2024 F1車手密碼 #1 #2 #3 #4 #10｜一日一 F1｜第三季（23/30）｜Patrons限定 (Patreon)

二〇二四年 F1 係特別嘅，因為車手陣容係 F1 史上第一次居然完全無變。唔止都係嗰二十個車手，而且仲要都係效力同一隊。

既然係咁，唔知你仲記唔記得每個車手號碼背後嘅故仔呢❓趁未開季，係時候溫故知新。

首先，眾所九知，只有現任世界冠軍先可以㨂做一號仔；而「韋少（Max Verstappen）」未係一號仔之前就係 33 號。咁點解呢？好簡單。佢細個都玩過架 33 號嘅電動玩具車嘅（下圖）。

其實，荷蘭人細個鬥車嗰陣用三號，本來想喺 F1 用，但係就俾「四萬（Daniel Ricciardo）」用咗。所以，韋少就用兩個「三」，話係「雙倍開心」咁解。

二號。車手一般唔多用，唔「老黎」丫嘛。第二，即係第一個輸，偏偏「沙展仔（Logan Sargeant）」唔信邪。原因係佢二〇一八年鬥 Formula Renault 嗰陣已經用過二號（下圖）、贏過三場車，最後仲要總第四、成績幾好，所以就用二號囉。

其實沙展仔同韋少一樣，本來都係想用三號，但無計。

三號仔嘅故事，應該由「四萬迷」話我知。是咁的，Daniel Ricciardo 自二〇一四年加盟紅牛就一直用三號。呢位澳洲人話，除咗因為三號係佢嘅小型賽車號碼之外，仲因為細個成日睇 NASCAR、所以鍾意三號仔 Dale Earnhardt。點知二〇〇一年 Daytona 500，Dale 戰死沙場。

所以當四萬知道要揀個 F1「冧巴」之後，諗都唔駛諗就係三號（下圖）。

四號。Landoooooo！無錯，就係啱啱又同麥拿侖再續約、到至少二〇二七年嘅 Lando Norris。佢揀呢個冧巴同其他 F1 車手有少少唔同，就係唔關細個鬥車事。反而，係因為 Lando 係 MotoGP 名宿 Valentino Rossi 嘅粉絲、諗過用 46 號，但又唔想照抄，所以就四號。

10 號仔係 Pierre Gasly。呢個好易記，首先佢係法國足球名將施丹嘅 fans，而施丹就係著 10 號波衫嘅。其次，二〇一三年贏 Formula Renault 2.0 Eurocup 總冠軍嗰陣，Pierre 就係用 10 號車。

完

第三季《一日一F1》都係 30 篇。如果有興趣重讀前兩季另外 60 篇嘅話，㩒下面個 tag 或者 content search：一日一F1。