【有片！醫美作戰】終於夠薑 去診所俾醫生打針！價錢、心路歷程、效果真心分享💉🩸 (Patreon)

⭐️⭐️⭐️⭐️⭐️⭐️⭐️⭐️⭐️⭐️⭐️⭐️

⭐️【按此觀看】 詳盡打針過程Video⭐️

⭐️⭐️⭐️⭐️⭐️⭐️⭐️⭐️⭐️⭐️⭐️⭐️

好似有見到即時效果！條片我加咗少少filter，原因係診所嘅燈光實在太唔適合上鏡，放大晒所有瑕疵方便醫生做嘢，但實在太醜樣😂

話說追開呢個系列嘅朋友，應該都知我一路比較care眼部輪廓～ 之前都講過我唔鍾意眼皮開始下垂，亦唔鍾意眼袋眼紋。

我一直都有上網做啲好淺層嘅research，都見到處理眼底狀況有不同方法，但始終無從入手，明知資訊一定係唔流通，又唔知去邊間好、怕會弄巧反拙、唔想承擔任何風險，所以一直都唔夠膽去打針或者做任何手術，做下hifu已經係天大嘅事😂

直至上星期，我同一班大學朋友聚會，一個朋友講開容貌焦慮，我當然會肯定嗰個朋友而家已經好好，但我同時都表示：既然真係有啲嘢唔滿意，財政能力允許，而家又有科技可以改善，點解唔去維修吓？我講緊嘅都係普通laser、醫美facial、hifu，已經可以大大解決佢嘅一啲困擾。

在場有另一位朋友，我已經7/8年冇見過，Year 2係我roommate，我留意到佢而家係精神咗、靚咗、精緻咗，但冇諗咁多🤔 講開醫美，佢即刻興奮分享：原來佢呢一兩年有打針，我不禁讚嘆，因為佢的確係提升咗整體氣質，有少少逆齡，而且望落好自然完全睇唔出微整過，我認為咁先係最佳狀態😮

嗰位朋友係打咗botox 放鬆眼角同下巴，減少皺紋，同時有打填充撫平淚溝。佢話個醫生係佢老公嘅bro，都係喇沙仔，手勢好好。咁大家都知我以前啲男朋友都係喇沙仔，加上見佢效果顯著而自然，我即刻覺得信得過（唔知咩心態😅😂🙏🏻）

上網睇過好多鬼故，話打透明質酸日後會移位、搞到皮膚望落凹凸不平、打歪少少會入血管好危險、同埋醫生審美+技巧都好重要，因為佢要控制好份量、落針手法同位置、要識得衡量用邊種針劑（份子的大小軟硬可塑性溶解性）、要好小心因為即使歪咗一毫米，整個輪廓出來都會變得怪怪的。

因為聽過太多鬼故，又唔識點揀，太多資訊好混亂，但係一直都想做，咁我見到朋友有信賴嘅醫生，又見到佢好似幾成功，即刻就已經唔想諗，即刻走去呢間😂

因為呢個原因，加上我冇收廣告費用，加上我仲未觀察到過多一段時間後會演化成點，所以我唔會開名診所或者推薦嗰位醫生住😂

講吓當日嘅流程，首先去診所就係同醫生諮詢，我講咗我最在意嘅眼底問題。醫生解釋問題嘅成因，話我左眼（有粒墨嗰邊）眼底嗰個5毫子眼袋唔係脂肪，而係肌肉，然後肌肉同肌肉之間有斷層因為脂肪流失，形成蘋果肌唔夠pump同埋眼底有凹入，導致各種陰影同埋眼袋顯得特別大。醫生就用筆畫低，指出喺邊啲位填充，可以改善我嘅concern：

