揭秘: 我的DSE 成績 (Patreon)

今日係DSE 放榜，諗返起我自己DSE，已經係好耐之前嘅事🤭 不過有一個好消息，就係有一位考生以我為題材，最後作文獲得5** 佳績！

講起DSE，其實我一直好怕人問我幾多分，因為我喺我嘅同學（中學+大學）之中算考得一般，所以我從來冇公開過我exactly幾多分，因為有少少自卑🤭 唔係寸/扮嘢，而係喺女拔呢種環境，唔係狀元或者榜眼，好似都冇乜地位，只係值得死埋一二邊😐 就算只係講身邊嘅同學，坐我前後左右嘅，考得最差係我😑 我鄰座入港大Law，我後面係「榜眼」讀醫，當年我讀喇沙嘅EX 都高分過我，最後入港大Law.... 我有一個朋友5科26分，最後入中大，但都搞到有一排唔好意思見中學同學。

我嗰屆嘅100多位女拔學生，唔少入到海外名牌大學（劍橋、牛津、Ivy league etc），港大50幾個，中大50幾個，科大10幾個，只得2位同學jupas入唔到大學。

所以都係果句，雖然全香港來講我係考得Top，但礙於圈子問題，我一直羞於透露自己嘅成績。

今日我突然之間諗通咗啦，因為我嘅放榜已經過咗好耐，我覺得係時候可以放低，令佢成為歷史事件，人生已經踏入左其他階段，唔洗再care自己以前考得好唔好。

中 5*

英 5**

數 4

通 5

中國文學 5*

英國文學 5

法文 D

所以5科係29分🤥

🤭🤭🤣🤣 呢個就係我當年嘅成績，嗰陣時我好介意，中文差少少就5**，通識無*，呢兩樣嘢我都覺得好羞恥😫 數學4 ，雖然成績係最差，但我最滿意，因為我數學完全唔掂，係靠後來將勤補拙，用咗好多心力，4呢個成績係超乎預期。

無論呢個分係好定唔好，今日我都同大家講咗出嚟啦，可以放低了💗 其實有咗社會經驗幾年，已經唔會再介懷當年嘅成績，無論好定唔好，都冇乜在意嘅價值。