乳牛🐄大包 (Patreon)

大家見我最近喺IG，upload多咗片，其實係有原因嘅。

如果係post相，我會忍唔住執下呢樣、執下個樣，就算盡量少執，都係會有d。而片，好多時候係冇得執（其實係有嘅，好多app可以一路幫你拍片，一路幫你成個樣都換咗，但身材都仲未太有得執，抖音好似可以拉長腿）

我發現，呢種執相文化，好容易令個心態扭曲，例如會變咗越嚟越接受唔到自己，出街都會好不安、唔開心，驚俾人認到自己真人同上鏡爭咁遠。

自從我少咗去P圖，或者P得冇咁犀利（其實對比起好多所謂網紅，我一直都唔算犀利），好多時候就咁直出啲相，我個人係開心左好多，我依家就算唔化妝出街，心態上好多時都睇開咗。

有一排我心情最差嘅時候，直頭係唔敢出街，就算帶住口罩都唔夠膽。嗰陣時受網絡欺凌，承受好多壓力，雖然好努力去對抗，但都唔係真係接受到自己。

我以後決定咗，盡量少P圖，儘量只係tune下顏色。我發現我越係將自己最原始嘅一面show俾大家睇，我個人係變得越輕鬆☺️