我隆胸？豐胸秘訣公開。 (Patreon)

呢兩日同一班識咗10幾年嘅中學姐妹去游水。明明佢哋由細睇住我大，都可以問得出我係咪去咗隆胸，我真係不禁回佢地一句：「喂呀哥如果我有錢有心力去隆胸，點解我唔順便整埋容？」😂 佢哋仲輪流喺度㩒我個胸，問我點解可以咁彈😂😂

其實，如果按歐美嘅尺碼，我都只係D至E，唔係話好大，但我覺得我個型係OK，因為戴咗適合嘅bra。我覺得胸型要好睇最主要要有以下因素：

1.天生

阿媽係女人，但好多女人真係唔睇得透呢個點，成日覺得有方法可以升好多cup，但其實好多嘢係整定，撇除真係走去隆胸，其他方法只可以稍微改善形態或者豐少少，唔可能由A去D。我都唔會覺得自己可以做少少野就得到42吋長腿🤦🏻‍♀️

2.飲食

呢個好重要好重要。食高蛋白質嘅食物，唔好害怕脂肪，係升級同保持肉質有彈性嘅良方。女仔如果成日掛住減肥，唔食肉唔食油，就唔好諗住可以靠啲咩按摩或者精油豐到胸。如果長期吸收唔夠蛋白質，頭髮唔會長唔會令，皮膚都會好乾冇光澤，更加唔好奢望個胸會好睇，分分鐘下垂得好快。記得我去完美國住四個月，嗰度嘅飲食好高蛋白質，我返嚟係升咗成個cup但個身唔係特別肥咗好多。

3.選擇合適嘅內衣，懂得製造視覺效果

女仔真係要識得揀自己合適嘅胸圍，知道乜嘢形狀嘅胸圍會令到你個胸型好睇。例如我胸型係偏向圓，我知道我自己着半杯型嘅胸圍係好睇，V或三角無咁好睇，要識根據自己嘅胸型衡量乜嘢形狀嘅內衣會適合自己。又例如今次我着呢件泳衣，本身胸位冇乜承托力，加上泳衣本身會壓扁個胸，着落會唔好睇。所以我就特登加咗個nude bra喺入面，托一托同埋個形狀，咁就會好睇啲啦☺️

至於什麼按摩、飲木瓜奶、飲魚頭湯，呢啲我都從來冇做過。我覺得從蛋白質飲食，同埋選擇合適內衣着手會實際好多😜