2024 F1車手密碼 #11 #14 #16 #18 #20｜一日一 F1｜第三季（24/30）｜Patrons限定 (Patreon)

#11

阿哥用一號，「Checo」佩雷斯（Sergio Perez）就用十一號。點解呢❓心水清嘅朋友應該記得，其實都係同足球有關。

Checo 細個係捧墨西哥超級聯賽嘅美洲足球會。二〇〇一年，Checo 十一歲。嗰年，有前皇馬、國際米蘭兼智利前鋒森莫蘭奴（Ivan Zamorano）加盟。嗰兩季，森莫蘭奴入咗超過三十球波，嗰陣佢就係著十一號波衫。

佩雷斯話鍾意佢嘅踢法、佢嘅入波、做咗佢嘅 fans，所以決定用十一號冧巴賽車。Checo 仲話今時今日乜都用十一號，連電郵地址都係。

#14

無錯，就係「Nando」—— Fernando Alonso。一九九六年七月十四號佢十四歲，揸十四號小型賽車成為世界冠軍。Nando 話：「由嗰刻開始，我就知道十四號係我個冧巴。」

#16

十六號係「陸仔」陸克萊（Charles Leclerc），咁啱佢就係十六號出世、一九九七年十月十六號出世。陸仔原本想用七號，但俾「冰人」Kimi Raikkonen 用咗；之後想用十號，但又俾好朋友 Pierre Gasly 用咗。最後㨂咗 #16，佢話因為：「一加六等於七」。數口真好。

#18

「太子爺」史杜爾（Lance Stroll）早年贏意大利 Formula 4 總冠軍就係用十八號。唔止咁，阿太子十八歲之後無耐就登陸 F1 揸 Williams。所以佢話係有少少迷信，但佢「鍾意 keep 住啲對我緊要嘅嘢，唔想改」。

#20

Haas F1 車手麥奴臣（Kevin Magnussen）用二十號鬥 F1，咁係因為佢二〇一三年就係用呢個冧巴、贏 Formula Renault 3.5 系列賽總冠軍。然後二〇一四年，佢就升班 F1 揸麥拿侖。

完

第三季《一日一F1》都係 30 篇。如果有興趣重讀前兩季另外 60 篇嘅話，㩒下面個 tag 或者 content search：一日一F1。