Foodporn: 尖沙嘴的小高級法國菜 (Patreon)

🍴【Amina Modern European】週年節日豪一次

📮【尖沙嘴】廣東道流尚坊8樓

💰【價錢】～ $800@

🐷【好味程度: 9/10】

（利申係用左半價優惠先$800/人）更多食物圖片可參考我ig post: https://www.instagram.com/p/BuJfLgyA-Q_/?utm_source=ig_share_sheet&igshid=tvhnlo7gt6b7

真心，嗰晚無乜人，每一道菜我都食到哇哇聲，太細緻太好味啦😜

首先講下餐上小品。有三款自家製麵包（各有特色！）、又脆又鹹香嘅巴拿馬火腿脆片、醒胃嘅蘋果泡沫木瓜汁...當係打個底同開下胃，好味但未係好有驚喜。

第一道菜：蘋果木煙燻八爪魚

揭開蓋嘅一刻，啲煙飄出黎好靚！節日打卡最啱！作為嗅覺型人類，嗰陣抑鬱(?)回甘嘅蘋果木味飄出黎嘅時候，真係覺得好enjoy！有濃香木味、爽口嘅八爪魚配合甜甜地嘅汁、醃洋蔥、魚子、巨峰提子，好味！

第二道菜：牛肉他他/義大利雲吞

我兩樣都有食！

牛肉他他混合左洋蔥同香料，有一點兒泰式風味。上面嘅脆片係由肉汁製成，好夠味好特色！

義大利雲吞好濃郁creamy，帶甜，係黑松露肉餡！好回味！

第三道菜：帶子牛骨清湯

三粒帶子同配料（青蔥、蘆筍等）先上桌，之後喺我地面前倒湯。湯夠熱，而且好清好濃牛味，配合啲蔥飲更好！但個人認為同帶子唔算好夾，但唔係差，只係無其他菜咁出色。

第四道菜：法國鵝肝配檸檬香嘅唔知咩蓉

唔洗講，鵝肝一定係無得輸架啦。係，係殘忍嘅，但無啦，我自私冷血，道德和食物面前選擇左食物🙃 鵝肝表層煎香、內裏香滑，配合黑醋汁同個唔知咩蓉，可以清新啲無咁膩，正！

第五道菜：黑松露蘑菇溫泉蛋

讚讚讚！溫泉蛋配燶蘑菇汁、大大片黑松露、黑椒、乾菇😋 撈埋蛋汁食，perfecto😍

第六道菜：番石榴雪葩

用黎清味蕾係唔錯！賣相都好！但可惜我唔太喜歡甜嘢，所以無乜特別感覺，但好就好在，佢清香得黎唔算好甜，我唔太好甜，都覺得ok！

第七道菜：日本和牛肉眼

正！唔識形容，總之好味！醬汁、配菜都夾得好好！我最鍾意佢味道好和諧。牛肉上面有海鹽，帶出肉香，但醬汁帶甜同油香，中和返個口味！白色醬汁外有黃色柚子醋醬汁，令甜中再帶少許酸酸地嘅清香，好配合！

第八道菜：甜品+朱古力+茶

唔太好甜食，無乜feel。但味道唔差嘅，我都食曬😹 對我黎講，個甜品好在有乾冰煙霧效果同色彩夠靚，我唔愛甜食都有得睇下滿足下😜