我有同醫生講我嘅擔憂，包括會唔會幾十年後都殘留搞到塊面凹凹凸凸、會唔會移位etc 咁總之醫生就話呢隻透明質酸唔錯，係會溶解嘅，大概半年後可以補打（但我之前做過research話一般透明質酸其實都幾持久，根本唔使成日去補打，補打到上癮😅），半年後就會打另一隻連結性高啲，去配合呢一隻🤔 其實聽完我都唔係好知聽咗咩，都係得個信字😅🙏🏻

之後醫生離場，姑娘同我介紹價錢同埋針劑。其實我對嗰啲針劑冇認識，對價錢都唔知公價😂 但我覺得既然醫生手勢係好嘅（都係睇嗰位朋友同埋聽佢講），就算貴少少都冇所謂，反正手勢真係好緊要，而家係想靚，唔係想平😂🙏🏻然後，根本一啲都唔貴。

醫生話一邊臉打一針，係1ml嘅透明質酸。咁姑娘就話一針 $6888，但係第一次做有優惠，兩邊眼做晒，都係一針價錢。我朋友有同我講過大概係呢個價，我覺得OK的。

針劑其實我唔係好知係咩料😂但醫生有講過話有各種認證、係比較先進完善嘅一隻 ：

雖然都係半信半疑，但我決定人一世物一世試吓啦！冇死嘅！於是就碌卡俾錢，然後就去卸妝，嗰度環境比較簡單，有少少雜物比較細，但乾淨衛生嘅：

其實卸完妝之後我有去照鏡，又有影相，當刻我係有少少淆底，心諗，其實我本身都已經夠靚啦，需唔需要冒呢個風險呢？會唔會有機會破壞咗我原本嘅靚呢？

之後就去敷麻藥，原來都等咗20分鐘，期間我上網同人筆戰😂：

然後醫生就過嚟開始做嘢，醫生開始前我仲叮囑，拜託一定要認真幫我變靚！現場仲有兩個護士，其中一位好主動話可以同我拍片，非常好🤍

詳細嘅感受我都喺條片嘅字幕寫咗。我覺得無論生理定心理上，都唔係太痛嘅，係有少少拉扯感同不適，有時我做HIFU仲痛😂 最搞笑嘅係，打針塑形期間，醫生用針頭喺我塊面裏面拉扯，其實我覺得好似練肌肉去到最後嗰幾下好酸痛咁，有種爽痛爽痛嘅感覺，令我忍唔住嘴角上揚😂

醫生都好細心嘅，一路做有一路講解而家做緊咩，等我安心。之後都有慢慢去微調，亦有同我商量，點樣做到符合我嘅審美。

最後我仲唔小心性騷擾咗醫生，佢問我咩感覺，我同佢講「其實你插入去嗰下，我覺得好爽」😅

效果方面，其實我唔肯定我期待緊嘅係咩，但我都幾肯定沒有翻天覆地嘅改變，只能夠話都真係幾自然，自然到唔多覺😂 其實係咪優點？我覺得我而家眼底好似真係冇咁攰嘅，同埋的確斷層少咗、pump咗，喺診所睇嗰陣尤其明顯。

但係到我出街，用不同角度影相/觀察嘅時候，仍然係會出現之前我唔喜歡嘅情況，即係某啲燈光角度，左眼（有粒癦嗰邊）眼袋都係特別誇張。

不過有一樣嘢令我知道佢其實好有效果，就係我而家視野嘅底部，係會睇到自己蘋果肌、同埋粒墨😂 即係的確好明顯我塊面一定係pump左嘅，只係個改變好微小咁解。咁睇啦，我覺得第一次就嚟個巨大轉變，打到好勁，完全填平一切，效果就可能真係太進取會變到好假，我都未必接受，後遺症或者出錯嘅機會亦都更多，所以少少試住先先我覺得係啱嘅。

額外資訊：針劑網站嘅資料

其實我都係打完針先至再睇返啲資料，發現人哋個網站都唔係話呢隻係用來打法令紋嘅😂😅 都唔知得唔得，但信醫生唔怕！I guess？