新手篇：點解2024頭兩場星期六比賽❓｜一日一 F1｜第三季（29/30）｜Patrons限定 (Patreon)

F1 仲有唔到兩星期就開鑼，二〇二四年賽季頭兩場都喺星期四練習、星期五練習加排位、星期六比賽，點解咁㗎呢❓

一個字：Ramadan。我哋粵（越）語叫「齋戒月」。

齋戒月係回教習俗，回教徒必須喺呢個月禁慾 —— 包括禁煙、禁酒、禁性、禁飲、禁食（fasting）等。可能由於唔飲唔食真係會死，所以其實係日出至日落期間唔準飲食，其他「慾」就全禁，兼要每日祈禱五次。咁根據習俗，邊個月要淨身淨心呢？

回教徒係用回曆，回曆係陰曆嘅一種，而回曆第九個月就係「齋戒月」。由回曆九月新月出開始「齋戒」，到下個新月出為止。由於回曆比公曆短，所以每年嘅齋戒月都會比上年嘅早十至十二日。喺三十三年週期裡面，齋戒月可以遍佈春夏秋冬。

二〇二四年嘅齋戒月，由三月十號新月出（文字以阿拉伯時間為準，實際日子似乎你身處邊個時區見到新月出）開始，到四月九號再見新月為止。

就係咁，原本三月十號星期日舉行嘅沙特站就唔得喇，要改前一日星期六舉行。

又因為 F1 賽例規定兩場車之間要相隔一個星期，就係咁咁、巴林站都要提前一日星期六鬥喇。所以排位又要早一日，自由壹貳練習亦再早多日星期四舉行囉。齋戒月，就係主因。

另外仲有個可能嘅 unintended reason、順水原因：唔少仍然奉行五天工作嘅中東國家例如：巴林同沙特咁，其實 work week 係由星期日至四，星期五同六先係週末。今年 F1 頭兩站喺星期四至六舉行，其實先至係真正嘅入鄉隨俗（終於）。

不過受全球電視直播版權合約影響，你估 F1 之後會唔會從善如流、「完善比賽日程」，改返星期日比賽呢❓

完

第三季《一日一F1》都係 30 篇。如果有興趣重讀前兩季另外 60 篇嘅話，㩒下面個 tag 或者 content search：一日一F1。