2024 F1車手密碼 #44 #55 #63 #77 #81｜一日一 F1｜第三季（26/30）｜Patrons限定 (Patreon)

#44

係，就係「七屆」咸美頓（Lewis Hamilton）。你估 #44 會唔會揸紅色跑車成為「八屆」呢❓係嘅話，就童過童話。

童年時「咸仔」第一次鬥小型賽車嗰陣，就係用四十四號。點解？好簡單。因為佢唔知用咩冧巴好，所以就用老豆 Anthony 嘅車牌號碼：F44（哈）。由於老豆當時打三、四份工供養佢鬥車，最後成功為佢嘅職業生涯打好咗個根基。所以，Sir Lewis 想用呢個號碼鬥 F1。不忘本。

即使係佢橫行 F1 嘅年代、作為衛冕世界冠軍可以用 #1，「咸爺」仍然選擇繼續用四十四號鬥車。#44 似乎唔係一個號碼咁簡單，四十四號根本就係 SIR 同屋企人條根。

#55

二〇二四年，係最後一年見到 #55 出現喺像是帶著神秘嘅紅色跑車上邊。我花生 mode 希望，辛斯（Carlos Sainz）擊敗「陸仔」攞番個采。

然後，辛斯何去何從❓

呢個問題其實好普通，因為每個人都會 keep 住問自己：下年我何去何從。所以，我真心覺得我哋唔駛傷春悲秋。根據 F1 官方《Nation Podcast》，辛斯至少有三個 offer：Aston Martin、Sauber/Audi 同埋 Williams。

五十五號嘅意義，就係 Carlos 嘅「S」同 Sainz 嘅「S」。喺呢位西班牙馬德里人嘅腦海中，SS 好似 55，所以就用 #55。唔止咁，#5 亦係辛斯最鍾意嘅冧巴、老豆當年鬥 rally 都係用 #5（下圖）。但係，「四屆」Sebastian Vettel 一早用咗。咁而家就最理想，因為 #55 有兩個五，所以雙倍鍾意。

#63

暫時係二〇二五年「平治一哥」嘅羅素（George Russell）就係用呢個號碼。佢話：「呢個係 family number」。點解嘅❓

羅素其實係最細佬，佢有個二家姐叫 Cara，大大佬就係今年將會三十八歲、大過羅素十二年嘅 Benjy（下圖中）。Benjy 以前鬥 kart 仔就係用 #63，所以呢個號碼就變咗係「家族號碼」。

不過以 powerpoint 應徵車手工作而聞名於世嘅羅素其實仲認為，「63」睇落去有啲似「GR」、即係佢個名嘅 initials。估計羅素當時係喺荷蘭 Amsterdam 合法嘅 coffeeshop，荷蘭 high 咁所以見到「63」好似「GR」（下圖為本台用 AI 生成😄）。

#77

冤家果然路窄，路窄到呢對冤家嘅車手連號碼都喺正隔離。羅素嘅六十三號之後，咁橋就係七十七號嘅保達斯（Valtteri Bottas）。

同其他車手一樣，保達斯都想用幸運號碼 —— 七號比賽。不過，呢個冧巴一早俾唔 care 是咪幸運號碼、只係求其用返上年冧巴嘅另一位芬蘭人 —— Kimi 用咗。

之後，保達斯揀冧巴嘅套路就好似 #55 嘅辛斯咁：既然一個字唔得，咁兩個字喇！佢順便將自己個商標改為「Bo77as」，從此大賣（好似係）。就係咁，Valtteri 就用兩個七 —— #77 比賽。好在，F1 唔準用百位數。

#81

截止二〇二四年開季，現役車手嘅最大冧巴係 F1 今年「末代新人」奧斯卡（Oscar Piastri）嘅八十一號。

其實，奧斯卡最初喺澳洲鬥小型賽車係用十一號先嘅。不過之後一路升班，十一俾人用咗，所以就跳咗去用 #81。去到歐洲之後，更加用過好多唔同冧巴。直到二〇一七年，升班同時鬥英國 F4（下圖）同 Formula Renault NEC，「Oscar 仔」就用番 #81。

呢個車手密碼系列嚟到最、最後提一句，Vettel 可以用 #5 嘅權利，將會喺今年尾到期。即係假如唔知點解 Sebastian Vettel 出年復出，佢仲可以用番 #5，就好似 Fernando Alonso 都用得番 #14 咁解。

賽例規定，車手離開 F1 兩年之後、佢用開嘅號碼只係會 keep 兩年。之後，就會被循環，#17 Jules Bianchi 除外。

完

第三季《一日一F1》都係 30 篇。如果有興趣重讀前兩季另外 60 篇嘅話，㩒下面個 tag 或者 content search：一日一F1。