KOL揭密#3 我的收入？ (Patreon)

上兩個關於KOL嘅post講咗買follower同收入水平，今次講啲私人少少嘅。（我覺得財務呢啲嘢係好私人）

有留意我ig story 嘅，可能都知道我最近比啲政治傻佬搞，佢哋其中一個搞我嘅point係周圍貼我年幾前patreon嘅相，之後話無人會請我，睇我點搵工😂

其實有時睇到佢哋呢啲言論，我真係會忍唔住笑😂 錢唔係萬能，唔可以用黎全面judge 一個人嘅能力，但我敢講我財力唔會差過一般香港人，佢地judge我之前不如顧掂自己先😂

佢哋之所以覺得我搵唔到工，其實只係因為佢哋太不了解我嘅能力。我year 1其實已經有公司offer 我畢業25k起跳嘅工，唔係好多，但我覺得freshgrad黎講算唔錯。我同老細一路都保持良好嘅關係（唔關性感事），去到今年都仲有聯絡，佢都知道我網上做嘅嘢。佢有繼續叫我過去幫佢手，不過我畢業後當然無做，因為我想做自己生意。

其實我未畢業，已經有做自己嘅生意。除咗sex toy 、KOL工作、補習社以外嘅都有（嗰啲我唔講，我想保持返私隱，大概可以話你哋聽係網上零售）。以前我唔明白點解啲人成日咁執着話我「博上位」，因為我唔明「博上位」有咩好處，除咗比多啲人鬧之外😂 後來我發現原來喺做KOL過程中建立嘅人脈其實都幾有用，我好多零售嘅貨源都係因為網上啲人識我然後介紹到啲好嘢比我。

前老細教過我，話開源重要過節流，又話過記住唔好將所有蛋放喺同一個籃，所以我係搞好多壇嘢，收入都ok。另外一個老細教過我，淨係蠻力搵錢唔係辦法，要識得錢滾錢，所以我其實搵到啲錢之後有做投資，買咗啲基金債券，依家每月passive income 大概係入息中位數少啲啲。

我覺得我嘅所有生意，唔單只係同KOL相關，就算無關嘅，都同我喺做所謂KOL嘅過程中學到嘅skill息息相關。

其實我份人真係有少少怕悶，有少少怕虛渡光陰🤣 我鍾意自己有啲主意，唔想俾人控制同埋幫人哋建立野，鍾意自己建立，寧願生活冇咁穩定，寧願壓力大啲承擔大啲，仲要犧牲更加多嘅惱力同勞力。啲叫我「搵份工」，覺得我搵唔到工，想用呢嘢揶揄我嘅人真係好好笑😂🤦🏻‍♀️ 首先要搵我搵到，都唔會搵得差過平均，第二我真係唔想打工，第三我自己做自己嘢搵得多過去出面打工。

至於我收入係幾多呢🙃 大概同大家講講：我嘅基本開支一個月大概4萬🤫🙃 講緊係我已經唔買名牌嗰啲🤦🏻‍♀️ 負擔好重啊大佬😂 不過都仲儲到少少錢，亦有其他資產，咁大家大概可以估到下。不過呢個開支係包埋我keep住捐錢畀流浪動物（多謝你地，patreon嘅收入係有捐比流浪動物的😘😘😘你哋做咗好多好事。）

前老細講得好啱，永遠都要開拓同追求進步，永遠都要學習。我依家過得ok，唔代表喺將來個世界都會過得ok。譬如話KOL嘅工作，萬一ig 執笠，我好大部份嘅工作就完蛋了🤦🏻‍♀️😂 所以幾時都有兩手準備，我都希望自己可以精益求精。

錢唔係萬能，但係有錢可以買到自由同時間，去做好多夢寐以求嘅事，例如定期助養流浪動物或者去多啲地方見識世界。以往我喺公開平台講錢，都會有好多人鬧我話講錢係膚淺，我唔覺，因為錢嘅價值唔係銀碼或者物質，而係可以買到時間甚至夢想（我就當夢想係開個貓Cafe，都係要錢）。我覺得佢哋覺得錢唔重要，一係太幸福未捱過窮（我就試過$50蚊米粉食成個月），一係無乜野心去做啲comfort zone 以外嘅事。當然，錢唔係萬能都唔係最重要，最重要嘅始終係同人嘅關係，對世界嘅感知，以及對自己嘅要求、寬容同尊重。

一口氣講咗好多我認為好私人嘅嘢，包括我嘅支出、收入來源同埋我嘅金錢觀，希望大家都可以認識我多啲，唔好好似出面啲人咁識少少扮代表，睇見都尷尬🤣💕😘