在家中浸浴 - 談談我的家境 (Patreon)

我發現好多朋友都對我嘅背景有少少好奇，咁我一路都覺得，家庭係非常之私人嘅嘢，雖然佔咗我生活好大部份，但我都好少公開談及家庭，就算講都係啲無關痛癢嘅小事（eg 去行山/去飲茶/去旅行）😂

但人大左，有啲嘢放低左，我又唔介意透露少少嘅。

好多人見我讀女拔，又讀Law，以為我屋企環境好好，其實正正係相反。我嘅成長絕大部份嘅時間都係非常之草根。

我出世到幼稚園時期，其實曾經住過大型私人屋苑（即係而家起碼900萬起跳嗰種），年年都公主咁搞生日party😂 但後來因為家道中落 (大概啦😂)，樓賣咗，錢無曬，我同呀媽要寄人籬下（有交租😂🙏🏻) ，受過好多白眼同埋人情冷暖。不過好在我有啲小聰明（自讚😂)，讀書永遠唔係考第一就係第二，出去比賽成日攞獎，搞到啲睇我哋唔起嘅人，都冇乜聲出。就係咁，過咗我整個小學生涯。

小六至中二左右，我同阿媽俾人趕咗出街，咁我哋自己搵咗個百零尺嘅單位住，佢因為要努力OT搵錢（會計業，不過當年唔係搵好多），成日好夜收工，咁我放左學，就返屋企煮飯等佢返嚟。就係咁過一段日子。

我本身小學都係讀傳統Band 1頭嘅名校（嘉諾撒聖心），咁我又考頭幾名，其實係可以直升原校中學（免費），但係班主任竟然叫我阿媽同我去試吓考女拔（直資要比錢）。當時身邊其實好多冷言冷語，譬如話我「冇咁大個頭唔好戴咁大頂帽」，「唔知自己乜嘢身世」諸如此類。但最後又比我入到，入到去成績仲要唔係差果批，所以啲人又無聲出😂 （呢樣野對我而家面對hater嘅時候個態度都有影響，我深信只要做好自己就可以令人冇聲出，或者可以爬到去高位，令你唔需要去理會惡言相向嘅人😛）

其實當年以我屋企環境，喺女拔係可以申請學費減免。但我阿媽堅持唔申請，話要我抬得起頭做人，同埋唔要我比人講任何閒話，要我喺學校有尊嚴，所以寧願自己吃力啲，都要幫我比女拔學費全費。

講真雖然我哋唔係有錢，但我呀媽喺我身上從來唔會慳，永遠比能力範圍內最好嘅嘢我，唔會限制我任何發展。所以我小學都考咗鋼琴8級，課外活動都唔會少過其他同學。佢仲成日用非常有創意嘅方式同我學習，譬如個個禮拜六都同我去行山，跟住我哋係個山度，搵咗個（我細個覺得係）世外桃源咁嘅地方，喺棵樹下面溫書或者睇書。我四年班嘅時候，佢仲搵到啲機構，可以送我去英國讀兩個禮拜書，當時要萬幾蚊（好L多錢），佢都可以攞到出黎送我去😭 之後我喺個course 攞咗第一😀 我成個小學階段，呀媽都特登臨訓前，同我一齊喺床睇書（因為冇位，我哋訓同一張床），我睇我、佢睇佢。其實佢都好攰想瞓覺，但佢咁做係想培養我閱讀習慣，所以以身作則，日日都睇書。搞到我其實一年365日都睇緊書🥺 其實係佢刻意安排🥺

去到高中，我屋企環境有所改善，搬近咗我中學（深水埗），不過係住啲好草根嘅地方。課外活動方面，除咗女拔本身已經夠多嘢玩，我阿媽仲幫我排除萬難入咗資優教育學院🥺 所以我成日都有高質嘅堂上，但唔洗好多錢🥺 （我小學嘅時候，學校推薦，之後去咗政府度做IQ test 結果係 13X -14X ，所以合資格入。但由於我成績係女拔唔係頂尖，而當時嘅機制係要中學推薦先符合要求，中學根本唔會想推薦我，我阿媽不斷同個八婆副校長周旋，佢哋最後先肯推薦我。）

考DSE嘅時候，咁我屋企其實冇乜地方溫書，我基本上日日都留係學校留到好夜，一係就出去coffee shop一杯咖啡坐全日。我阿媽係我六年班開始，已經冇再理過我學業，我本來亦都冇補習，dls比咗咁多學費，仲補習？但係去到DSE，我數學唔得，自知會死，我同我阿媽開口，佢都第一時間比錢我去補數學，完全沒有絲毫猶豫🥺 最後數學雖然係我最差嗰科，但都有個4🤓

DSE未考完，我就已經去搵part-time。係大家樂😂我去見一見，個經理就叫我聽日返工，但我同佢講，我聽日要考英文口試😂😂😂 佢就話，咁你後日返啦😂😂 結果我一考完口試，夜晚食咗個飯，第二日朝頭早六點幾就去返大家樂，同一日仲要即刻俾人偷咗幾千蚊😂

咁我當然唔會淨係做大家樂，都有見過其他工，包括補習社、社區中心etc最後我成個暑假，朝頭早返大家樂，下晝去補習社幫小朋友睇功課，或者去社區中心教人英文，仲會做下義工（陳校長免費補習天地）😂 由嗰陣時開始，我屋企環境更加好轉，因為我阿媽轉左新工，待遇好好多，壓力都無咁大，同埋無咁多是是非非，然後我又唔使佢養仲識搵錢😂😂 （佢其實晨早可以轉工，但因為怕自己年紀大搵唔番，所以唔夠膽博，之後見我有毛有翼，先夠膽轉）

所以我中學畢業之後，就冇問過佢攞錢。大學學費有兩年半有scholarship，生活費同之後嘅學費都係自己補習、返工賺返嚟。不過有一年，因為我要去美國交流，搵唔到錢，而且開支都大，雖然有獎學金，但阿媽最後都幫我俾咗幾萬蚊🥺 不過秉承我阿媽嘅教導，我大學整個時期都冇攞過任何grant loan，所以畢業後都唔存在需要還錢呢樣野😂

然後，我未畢業，就已經開咗patreon，喺呢度搵咗少少錢，之後就開咗性玩具店、補習社、其他生意，同埋都攞咗啲錢去買穩陣嘅投資產品....之後就好似而家咁啦😂 唔算有錢，但係生活都富足。喺幼稚園之後，大學畢業之前，我從來未試過有自己一間房，依家終於都有能力自己出嚟住。

其實looking back，我覺得我嘅童年係過得好富足嘅。雖然實際上係冇錢，有時青菜瘦肉又一餐，但因為我阿媽同我阿婆都好錫我，比好多關懷我，同埋永遠盡力比最好嘅嘢我（自己就唔洗錢），所以其實我唔覺得自己有啲乜嘢缺失。反而有啲家庭唔缺錢，但係冇乜關懷，我覺得咁樣仲慘。

大概講完啦，我寫我呀媽為我做嘅嘢寫到喊🥺 雖然我出身係麻麻，但我覺得只要肯努力其實係可以改變到命運，當然都有好多嘢要配合，譬如我天生係有啲小聰明，同埋我阿媽阿婆都對我好好，呢個係我嘅幸運😭 雖然實際上係基層，但生活水平同埋接受嘅教育，可能不比中產差，所以先令我可以發展得OK，呢一點完全係我呀媽嘅功勞。

所以當有人問我家境，我都唔知點答，究竟我係基層定唔係，唔知呀，都唔重要啦😭