心事台- 人生意義係乜？ (Patreon)

唔知點解，今日突然之間覺得好抑鬱。其實我周不時都會有一個循環，每個月總有幾日會諗埋一邊。

今日我又突然之間覺得人生好無意義。雖然我咁講好似好身在福中不知福，但我真係無辦法控制自己咁樣諗。

我有好多家人、朋友，全部同我關係都好好。我經濟狀況唔差、健康唔差、生活都過得幾好（唔係真係話超好，但我知足常樂）。但唔知點解，我覺得呢一切都好似好無意義，每一日活着，就好似係為咗滿足身體或者心靈上嘅需要，日復一日，去餵飽我心靈同埋身體上嘅貪婪，永無止盡但同時，又唔係真係乜嘢成就。又或者有一段時間，我會無慾無求，但冇慾望就更加顯唔出生命有咩意義。

不過放心，我唔會去死，我都唔會唔開心太耐，比多幾日我我就會恢復狀態🤦🏻‍♀️ 我真係當你地係我嘅樹窿，先會喺度講埋啲奇怪嘢，希望唔好嚇死你地🤦🏻‍♀️😅 我就算處於抑鬱都唔會騷擾人、唔會發脾氣，最多匿埋寫下文😂☺️