我買咗咩樓？幾錢？平面圖、過程大公開💗 (Patreon)

自從嗰一個post提起我買咗樓，雖然只係講過一次，但唔少網民都好好記性，成日提起呢樣嘢，而且有好多疑問🙉 見大家咁好奇，就等我喺度喺度講下我買樓嘅詳情🔎

首先，由我18歲讀大學開始，就已經唔係同屋企人住。離開咗屋企人之後，先發覺距離係愛嘅關鍵。同屋企人一齊住，小至一條毛巾掛邊個位，都攞黎可以嗌交；當彼此有返空間，反而可以留返最好嘅一面俾屋企人。所以，雖然我同屋企人關係好好，但我18歲已經決定咗將來唔會再同返屋企人住。

講遠咗😂

喺我大學最後一年，我冇再住宿舍，搬咗去工廈住違法劏房，$5000/月，嗰陣時我已經經營緊patreon。亦都因為唔再住宿，我終於可以養貓。養寵物係我由細到大嘅夢想，2017年我執咗隻就死嘅狗bb，養咗半年之後都因為屋企人怕動物、屋企唔夠位、佢又開始大隻，最後送咗比我姑媽養。

層樓係我住咗工廈半年後買嘅，嗰時我經營左patreon、網店一年多啲😅

一開始，其實我目標係買500萬樓下嘅村屋。因為想要大地方+ 養寵物😺 當時好似有480萬左右嘅全新村屋頂樓連天台，共1400呎。不過缺點係，地點非常不方便，而且地契有好多問題，銀行甚至只能夠借50%，隔離村同類嘅村屋，好似話等咗好耐都未有滿意紙，一直不能入伙。而且住村屋仲會有網絡、漏水、昆蟲、黑社會等問題。

某一日，我同阿媽睇完幾間村屋，諗住去食飯，點知路過火車站，就俾個經紀拉咗去睇新樓示範單位😂

一睇完，加上個經紀不斷游說，我呀媽好鍾意，即刻話要落訂、抽籤🙃 其實我唔係好想嘅，因為首先就over budget、under sized，而且咁急，我都冇時間諗究竟鍾唔鍾意。但係我阿媽同埋經紀雙重壓迫下（我阿媽唔知點解好似同個經紀企同一陣線，可能太興奮sort咗），作為好怕呀媽嘅媽寶，我最後都係俾咗10萬訂去抽籤，當然抽唔到係可以退返。

之後，我同阿媽去咗工地實地視察。我阿媽超級鍾意，因為環境比較郊區、寧靜，周圍好多樹。我都幾鍾意，因為自成一角，我唔使怕人騷擾。

於是，我開始睇定單位floor plan，準備如果抽到籤，會揀邊伙。我嘅目標係550-600呎嘅兩房中層，但呢種單位完全超越我本來嘅budget（$480-520萬）好多😅 咁但係要買，又無理由買自己憎嘅單位😅 納米、開放式嗰啲，我個人就一定唔會買，因為我怕樓價如果跌，首先係會跌呢種，同埋無乜實用性，租ok但買黎住我唔prefer。咁我計過，按揭成功嘅話，就算比預期超支，我問阿媽借住少少錢先，應該都仲買到。咁所以我就鎖定左幾款目標兩房單位。

去到抽籤嗰日..erm...抽到好後嘅號碼...

會場成個氣氛好似賭博咁，好緊張，好嘈，現場不斷傳來叮叮聲，每叮一下代表賣出一個單位，個個都好似爭住買咁。差不多去到我嘅時候，我嘅心水單位基本上全部賣晒🙃連唔啱我心水嘅兩房單位，都剩返好少，得返好L貴嘅三四房，同埋我唔會買嘅一房☠️

而我面前，就剩返一個低層嘅兩房單位。真係剩返一個。唔係我嘅心水，首先因為低層，其次我嫌佢細，最重要嘅係佢開放式廚房，我養咁多貓，啲貓實搞事。其實我唔係咁鍾意呢個單位🙃

但受到現場氣氛影響，加上我阿媽同個經紀不斷比壓力我（我都唔知我阿媽做乜，佢真係太緊張啦😂)，最後我都係買咗佢😂

所以呢，點講，我雖然買咗呢個單位，但其實我唔係真係咁開心😂 尤其是廚房嗰度，開放式真係唔係我杯茶，諗起就憎💩

500呎左右，600萬樓下，有clubhouse同不錯配套。首期連稅、律師費等等170萬左近（唔記得咁清楚啦）。個單位係咁樣嘅：

其實我真係唔係特別鍾意佢，對佢有一種又愛又恨嘅感覺。而家仲未收到樓，我打算收到樓之後，如果唔鍾意，就租出去，過多幾年無咗辣招稅，樓價又升，我就賣咗佢算。如果樓價跌，我就比我阿媽阿爸住（佢地好鍾意），自己喺出面再租或者再買樓，再買的話，一定要買一個自己真係鍾意嘅。（再買嘅機會好微，因為我唔再想喺香港投資金錢。）

其實100零萬首期，唔係少錢，但好多香港人都有呢個數。就算後生冇，老人家好多都有。通常後生仔置業都有父母幫（我今次無），所以我唔覺得「買到樓」係好誇張嘅事。就算係要震驚，其實要睇吓你係買乜嘢樓，我從來冇公開講過我買咗幾多錢嘅樓，如果係400萬樓下9成按揭呢？計埋所有開支，可能都只係60萬首期左右，唔係少錢，但唔係天文數字，真係唔值得網民如此誇張嘅反應🤣 你話我一炮過買畢架山獨立屋就話啫🤣🙌🏻