢啲嘢去對人有偏見。但越做就越發現，唔少人嘅偏見係冇辦法消除，我越講、越做，佢哋反而就對我越有偏見。（咁當然，亦都好多人係比我影響咗，思想改變左嘅😘 但亦有好多人會因此用固有嘅觀念去批鬥我）

一個「好」嘅形象係好強嘅武器、宣傳/公關工具，但同時亦好容易去摧毀。都係果句，我絕對欣賞周庭嘅工作、能力，亦都覺得佢本身就係可愛純潔，唔係為咗公關刻意扮出嚟，見過佢幾次，真人仲靚過上鏡好多。但係唔係只有咁「完美」嘅人先值得大家心痛呢？面對國安法，每一個被政治清算嘅同路人都值得大家去聲援、心痛，所以當我見到咁多人focus周庭嘅「純」，我係有少許反思嘅：「純」呢樣嘢會加分，姐係「不純」呢樣嘢可能會減分，仲要淨係適用於女性，男性純唔純唔緊要嘅（冇人會care黎智英/黃之鋒係咪處男😅），但政治清算根本不會理你純不純呢。

*此文請勿公開*