又被求婚了，今次考慮得過？原因是… (Patreon)

（多圖!!!!! 更多圖及尺度更大的✨稍後繼續更新其他Tier🖤）

話說我同而家嘅男朋友已經一齊咗就嚟10年，如果有喺呢度追post嘅朋友，有機會都會睇到我間唔中指桑罵槐，同埋知道我係identify as single～ 😂 以前我喺IG（沒了）都講過，我覺得同呢個男朋友靈魂契合，思維、價值觀都可以互相鞭策，會一齊進步。但係相處方面，我實在係太唔想頂佢嘅脾氣，而且佢又窮，要同佢生活我負擔好大😂 加上佢咁多年來做過好多脫序行為，唔係冇背叛過我同埋出賣過我，仲各種傷害過我添，家庭觀念又同我唔一樣，所以我唔覺得佢係理想嘅結婚對象。

拍拖可以，但係要一齊組織家庭我真係唔想。如果一直都淨係有呢個人，緣份冇令我遇到第二個，我作為內向嘅人又唔會話點樣樣走去主動識人（之前試過玩交友app都OK嘅，但諗返起都真係好攰😂），咁我可能會prefer一世拍拖。

話說尋日我去探監，佢又再次向我求婚。其實咁多年來佢已經用咗各種方式同我求婚、講過無數次，但我梗係冇理佢啦。不過佢最近求婚嘅原因係實務上嘅：可以每個月探多兩次監（直系親屬專利，現在只能一個月兩次）、可以出席佢喺監獄裏面讀書嘅畢業禮有機會身體接觸。

不過今次最主要令我心動嘅位並唔係呢啲，呢啲我不嬲都知😂 而係佢話結婚嗰日，佢即刻簽定離婚文件😂 我日後想離嘅，只需要簽返個名再填番個日期就即刻可以去辦理😂 而且我當然都可以一貫如常地，繼續identify as single😂 無論結婚與否佢根本都唔會管我做什麼😂 甚至係鍾意同埋鼓勵我去溝仔（係我覺得煩啫😂）

我認為理想嘅結婚，係基於愛情同埋金錢。因為好愛一個人，而且結合兩家嘅財產、關係、人脈家庭，會有利彼此發展，所以用呢個制度去咁樣操作。淨係出於愛情結婚係一種天真，淨係出於金錢又未免太過委屈😂

基於我一向又唔係太追求愛情，又唔係太鍾意玩呢種人際關係嘅財技，人大咗少少之後，就覺得呢個婚姻制度好戇鳩。所以我認為我一係就唔結婚、唔參與呢個制度，如果係要結嘅，我就一定要玩到盡，攞晒呢個制度嘅好處先有意思。例如同有其他國籍嘅人結婚去攞passport，又例如搵個有錢佬結婚跟住分佢一半身家嗰種😂

咁由於我都真係唔係咁市儈同埋咁有心力去經營呢啲嘢嘅人，我係prefer寧願唔結婚😂🙏🏻

今次佢呢個proposal（語帶相關），係實務為主，每個月探多兩次、多啲機會見面，咁雖然我唔係話唔想，但似係益佢多啲😂 喺我利益出發的話，結個婚比較似係做慈善😂 結婚原因係為咗能夠照顧得佢更加好，on top of我本身已經為佢犧牲咗好多時間同埋心力去照料😅😂

即係我會想像一段婚姻，唔應該係好期待、好開心咁樣投入嘅咩？定真係求求其其都可以？純粹「唔係極度反感」都已經可以走去結？😂

仲有一個大嘅考慮：我媽係嗰啲好焦慮好多擔心嘅人，佢成日覺得如果我同佢結咗婚嘅話，會更加容易成為某啲勢力嘅眼中釘，對我只有害無利😅 咁當然我都認同，佢係冇驚錯的😅 如果我走去結婚，我阿媽肯定會成日好焦慮😅

諗諗吓都覺得有啲荒謬「隨時可以離婚」，係成為咗我今次考慮結婚最大嘅動力😂