陰道出事 (Patreon)

狀態真係話黎就黎，話走就走。

作為一個內向小寶寶，月頭太chur 了。又船P，又成日出去街站，又抗爭被捕支援乜乜乜..依家要還...

尋日開始，我就覺得下體唔係好舒服，好痕同埋有啲痛，我成日覺得係有啲貓毛走咗入去，因為我一痕就伸手入去R，每次一攞返出嚟，隻手都癡住晒貓毛（之前洗底褲，唔小心搞到啲底褲好多貓毛😅)....

去到凌晨，我覺得好唔對路，越嚟越痛同埋痕、灼熱...唔舒服到完全瞓唔到....我甚至用電話+閃光燈，將自己個私處擘大，錄影嚟睇，都見唔到有啲乜嘢異樣...最後終於頂唔順，大概五點嘅時候出咗去私家醫院門診。

我大概都估到，應該係有念珠菌或者其他菌感染，不過唔算嚴重，係因為抵抗力一時唔小心差咗所造成。亦都有可能因爲剃毛，冇咗保護（不過我見有啲人話啲毛都會藏菌）。同左醫生講之後，佢開咗抗生素同埋塞藥比我。大概六點左右，我返到屋企就即刻食藥同埋塞藥入陰道，一塞完，我以為我要爆炸啦！！🤯🤯🤯

大家都有飲過維他命C 片架啦，嗰啲一掉落水「Sasa」聲嘅水溶性錠片。因為醫院冇教我點樣塞，我塞到好出，淨係放咗喺陰道口，然後塊藥就喺個陰道口，好似爆炸糖咁不斷「Sasasa」，本身嗰度啲肉已經特別敏感，我痕到叫救命，係咁搵水沖想止痕，最後靈光一閃，用隻手指隊到粒藥好入，先至唔再痛苦😭🙈

好彩嘅係，食咗藥、塞左藥之後，好快個病徵已經減輕左，朝頭早七點幾八點終於有覺好瞓.......後尾上網搵返資料，原來塞藥入陰道，係起碼要將整隻食指推晒入去，咁先叫做夠入....

跟住一起身，我就去咗睇跌打，其實已經係第二次睇啦，因為之前幫手做初選街站，搬重野嘅時候kick親，扭傷咗隻腳掌😑 雖然唔係好嚴重，但行路跛下跛下🙄🙉 不過我估計過多兩日都會好返。

除咗今次念珠菌（醫生唔肯定係唔係，不過當住係先啦），我之前仲試過尿道炎幾次。諗返起都覺得生不如死😑 尿道炎唔會好痕，不過尿道口會好痛，成日急尿，但其實唔係真係有得去，而且每次去廁所都好痛同好痹...只能同大家講，性行為前後，雙方都一定要好好沖洗，每一日盡量屙多啲小便、飲多啲水，唔好着太過緊身侷促嘅褲。如果有幾日分泌物好多，就要勤換底褲，而底褲我都覺得最多着兩三個月就要換一批....

其實呢啲女性病真係好常見，只不過大家好少去講，或者覺得好羞愧之類。有呢啲小毛病完全唔係乜嘢丟臉嘅事，可能純粹唔好彩，唔代表你個人衛生一定好差，所以反而要多啲討論，傳播多啲知識，先可以令更多人唔使受苦。

PS 送上當日船P，喺冇人海灘影嘅相兩張。我冇練過，個pat pat天生就係咁大同埋圓潤。其實我覺得好多嘢都係靠天生，正如我肥都係天生🤣🤣🤣 當然訓練係可以嘅，但有啲嘢唔係訓練就得，例如啲人天生骨架好細，或者好矮，唔係話練就練到😛